الفحمة او حبس النفس للاطفال تربية الطفل
عنوان الموضوع : الفحمة او حبس النفس للاطفال تربية الطفل
مقدم من طرف منتديات العندليب
السلام عليكم ورحمة الله تعالى وبركاته :الله يجازيكم عاونوني انا ابني كي يغيضو الحال ويبكي يفحم يروحلو النفو خلاص نقول مات من بعد يرجعلو رحت للعديد من الاطباء كل واحد كيفاه يقولي طبيب الطفال يقولي عادي يكبر تتنحالو ويقولي ماهوش مريض هي حالة عادية يمرو بها بعض الاطفال اما اطباء الراس واعصاب دارولي الراديو وقالولي مريض لازم ياكل دواء الديباكين اي عندو مرض الصرع والله راني حايرة ابني كل شيء فيه عادي الراديو قالي طبيب الاطفال لازم ديريهلو بعد 15 يوم ملي حبسلو النفس اخر مرة يعني راهو غالط مافهمت والو مش حابة ابني ياكل الديباكين الله يجازيكم عاونوني
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
يا اختى انا حسب معلوماتى طفل كى يكون صغير اقل من 14 سنة ما يعالجو حتى طبيب غير طبيب الاطفال فى اى مرض .قاتلى وحدة طبيبة اختصاص ORLرانا نضرو ولادكم كى نداويوهم ما قريناش عليهم وطرق العلاج تختلف من الصغير الى الكبير.فى اى مرض والطفل اختصاص pediatrie
انا من رايى تبعى طبيب الاطفال وربى يجيب الشفاء
__________________________________________________ __________
>>>> الرد الثاني :
عندك الحق أختي أم مهدي
يا اختي ابنك مثل معظم الأطفال يفحم
عندي بنت أختي مشاء الله عليها العين زرقا و الوجه تقول قمر تبارك الله
بصح انهار تفحم و إلا تغيضها روحها على حاجة و الله العظيم غير تتبدل تقول ولات عبد أخر
تولي سوداء اللون من الفحمة و تروحلها النفس و تبقا واقفة و فمها مفتوح بدون صوت
و الله غير أمها تخلع و رجليها ما يهزهاش .
بصح غير ترجعلها النفس خلاص يرجع لونها و تبكي عادي.
و نزيد نقلك حاجة كي يفحم الطفل أقصى حاجة راح تصرالو إنه يتغاشى و السبب
نق الأكسجين عن المخ و بعد الإغماء سيتنفس عادي و يصحو الطفل لاباس عليه
أقصد من كل هذا عندك لا تعطي لولدك دوا ممكن يضرو و هو مش مريض .
و ربي يخليلك ابنك و إن شاء الله تروحلو هاذي الفحمة .
__________________________________________________ __________
>>>> الرد الثالث :
اختي ولدك ماشي مريض كاين ولاد يفحمو يعني يقطعو النفس انت انسفي في وجهو ولا سدي نيفو بصباعك وطلقي ليه ليه باه يتخلع ويعاود يرد النفس وحدو لأن الفحمة فعل إرادي من الطفل سواء كي يبكي من حاجة وجعتو أو يغضب
__________________________________________________ __________
>>>> الرد الرابع :
الله يجازيكم خوتاتي ادعيولو بالشفاء
__________________________________________________ __________
>>>> الرد الخامس :
اختى ولدك راهو ماشى مريض وانا بنتى صراتلها كيفو كى قريت واش كتبتي تقول حكيتي على بنتى وانا تانى ديتها لبزاف طبا و حمد الله راهى براتلى وانا كى مالقيتش دوا ليها قالولى اديها لوحد الشيخ يعافى لولاد صغار مع شفها والله بلا مازال ماقتلو والو قالى بنت عندها الحرنة و تفحم و قالى هدا يديرلهم من العين والله من نهار عافاها تقولى تكدب اختى ادي ولدك عافيه من العين يولى ان شاء الله لباس
