لو كنتى رايحة الجامعة ادخلى ازياء عصرية
عنوان الموضوع : لو كنتى رايحة الجامعة ادخلى ازياء عصرية
مقدم من طرف منتديات العندليب
لو كنتى رايحة الجامعة ادخلى
ازاي أختار لبسي؟ وهل اللبس ده مناسب ولا لأ؟ ياترى هيكون شيك ولا لأ؟ ياترى فيه حد هيكون أشيك مني في الجامعة؟؟ أكيد كل الأسئلة دي وغيرها بتدور في ذهنك علشان كده هاقول لك على شوية نصائح أساسية تحطيهم قدامك وإنتِ بتختاري لبسك وهي:
النصيحة الأولى
الأناقة في البساطة
القاعدة الأساسية اللي تحطيها قدامك إن ألف باء شياكة هي البساطة وإنك علشان تكوني أنيقة وشيك لازم تكوني بسيطة جدا في لبسك.... وعلشان تحققي ده يبقى لازم تبعدي نهائيا عن الملابس الرسمية والملابس اللي فيها تطريز كتير... لأنها مش بتناسب الجامعة.
وكمان خدي بالك إنه مش شرط أبدا إنك تشتري حاجات غالية علشان تكوني شيك بل على العكس فيه حاجات رخيصة وشيك جدا.
النصيحة التانية
الملابس العملية والمريحة
ياريت تحاولي إنك تختاري الملابس العملية اللي تساعدك على الحركة براحتك في الجامعة أو في المواصلات والملابس العملية المريحة دي زي بنطلون قماش أو جينز وبلوزة أو جيبة واسعة وبلوزة..
كمان خدي بالك من نوع القماش ياريت إنك تختاري الملابس اللي بيكون قماشها قطن أو كتان، وابعدي نهائيا عن الأقمشة اللي بتكون مصنوعة من البلوستر لأنها بتكون مضرة جدا للبشرة خاصة لو كانت بشرتك من النوع الحساس.
النصيحة التالثة
ماتجريش وراء الموضة
ودي أهم حاجة إنك ماتجريش ورا الموضة وتختاري الملابس اللي مناسبة ليكِ ولشخصيتك ولطبيعة جسمك يعني مش معقول علشان الموضة الملابس الضيقة إنك تلبسي الملابس الضيقة بالرغم من إنها مش مناسبة ليكِ.
كمان اختاري الألوان المناسبة للون بشرتك، يعني لو كنتِ صاحبة بشرة بيضاء هتلاقي إن كل الألوان مناسبة جدا عليكِ، ولو كنتِ صاحبة بشرة خمرية أو سمراء يبقى ياريت إنك تبعدي في اختيارك للألوان الغامقة.
النصيحة الرابعة
ملابسك بتدل على شخصيتك
دي نقطة مهمة جدا لازم تكوني عارفاها وهي إن ملابسك بتدي انطباع عنك عند الآخرين علشان كده ياريت إنك ماتحاوليش إنك تقلدي حد في لبسه ويكون عندك شخصيتك المستقلة في اختيار ملابسك.
وخدي بالك إن في الجامعة آه صحيح فيها حرية في اللبس بس مش معنى كده إنك تروحي مثلا لابسه جيب قصيرة أو ملابس لافتة للنظر لأن بصراحة الملابس اللي زي دي هتدي انطباع سيئ عنك عند زمايلك.
حاجة أخيرة
لو كنتِ محجبة
1- اختاري الإيشاربات اللي بيكون قماشها قطن أو شيفون بس يكون الشيفون من غير لمعة لأن الأقمشة دي بالذات هتلاقيها مريحة جدا وعملية في اللبس وكمان بتستحمل الحركة طول النهار.
2- خدي بالك إنك لو هتختاري الإيشاربات اللي فيها تطريز إنك تختاري التطريز الخفيف البسيط علشان تناسب فترة الصبح والجامعة...
3- كمان خدي بالك إن ألوان الإيشاربات تكون مناسبة جدا وماشية على هدومك وعلى لون بشرتك..
لو مش محجبة
حاولي إنك تختاري تسريحات الشعر البسيطة اللي تناسب الجامعة يعني مش معقول إنك تروحي الجامعة وإنتِ فاكة شعرك علشان كده ياريت إنك تعمليه ديل حصان أو ضفيرة...
بالنسبة للميك أب
لو بتحطي مكياج لازم تحطي فى اعتبارك إنك رايحة الجامعة مش رايحة سهرة علشان كده ياريت إن مكياجك يكون بسيط قوي وفي منتهى الرقة، يعني كفاية إنك تحطي روج على خفيف وكحل..
كمان خدي بالك إنه مش من الإتيكيت نهائي إنك تحطي مكياج في وسائل المواصلات أو في قلب المحاضرة لأن حاجة زي دي بتدي انطباع سيئ عنك عند الناس.
ملطوش
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
ميرسى كتير حبيبتى على نصائح غاليه
__________________________________________________ __________
>>>> الرد الثاني :
ميرسى ليكى على مرورك وردك
نوووووورتى
__________________________________________________ __________
>>>> الرد الثالث :
مشكوررهـ على النصائح الرائعــــه
__________________________________________________ __________
>>>> الرد الرابع :
ـألـسَـلآمٍ عـَلـيـكُـمٍ و رحـمَـة ـألـلـَّـه و بـَركـآتـُـه
معلومات مهمه
الله يعطيكي العافيه
__________________________________________________ __________
