راني قريب ننفجر حبيتكم تعاونوني مشكلة
عنوان الموضوع : راني قريب ننفجر حبيتكم تعاونوني مشكلة
مقدم من طرف منتديات العندليب
السلام عليكم رمضان كريم ان شاء الله
حبيت نحكيلكم و نفرغ قلبي ما عنديش لشكون نحكي انا في عمري 23 سنة و العام هدا كملت قرايتي الحمد لله ماستر المشكلة الي عندنا انو دايما دارنا في مشاكل بين ماما و بابا من و حنا صغار حتى لدرك دايما هاك و المنايفة عندهم و لات عادي وصلوا حتى لقريب 6 اشهر ما يهدروش مع بعضاهم و احنا اتعقدنا من هدا المشاكل لانه كلش يصرى قدامنا انا وحدة ندز بزاف لقلبي و منحكيش يعني ماما دايما تقاسي و صابرة على جالنا برك لانه بابا مش مقيمها قاع و راها ناوية ورا رمضان تفيريها معاه خاتش قالتلنا خلاص ما ولاتش تقدر تزيد تصبر صبرت 30 عام بزااااااف ,و انا هدا الفترة اتقدملي واحد متربي و متخلق هو ولد حومتنا انا وافقت و دارنا وافقو و راه ناوي ورا العيد ان شاء الله يجي يخطب و يدفع بخطرة و قالهم انو ما يطولش و يدير العرس خاتش هو واجد بصح المشكلة ماما رافضة انو هدي فكرة ما يطولش قاتلي اخدمي شويا و خلي العام الجاي يدير العرس بصح انا مش حابة الخدمة و الله كرهت و عييت من القراية و تكسار الراس و حابة نرتاح و نستقر والله رانب مساعفة روحي برك كرهت المشاكل منا و تعب القراية منا و ندز لقلبي بزززاف بصح هي مش فاهمتني و حشمت نقولها تقولي راكي هاك سبة غي على جال حابة تتزوجي و متطوليش و تقول بلي راني نشاحن و نعند فيها و متفرحليش من قلبها و ديرها غي كي شغل انا حابة و اتقولي ديري رايك راكي تندمي من بعد و انا حابتها تفهمني و تفرحلي من قلبها مش فرحة تاع مفروضة عليها برك حبيتها تقتنع انو ما رانيش ندير في حاجة غالطة ولا الي نندم عليها من بعد معرفتش كيفاش نفهمها و نقنعها ساعدوني كيفاش اندير ,و المشكلة الاكبر الا كيما قالت انو بلاك تفريها معاه ورا العيد يعني رايحة يصرا عراقيل و نولو في مشاكل كثر من درك والله اتعمر قلبي معرفتش الا راني غالطة و لا صح يا ريت الي يقرا مشكلتي يساعدني برايو ووجهو نظروا و شكرا ادعولي معاكم ربي يفرج عليا
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
ربي يفرج عليك اختي كلش بالعقل والمفاهمة حاولي مع يماك بالشوي قوليلها انت صبر تاع 30 سنة يروح في لحظة غضب قوليلها انا كملت قرايتي بغيت نريح راسي شوية جاني مكتوب مليح خلاص وعلاش ناجل خير البر عاجله حاولي تقنعيها ما تياسيش حتى تتقتنع ويا اختي الام جامي ماتفرحش من قلبها لبنتها كي تتزوج كان هكداك ما تصبرش على جالكم 30 سنة حاولي تهدايها واقنعيها بالشوي وان شاء الله مايكون غير الخير ياك ربي فيه غير الخير ربي يزين سعدك ويهدي باباك للصواب صلي وادعي ربي حنا على ابواب الشهر الفضيل دعاء الصائم مقبول ما تتقلقيش روحك ربي يهنيك اختي
__________________________________________________ __________
>>>> الرد الثاني :
حبيبتي أولا نقلك رمضان كريم يعود عليك بالصحة والهنا.................... كل البيوت فيها مشاكل ، الله غالب هادي هي الحياة,, وصدقيني باش تلقي راحتك انت ويماك.. الحل الطلاق ولو كان الامر صعب ، ما راحش توالفي المرة الاولى ولكن راح تلقي راحة بالك انت وعائلتك,,,, خاصة اذا لم يتوافق الوالدين وحلها شئ واحد هو الطلاق,,,,,,,,,,,,,,, اما امك فيما يخص موضوع العمل والعرس,,, والله هي عندها الحق انت مازالك صغيرة حوسي على خدمة وديري بتاتك ، شوفي الدنيا من زاوية اخرى والله ما تدري لعل تغيري رايك...... وما تقوليش الزواج يريح بالك وانت واش يضمن ليك؟ قادر يكون راحة ولاّ تعب.............. خمي مليح قبل اي قرار تديه وانشا الله ربي يسهلك
__________________________________________________ __________
>>>> الرد الثالث :
عصفور في اليد ولا عشرة على الشجرة جاك راجل ولد حومتك زيدي أقتنعي بيه مليح واتكلي على ربي وتزوجي حكاية تفضلي الخدمة على الزواج أمك راهي غالطة ،أمك حاباتك تخدمي باش تشري الجهاز ، الجهاز ديري لي تقدري عليها وأكيد الرجل مش راح يحاسبك على هذا الشيء المهم الهناء في الزواج ما يهمش وش تجيب معاها الزوجة .
__________________________________________________ __________
>>>> الرد الرابع :
رمضان مبارك غاليتي
ربي يعينك
قد اعود ان شاء الله ان كان في جعبتي شيء لاقوله
__________________________________________________ __________
>>>> الرد الخامس :
