علاه حنا البنات نقراو و علاه نخدمو ؟؟؟ .. الكل مدعو للدخول من قضايا الساعة
عنوان الموضوع : علاه حنا البنات نقراو و علاه نخدمو ؟؟؟ .. الكل مدعو للدخول من قضايا الساعة
مقدم من طرف منتديات العندليب
أنا اليوم حابة نوضحالأسباب في نظري لي يخليو الطفلة تقرا و لي يخليوها دير اقامة و تبعد على دارهم و تقرا
و ثاني الأسباب الي يخليوها تخدم
أول حاجة القراية حتى للقسم النهائي
أنا نعتقد بلي هاذ المرحلة من القراية ولات مهمة بزااااف و indispensable في وقتنا هذا علاه :
- لأنو رانا في عصر التطور و عصر العلم
- و الطفلة اذا بقات امية في مجتمعنا ماعندها حتى معنى
- اذا جات تتفرج مثلا و فسدلها التيليفيزيون ماهيش رايحة تفهم و تريقلو اذا كانت امية
- اذا تزوجت و حابة تقريولادها ماتقدرش و رح يضيعولها
- اذا راحت للطبيب و قالها كاش كلمة بالفرونسي ولا ماهيش رح تفهم و قادر تعرض حياتها للخطر
- اذا شرات حوايج للدار و حابة تستخدمهم و ماتعرفش تقرا كيفية الاستعمال رح تعرض عائلتها للخطر
- اذا حابة دير قاطو و مدولها وصفةماتعرفش تقراها حتى يقراهالها واحد اخر
- اذا حابة تستخدم البورتابل رايحة تحصل بزااااف و ماتقولوليش ساهل .. اللخرة اللخرة كي يلحقها ميساج مثلا تاع فليكسي ماتعرفش تقراه ............
هذي على سبيل المثال لا الحصر لانو كاين بزااااااف مشاكل تواجههم المرأة إذا كانت أمية و صدقوني مانيش نهدر من راسي راني نهدر من الواقع و هاذو نساء أميات سمعت حكاياتهم بنفسي .. معاناة تاع الصح .. و الله يغيضو
ثاني حاجة القراية في الجامعة
هاذ المرحلة طبعا ماهيش مهمة بزاااف كيما الاولى لأنو الي قرات للنهائي تقدر تسلك روحها .. مالا علاه الطفلة تقرا فالجامعة ؟
- أول حاجة طلب العلم .. ماكانش حاجة خير من العلم
- الطفلة اذا قعدت فالدار سيرتو في مجتمعنا راني نهدر ع النظرة رح يشوفو فيها كامل ماتصلح لحاجة غير للزواج .. و زواج الطفلة و هي صغيرة ما ينجحش ديما
- اذا قعدت فالدار رايحة تضيع وقتها غير فالمسلسلات و الرقاد و تريح عمرها لي رح تندم عليه و رح تتحاسب عليه .. ّ"كلامي من الواقع"
- الحاجة المهمة ثاني أنها كي تقرا فالجامعة رح تتخرج بديبلوم و رح تقدر تخدم و الخدمة راني رح نهدر عليها مبعد
ثالث حاجة الطفلة دير اقامة و تبعد على دارهم
- طبعا .. مشي كل الفروع متوفرين فكل الولايات .. - نطلب من الناس ينحيو هاذيك النظرة الي راهم يشوفو بيها لبنات الاقامة .. كيما كاين بنات ماهمش ملاح ربي يهديهم .. كاين بنات لي اوبليجي عليهم يديرو اقامة و يقراو بعاد على ديارهم لظروف ما كيما انا و عيمان هههههه
رابع حاجة علاه الطفلة تخدم
- كاين لي محتاجة و لازم تخدم باش تسد مصاريف العائلة مثلا ام لازم تصرف على اولادها اذا كانت مطلقة او ارملة او راجلها ما يقدرش يخدم او تخلى على مسؤوليتو ......
- كاين الطفلة لي تخدم باش ماتقعدش فالدار تودر وقتها .. مثلا لي ماهيش متزوجة وش تقعد دير فالدار مع المسلسلات و تودار الوقت فالزهر .. تخدم احسن .. خاصة اذا كانت خدمتها محترمة
- كاين مهن فالمجتمع لازم المرأة هي لي تقوم بيهم .. رح تتساءلوا واشي هوما هاذ المهن لي مايصلحوش للرجال
صحا قولولي يا ليجان .. لوكان تتزوج و تمرض مرتك .. وين تفضل تديها لطبيب ولا طبيبة ؟ و انتوما يا البنات كي تمرضو اريحلكم تروحو للطبيبة ولا للطبيب
هل من الممكن الاستغناء عن دور المرأة في الطب ؟
عمبالكم بلي كاين نساء يرضاو يموتو و مايروحوش لطبيب راجل .. و خاااااصة بعض الامرااااض الخاصة بالنساء دون الرجال .. ناهيك عن المرأة أثناء فترة الحمل .. و عند الولادة كاين حالات لازم يتدخل الطبيب ... يعني لو تكون مرأة طبيبة نساء أحسن .. بلا ماندخل بزاف فليديتاي .......
و إذا البنات حبسو القراية فالتارمينال شكون رح يداوي النسا تاعنا غير الرجال ؟؟؟
و اذا ما ضحاوش بنات من ولايات مثل ولايتي انا و دارو اقامة شكون رح يداوي نسا ولايتي ؟؟؟؟؟؟
...
عمبالي راني طولت بزااااااف بزاااااف وانا نحكي
تعرفو مازال عندي كلام نقولو مي معليهش راني اختصرت هههه
اسمحولي بزاااف ع الاطالة و نتمنى تقراو موضوعي
و تشاركوني بآراءكم
و تقولولي وين راني غالطة اذا غلطت
...
تحياتي لكم
ربي يحفظكم خاوتي
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
التعليم الثانوي لازم يعني مراة بمستوى ثانوي لااااازم حتى تقدر تربي اولادها تربية حسنة فأنا على سبيل المثال احب ان تكون فتاتي بمستوى ثانوي كأقصى حد و اريدها ماكثة في البيت و ليست عاملة كوني اغار عليها من الاختلاط الحاصل و حينما تمرض تتداوى عند طبيبة لاني اغاااااار و الحمد لله الطبيبات راهم بزااااف و كاين اللي يسمح لبنته باش تدرس و تعمل كل حسب تفكيره ,,,,,
__________________________________________________ __________
>>>> الرد الثاني :
ana ma3a dirasat al maraa kay to3alima awladaha takraa al ko3aan
al chahada silaha ida matazawjoha
tastati3 al baht 3an 3amal lito3ila awladaha
__________________________________________________ __________
>>>> الرد الثالث :
اشكركم اخوتى
__________________________________________________ __________
>>>> الرد الرابع :
حتى انا راني مع المراة لي تقرا وتخدم
ولا تزوج ويبقا راجلها يعايرها بلي هي امية
وحتى لو زو جت وطلقت تكون مامنة المستقبل تاعها
ماشي تروح لدار والديها ولول لي يخطبها يمدوهاله
اللهم تكمل قرايتها وتهني راسها ولا كان راجلها يبغيها
ماعليش تحبس الخدمة وجاية عليها
__________________________________________________ __________
>>>> الرد الخامس :
ادا جات هكذا معليش
بصح باه تلقا لقراية سبة برك باه تروح طرقن
ولا تروح تخدم خدمة تاع رجال وفي في وسط الرجال
تقعد في الدار خير ليها ولماليها
