مساعدة بسيطة من فضلكم لتربية طفلك
عنوان الموضوع : مساعدة بسيطة من فضلكم لتربية طفلك
مقدم من طرف منتديات العندليب
السلام عليكم
دعوة الى الامهات المجربات حتى يساعدوني
حابة نعرف واش يعملو للولد اللي رايح يتختن
مثلا ...كاين اللي يقولو يشربوه سيرو النوم حتى مايحس بالالم
واحتياطات اخرى لكن تكون صحية
ارجو ان تفيدوني بعض من تجاربكم اخواتي.....على خاطر راح نختن لولدي وهو بسلامتو راسو خشين ويكثر العياط
انا في انتظار ردودكم اخواتي واخواني
شكككككككرا جزيلا
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
مرحبا شوشو عاش من شافك ههههههههه
ماتخافي ماوالو ختنيه وخلاص وما تديريلو والو فقط اذا سخن اعطيه سيرو الحمى ولا اسبيجيك وخلاص
لكن لازم تبحثو عن ختان يكون شاطر وخلاص باش يخدمو مليح ومايعذبوش بزاف
انا ختنت وليدي في 13رمضان على ما اعتقد وعادي مادرتلو والو اداوه للبلوك طهرو طبيب مخدر خدمو مشاء الله رجع وليدي للدار يمشي وحدو وساكت مابكى ماوالو ولازم غير تجيبيه خليه ساعة ونحيلو الكومبراس اللي يحطوها له باش ما تلصقش على لحمو وديري زبدة في الحفاظة ولبسيه وديريلو الحنة ممزوجة بماء الورد او الزهر وخلي الطفل يريح طيبيلو الكبدة وغليلو البيض
هي او استطيار للماء اي حشاك اول بولة يبولها تحرقو بزااااف ويبكي ومن بعد تبدا تخف ومادرتلو لا اليوزين ولا حتى دواء فقط الزبدة وبعد اسبوع حممتو عادي وحذاري تعرضيه للهوا البارد مثل المكيف وهو دون حفاظة
واذا ماحبش الحفاظة خليه كي يرقد لبسيهالو لازم هي اللي تبريه بسرعة وماتخليهش يعطب روحه واول ليلة لازم ماترقديش لانو راح يبات ينازع ويتخلع وممكن يدي يدو لحجرو ويعطب روحو لازم تعسيه مليح واي سؤال اخر راني في الخدمة والف الف مبروووك
__________________________________________________ __________
>>>> الرد الثاني :
ربي يفتح عليك حنونتي
دائما حاضرة مشكووورة
قالونا على طبيب جراح فالمستشفى يخدم مليح
فكرتيني .....تاني قالولي نديرلو شميعات كلوفينال تع السطر
واش رايك حنونتي
__________________________________________________ __________
>>>> الرد الثالث :
ماتديريلو والو لاشميعات لاوالو كما قلتلك راها عملية بسيطة جدا والحنة هي اللي تنحي الحمى وحتى اذا سخن بزاف شربيلو السيرو وخلاص
__________________________________________________ __________
>>>> الرد الرابع :
اسمحيلي حنونتي كثثرت عليك
اشرحيلي الحنة وماء الورد كفاش نديرهملو
__________________________________________________ __________
>>>> الرد الخامس :
شوشو عزيزتي دقي الحنة اشريها ورق حنا نقولولها لحنة الورقية اشريها من عند العشاب ودقيها رطبيها ورونيها او لميها بماء الزهر لانه يخفظ درجة الحرارة وخليها تتنقع ساعة وديريهالو بلاما تحزميلو خليها تنشف في الهوا تاع الغرفة اذا كان محموم راح تنشف ليه ليه وخليه يرقد واذا بعد ساعة لاحظتي انو الحن نشفت شوية جيبي كذالك ماء الزهر وغطسي صباعك واطلي الحنة
ماء الزهر اللي نعملو بيه القاطو نورمال
وراني في الخدمة ماتكسريش راسك نوريلك كل شي جامي نتقلق منك راكم خواتاتي وانا احبكم في الله انت ولبنات في قسم الدردشة
