عائلة زوجتي

عنوان الموضوع : عائلة زوجتي
مقدم من طرف منتديات العندليب

عندي شهرين من تزوجت

الحمد لله الحالة المادية جيده و بداري

نشرحلكم وضعيتي حتى تفهمو انا عندي بيت في عماره و مقابل لمنزل زوجتي كنت نجي للدار نطل عليها و نروح لبيت
العائلة حتى شفتها و تزوجنا و الحمد لله نعمه المراة

المشكل الان كل ما نرجع للدار لازم نلقى واحد من عايلتها بحكم انو جيران ما لقيتش راحتي نهائيا

انا منيش ضد عايلتها بالعكس سمحت لها تقعد معاهم او يجو عندي فقط كي منكونش في الدار

لكن الوضع زاد عن حدو كل شوي يطبطب عليا واحد نجي في الغدا كاين واحد يتغدى في العشا نفس الشيء

و صلت بيهم حتى يباتو معايا في الدار لانو عندي 2 كليماتيزور

و بحكم حالتي المادية الجيده و حالتهم المتوسطة ولات تبعثلهم الماكلة اتخيلو انا نجيب الفاكيه منا و هوما يجو يشاركوني فيها

قلت لها معجبنيش الحال هكا قاتلي ما نقدرش نحاوز دارنا و انا ثاني حشام و ما نقدرش نقلهم ما تجوش

راني نفكر نبيعها و نشري في بلاصه اخرى بصح نبيع نشري بدون سبب الاكيد الكل راح يتسائل


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكم
بما انك صارحت زوجتك وتحججت بانهم اهلها وذلك صحيح فهي لا تستطيع بصريح العبارة ان تقل لهم الا ياتوا عندها ..... وحتى انت تخجل منهم كذلك وهم ما حبوش يفهموا ارواحهم ....................... ومن حقك الشعور بذلك والحل هو الذي فكرت فيه ايها الاخ ... والاسباب كثيرة ............ وربي معاك

__________________________________________________ __________

>>>> الرد الثاني :

اولا يا اخى ابارك لك على الزواج ربي يوفقك ويباركلك في زوجتك ودارك اللهم امين
ثانيا قالك فاما بنعمة ربك فحدث ولذلك احييك اخى انك اعترفت ان زوجتك ماشاء الله امراة صالحة وراك راضي عليها وراضية عليك ان شاء الله يعنى والحمد لله هى بداية جيدة وبالحمد تدوم النعم
حاولت نبدالك هذه البداية للتقليص من حجم المشكلة
يعنى نقولك ان المشكلة ماشي كبيرة باذن الله اذن متزيدلهاش حجم فوق حجمها لان اهم شئ في الحياة الزوجية رضا الطرفين والاتفاق بينهما وزيد الاستقلالية وانتم الحمد لله هذا متوفر ربي يبارك
الان الجزء الوحيد اللى منغص عليك حياتك ولا حياة دون مشاكل هى تدخل اهل الزوجة في حياتك وهذا منطق مدام ساكنين في نفس المنطقة
في البداية نقولك لازم عدم الاستعجال بالانتقال من بيتك
ثانيا حاول متكبرهاش في راسك وتوسع صدرك قدر المستطاع وهذا راح يحضرك للخطوة القادمة اللى راح نقولك عليها
الخطوة القادمة هى المواجهة
كيف
شوف هناك نقطتين اول نقطة تفرض وجودك امام زوجتك واستخدم حكمتك في ذلك يعنى دون عياط ومشاكل ووو لا تنغص على نفسك وتنكد عليك وعليها
انما اشرحلها باسلوب سلس مفهوم اثناء الحوار انك منزعج مما يحدث
بمعنى قل لها لست ضد انها تزور بيت اهلها او يزوروها لكن ماشي هكذا دايما ودون سابق انذار
هى تزور بيتهم في اوقات محددة كمثال نهاية الاسبوع او اسبوعين ولازم تلتزم بذلك
قلها ممنوع تفتح بابها في غيابك لاى مخلوق الا باذنك ولو بالهاتف وللضرورة القصوى وشدد في ذلك باش تفهم انك حازم في هذه الامور وتخاف على بيتها
النقطة الثانية تكون حازم مع اهلها كيف
يعنى متفتحش العين وتبان مرخوف وحشمان ومنعدم الشخصية حتى يطلعو فوق راسك
خليك شديد لكن بكل احترام وادب
يعنى عن طريق زوجتك هى تقوللهم زوجي ميحبنيش نحل الباب لاى مخلوق في غيابه ومحرس عليا وو
اذا شفت انو هذى الخطوات صعيبة عليك وحشمت من نسابك عندك حل اخر تدى زوجتك لبيتكم احيانا اثناء غيابك يعنى دار عجوزتها منها يتوانسو ومنها يتعودو اهلها على غيابها وميعرفوش مواعيد وجودها في البيت
اما اذا استحالت عليك كامل الطرق وكثرو عليك وانت شفت روحك متقدرش تتحمل ابتعد احسن وشوف بيت اخر اضمن لاستقرار بيتك ولراحتكما النفسية ولتجنب الخلافات والمشاكل
لكن في نفس الوقت راجع نفسك يا اخى اذا كانو يزوروها مرة على مرة وميكثروش وكانت ترسللهم مرة على مرة حلويات او فواكه وشفت روحك عايش في المعقول وقادر تصبر اعتبرها صدقة ومليحة ليك وتحمل في وجه زوجتك
المهم اهم شئ شوف طاقتك لا تحمل نفسك فوق طاقتها وحافظ على استقرار بيتك
موفق

__________________________________________________ __________

>>>> الرد الثالث :

اصنع لنفسك شخصية

__________________________________________________ __________

>>>> الرد الرابع :

السلام عليكم ورحمة الله وبركاته
اولا مبروك الزواج و إن شاء الله لعقوبة للذري الصالحة خويا روح غير بلعقل راك في أول الشوار بصح هذا ميمنعش باه تعلقى حل غير بالتي هي أحسن.متبيعش دارك خاطر متعرف واش راح تلقى كترحل بلاك تلقى نوع آخر من منغصات العيش تولي تقول واش اداني انا في رأيي تهدر مع زوجتك و فهمها بلي لازم هي توضع حد لهذه الزيارات المتعدده ولازم تورلها بلي مهوش عاجبك الحال .صح مذابينا نحسن للناس لي معندهمش بصح مشي على حساب خراب بيوتنا أنا نظن بلي هي من قوت راهي فرحانه بمستوى المعيشه تحب تزيخ شويه على أقاربها بغير قصد يعني تعرضهم وتحط الفاكيه وذيك و ذيك والناس معدتش تحشم والمسألهمرهيش رايحة تحبس هنا بلاك يولو يدوزنو القدره من عندها alorsإعملك همه وكن صريح و ضريف وابدا بزوجتك وهوما من بعد لكن حذاري بضرافة مشي بدواس .لا حول ولا قوة إلا بالله. قالك إذا لم تستحي فافعل ما شئت.

__________________________________________________ __________

>>>> الرد الخامس :

يا أخي انت في خير كبير اعتبرهم فقراء واصلح نيتك واجعلها صدقة تخيل ان عائلتك فقيرة هل ترسل اليهم الأكل ام تغير السكن كبر قلبك وبارك الله فيك