عاونوني الله يحفظكم مشكلتي

عنوان الموضوع : عاونوني الله يحفظكم مشكلتي
مقدم من طرف منتديات العندليب

السلام عليكم و رحمة الله تعالى و بركاته

اخوتي و اخواتي ربي يحفظكم ان شاء الله و تعاونوني في المشكل اللي راني فيه و الله راني مودر مانيش فاهم روحي و اسمحولي كي راني نهدر بالدارجة بصح باش نوصلكم مليح واش حاب نهدر

خاوتي انا من صغري من الابتدائي كانت عقليتي اني نقصر بزااااف مع قع الغاشي و مع كلاصتي في ليكول قع نقصر معاهم بدون اي فرق صوا بنات ولا ذكورة و قريب منهم قع بزاااااف هادي الكلاصة تربيت معاها و قع دايرهم كتر من خاوتي و نعاونهم قع و اللي يكون مقلق ولا حاب يهدر و الله نسمعو من قلبي و ندبر عليه كي شغل راني ندبر على خويا ولا ختي مالقري ساعات انا نكون مقلقل كتر منهم و مورالي 0 كتر منهم
المهم هادي الكلاصة بقيت معاها من الابتدائي حتان 3 ثانوي و ما صرالي حتى بروبلام العام اللي فات مجبتش الباك و عاودتو السنا طحت في كلاصة تاني و بقيت بنفس عقليتي الله غالب انا هاك نقصر مع قع الغاشي و نحب نعاون و نفهم اللي مش فاهم و ما عنديش هاديك العقدة نتع منداسرش ولا هادي طفلة و لا منعرف قع دايرهم خاوتي و صدقوني اقسم لكم بالله غير جامي كنت مع طفلة نقصرو و راح مخي بعيد بالعكس و الله غير كامل نعرفهم بماما و دارنا مشكلتي اني اجتماعي فوق الحد

السنا اكتشفت بلي وحدة كانت تحبني بزااااف بسباب عقليتي و كيفاه كنت نقصر معاها و معاملتي ليها و كانت حشمانة تقلي و هادي الطفلة من كلاصتي و تالمون كانت تحبني كانت تحكي عليا لوحدة صحبتها و صحبتها هادي طاحت فيا غير من الهدرة نتع صحبتها اللي تقرا معايا هههه
انا نهار قالوهالي متت بالضحك بويسك جامي تخيلتها هادي قع ههههو زيد انا جامي خممت هاك و زيد انا منيش شباب لدرجة هادي عادي نص نص هههههه المهم انا في الاول و الله غير ضحكت و رحت حكمت الطفلة بالضحك نورمال و قتلها يا ودي منقدرش و انا دايركم كي خوتاتي و كن كاش ما كنت داير في راسي من الاول منداصركمش
المشكل الطفلة هادي ماهيش جي تقرا راها من الفصل الاول و بعد ما جابت معدل 13 في الفصل الاول جابت الزاوج 5 بويسك مجاتش قع و جات ليا اختها تقرا في الجامعة قاتلي بسبتك بويسك نتا تمسخرت عليها بصح انا و الله ما قصدي نقصر انا تفاجأت و كنت نقصر معاها و نضالو نضحكو مدخلتش في راسي نتع تحبني هادي قع و ظرك سمعت بلي هادي الطفلة ماهيش ناوية تعقب الباك راهي حابة تعاودو و قطعت قثع الملف نتاعها و الكراسات و صدقوني ماهيش جي تقراا قع بسبتي و الله و دوست مع صحبتها و زيد حكموها دارهم تحكي في التليفون نهار عيطت لواحد صاحبي تسقسيه عليا و الله راني نحس بتأنيب الضمير راني كاره حياتي و ندمت كي كنت بهاديك العقلية على بالي بل غلطت كي مدرتش حدود بصح الله غالب انا هاكا و تربيت هاك
علما انو انا نحب وحدة و عندي معاها 7 سنين و هادر عليها مع دارهم و مادلهم كلمة و متفاهمين بعد مدة نخطبها ممبعد نكملو قرايتنا المهم انا منكونش معاها في الحرام و منديرلهاش المشاكل على بيها هدرت مع دارهم و درت هادي الخطوة بويسك منحبش هاداك النش و هاديك العقلية نتع الليسيات و نستناك و منعرف
قلولي واش ندير مع الطفلة هادي ؟؟؟ و الله راني حاس روحي سبة في واش راهو يصرالها علما انو صرالها بزافففففف مشاكل مع دارهم غير بسبابي و ضربوها و صراولها مشاكل مع صحبتها اللي كانت تحكيلهال عليا و طاحت فيا
راني عارف بلي غلطتي من الاول قع كي داصرتهم لدرجة كبيرة بصح و الله انا مني كنت صغير هاك مالا يرحم والديكم متهبطوليش المورال كتر ملي راه هابط و اسمحولي كي طولت عليكم
في امان الله


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكم

من إستنتاجي الخاص تبين لي أنك في مرحلة الثانوية ....يعني هاذي قضية 7 سنين عاطي كلمة على واحدة .........كيفاش ؟؟؟؟؟؟.......

و من خلال القصة ....وجب أن تستنتج أن طريقة تعاملك مع الغير ....ليست صحيحة .....يعني عقليتك هادي غير بدلها .....و خصوصا مع البنات .....

مسألة شعوك بالدنب مع تلك الفتاة .....أنا شخصيا لا أرى لك علاقة بالموضوع ....و الغلطة غلطة اهلها ....هم الأحرص على مستقبلها الدراسي ...و توعيتها بتوجيه عواطفها ....و مراقبتها ......
وفقك الله

__________________________________________________ __________

>>>> الرد الثاني :

هذه الطفلة باين عليها تقاست بزاف حاول قول لصحبتها انها تسامحك وانت راك خاطب وهي ستبقى زميلة و الحكاية مجرد سوء فهم.
وعقليتك هذي مليحة مادامك تساعد الناس وتنحيلهم جو الكآبة .
*و يا اخي اضحك مع الناس كيما تحب المهم ما تقيسهمش او تعكي عليهم لان كل واحد وعقليتو .
وربي يدوم القوسطو .*

__________________________________________________ __________

>>>> الرد الثالث :

راكم في مرحلة المراهقة والبنات يحلمو ياسر ويعلقو طموحات كبيرة على تلاميذ معاهم لأنهم متأثرين بالمسلسلات ويحسابو الأمور ساهلة
أنت أخي لازم تبدل هاذ العقلية وبعد على البنات وحل مشاكلك السع وانجح في الباك وحذاري تكمل فيها لأن أمامك جامعة وراح تتطور الأمور وممكن توصل لما لا يحمد عقباه ..حاول تلتحق بالمسجد وتختلط بناس واعيين أكثر منك وتعلم دينك واحفظ شوية قرآن وادعي ربي يوفقك لما فيه الخير وطلق الحكايات مع البنات حتى تتخرج وتلقى خدمة ..

__________________________________________________ __________

>>>> الرد الرابع :

لا تخف و لا تحزن أخي أنت لست مسؤول عن احلام و أوهام هاته الفتاة خاصّة و أنّك صارحتها انّك تعاملها كأخ و لم تكذب عليها و لم تستغل إعجابها بك لتلوم نفسك..مستقبل الفتاة في يد عائلتها و هي المسؤولة عنها أمّا عن أسلوب معاملتك فغيره حالا و اهتم بدراستك و لا تضيع وقتك في الترهات و اختر الصّحبة الصالحة لتنفعك و حظّ موفق في دراستك و حياتك.

__________________________________________________ __________

>>>> الرد الخامس :

السلام عليكم يا أخي الكريم
أنا من جهتي فأرى أنك غير مسؤول بتاتا عن حال تلك الفتاة
فلقد صارحتها بأنك تعتبرها كأخت لك و لم تستغل عواطفها
لذلك لا تشعر أبدا بالذنب أما عن أسلوبك في المعامل حاول أن تغير منه
ليس كله بل فقط طريقة التكلم و التعامل مع الفتيات فهذا سن المراهة
و الفتاة هنا تكون متأثرة بكل ما يدور حولها
حاول فقط أن تعتذر لها و أخبرها عن قصتك (7 سنين)
و ربي يجيب اللي فيه الخير أما على مستقبلها الدراسي فعلى أهلها
أن يقومو بالوقوف معها و توعيتها لا ضربها و .....الخ
كما أضن أن أختها عوض أن تأتي اليك و تأنبك كان يجب عليها أن
تتكلم مع أختها فهي أعقل منها مادامها تدرس في الجامعة
في الأخير ربي يوفقك و ماتلومش روحك وما تخليش صلاتك
و أدعيلها ربي يهديها و انشاالله ربي يكملك في قصتك
تقبل مروري أخي الكريم
تحياتي