تطبيقات مدبرة منزل مثالية تدابير منزلية
عنوان الموضوع : تطبيقات مدبرة منزل مثالية تدابير منزلية
مقدم من طرف منتديات العندليب
نكمل ليوم الثلاثاء *غسلت الاوانى كنست وسيقت وحضرت الغداء عملت سلاطة سنارية مفورة وبيض مقلى بالكشير نحبوه بزايد تغدينا دخلت شوية لنت بعد ما راح زوجى للعمل ومن بعد حضروا الاولاد رواحهم وراحو غلقت التلفاز والنت وقيلت قمت على 3 وصليت الظهر وذكرت بعد الصلاة فى المساء يجو الاولاد ويرتاحو شوية وياكلو كاش ما حاجة خبز وحليب ولا قاطو ومع اذان العصر يروحو يقراو فى المدرسة القرآنية للمغرب اليوم أن وزوجى شربنا الشاى فى غرفتنا لانو عندنا فيها خدمة رانا رايحين نغلفولها حيوطها بالورق لانو الحيوط جبس والبنتورة تتقشر هذ المرة قلنا نغلفوها نشوف والعشاء عندى من البارح أما الجانب التربوى/ مثل كل يوم تدريس الاولاد .الجانب الجمالى /أنا شعرى دهنى ما نعملوش حمام زيتى مداومتلوعلى شمبوان سانسيلك نتاع القشرة وراهو شعرى هايل الترطيب اليومى ليدين والرجلين أمامزيل الشعر أنا أستعمل فام مع الترطيب الى يجى معاه هايل نتعشو ونغسل الاوانى ونعمل أذكار النوم وإلى الفراش .
يوم الاربعاء ***2/10/2015 نهضت على 5والنصف الزوج والاولاد إلى المسجد وأنا صليت ودرت الاذكار وجهزت الفطور كيما العادة وحضرت الغداء على النار مونشتو كنت موجداتو من البارح الاولاد وباباهم راحو للمدرسة وأنا نفضت وغسلت على الخفيف ورنخت الفراش نتاع الارض لأنو فى الصيف والخريف نفرش فراشات خفاف وكل أسبوعين نغسلهم ورانى أدرجت الصور فى الموضوع الاول نتمنى تكونو فاهمينى وأخذت بنتى لجداها ورحت نخدم رجعت على 12 سخنت الغداء وتغدينا ومن باعد غسلت الفراش اللى خليتو الصبا ح ونشرتو وفرشت الدار نتاع الجلوس وحضرت الحليب لبنتى وصليت الظهر وإلى النوم قيلت وقمت درت موسكتشو شربنا بها الشاى ومنبعد كتبت لبنتى اللوح نتاع المسجد ولبست عبايتها وخمارها وراحت تقرا مع خاوتها أنا هذ الايام متوقفة عن المدرسة القرآنية لانو ماتوالمنيش مع الوقت الجديد .الجانب الدينى / أنا مانقدرش نكون معاكم فى الحفظ لانى أحفظ سورة الملك والجزء الاول من البقرة وبالتالى رانى نواصل البرنامج نتاع المدرسة القرآنية اليوم كررت السور من يس حتى للشورى
جلست أمام الكمبيوتر باه نشف ين وصلت مع التحدى أنا رانى سلحفاة معاكم يعطيكم الصحة والعافية العشاء درت بركوكس أنا نحبو بالزاف عشيت الاولاد لانو باباهم تأخر وهوما يرقدو بكرى الجانب التربوى / تدريس الاولاد والتكرار معهم السورة الى راهم وصلوها الكبير فى الصافات والصغير فى قد سمع وبنتى فى الجن ومن يجى الزوج نتعشو وإلى النوم . الجانب الجمالى / الترطيب وفرش الاسنان .
الخميس 3/10/2015/ الجانب الدينى / الصلاة فى وقتها وخلاص ماعلاباليش من الصباح نضت مانيش مليحة نتمنى من الاخت سمراء الدنيا تزيد تضيف هذا التطبيق بارك الله فيك
الجانب التنظيفى / أنا المطبخ قبل الدخول المدرسى دائما نغسلو وندوشو مليح باه فى بداية الدراسة تكون الاعمال بالزاف مع الاولاد وزوجى لانو معلم ومع الخدمة ما يكونش عندى الفراغ حتى لحكان راسى الوقت مشرجى .رحت للخدمة مع 10 بعد ما قمت بالاعمال العادية اليومية كى رجعت تغدينا شربة خضار وكملت سيقت وغسلت الدوش نظفت الحيوط نتاع الفايونس حكيتهم بالصابن والجافيل شللت وسيقت ومن بعد صليت الظهر وحضرت روحى أنا وسلسبيل وكى جاء زوجى رحنا مع الاولاد لدار أهلى ومن ثم رحت أنا وماما لدار صاحبتى عزيناها فى يماها ماتت الله يرحمها ويسكنها فسيح جناته بقينا عند أهلى تعشينا ورجعنا للدار بعد السهرة .
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
59 مشاهدة ولا رد واحد وعلاش يا البنات
__________________________________________________ __________
>>>> الرد الثاني :
ماشاء الله عليك فحلة وربي يوفقك في امور حياتك
__________________________________________________ __________
>>>> الرد الثالث :
ما شاء الله عليك يا فاطمة نظام و شطارة .........ربي يكون في عونك الخدمة برا و الداخل و الاولاد ربي يحفظهم
دائما نحيي فيك اصرارك على اولادك لحفظ كتاب الله بارك الله فيك
بالنسبة للحفظ ......لبنات الدورة للي فاتت كانو لبنات يحفظو سورة الكهف و هاذ الدورة يحفظو الملك و انا بما انني حافظتهم بديت في البقرة .......يعني ماناش ملتازمين المهم نححفظو بعض الايات و ما نتكاسلوش على القران و انت ما شاء الله راكي تحفظي رغم ضيق الوقت نتمنى لبنات يتشجعو كي يشوفو تطبيقك و يديروك قدوة
العلامة هاذ المرة كاملة
+4 للجانب التنظيفي
+4 للجانب التربوي
+4 للجمالي
+4 للديني
+5 للحفظ
__________________________________________________ __________
>>>> الرد الرابع :
ما شاء الله اختي فاطمة الله يباركلك
عجبتني تحفيظ القران لاولادك ربي يحفضهملك
__________________________________________________ __________
>>>> الرد الخامس :
ماشاء الله عليك ربي يوفقك
