السلام عليكم
والله يا خاوتي المشكلة هي شخص من المفروض يكون صاحبي
المهم العام الماضي طلعت للجامعة و رحت لولاية بعيدة باه نكمل الدراسة و هذا الشخص ولد ولايتي نعرفو من بكري حتى هو سجل في الجامعة الي سجلت فيها ,المهم كانت بيناتنا غير السلام مي من العام الماضي و هو لاصق فيا حاب يديرني صاحبو بالسيف رغم انو اشخاص بزاف حذروني منو و قالولي اخطيك منو راهو طماع و بخيل و انتهازي و حقود و و و
انا مادرت حتى على واحد و صاحبتو نورمال مي مع الوقت بديت نكتاشف بلي راني مع انسان والله والله والله خسارة فيه كلمة انسان يا خاوتي عندو عقلية غريبة جدا ,بخيل لدرجة لايمكن تصورها و كن غير جا بخيل برك بروفيتور يا خاوتي الدراهم الي داهم من عندي سلف و مارجعهمش اكثر من دراهمو الي صرفهم و مايهمو غير صلاحو و على جال تاني باه نوريلو في الدراسة و كن يقصدك في حاجة و ماتمدلوش يهز عليك الحقد بطريقة غريبة و حسود و غيار من اللبس و الدراسة و كل شيء
و الحشمة ماعندوش و جهو صحيح و ديما يجيبلي العيب و البهادل
والله حاولت نعدلو و نفهمو بلي كل شي يدر فيه خطأ مي هو كي تقلو اقعد يوقف و من العام الماضي و انا صابر عليه على خاطر قاسني بزاف و انا ديما نسكتلو على جال انو ولد ولايتي و بيناتنا عشرة مي هو مابغاش يحشم حتى هذا العام جرحني بالقول و الفعل و انا اكيد حبيت نحطلو حد ,مي الله غالب دير واش دير تخاصمت معاه بزاف و وصلت بيناتنا للضرب المهم كان هدفي انو يخرج من حياتي مي تضاربنا وشحال من مرة و يفاجئني و يجي يهدر معايا عادي كلي شي ما صرى باه يبقى يتمصلح كالعادة و انا نصمتو و هو يهدرني بالسيف و قداه من مرة و انا نقلو بلي مانيش حابو يكون صاحبي و احكي و لا ماتحكيش
والله ياخاوتي عييت منو و رجعلي الحياة الجامعية جحيم ديما لاصق فيا بويسك واحد لا يحبو و المشكل انو الناس كامل تقطعلي فيه و تقلي كيفاه قادر تصاحب واحد كيما هذا و الي في القلب يعلم بيه غير ربي
قولولي واش ندير و ادعولي هذي الدعوة ربي يجازيكم
ربي يفارقكم بلا ذنوب
