شكون ليعرف شوربة فريك بالخضرة؟ المطبخ الجزائري

عنوان الموضوع : شكون ليعرف شوربة فريك بالخضرة؟ المطبخ الجزائري
مقدم من طرف منتديات العندليب

السلام عليكم
واحد المرة كليت كليت في العرس شوربة فريك مليحة بزاف بصح بانتلي كلي راه مرحية فيها خضرة جات عاقدة كيما نديرو البيون، ماعلابليش بالضبط كيفاش تندار هذه الشربة علاهذا راني نسقسي فيكم يالحراير كشما تعرفوا الوصفة مدوهالي حابة نجربها. أنتظر الرد على أحر من الجمر


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

هذه طريقتي في تحضيرها.نقلي اطراف دجاج او من المستحسن لحم غنمي مع بصلة مفرومة في شوية زيت وسمن .نتركه يتقلى على نار هادئة.في مهراس نهرس نصف ربطة حشيش مع ملح وفلفل اسود وقرفة نتره يتقلى مع الحم نضيف 2حبات طماطم مرحيين حبة جزر وحبة قرعة وحبة بطاطا نمرق نضيف الحمص والطماطم المصبرة نتركه تطهى .ننزع الخضار ونرحيها برحاية الخضرة اليدوية ونعيدها للشربة نضيف الفريك وحزمة الحشيش الباقية وشهية طيبة

__________________________________________________ __________

>>>> الرد الثاني :

اهلا عزيزتي انا نحط قطع لحم من الاحسن غنمي مع حبة بصل مقطعة و اضع حبة طماطم كبيرة مع زرودية و حبة بطاطا متوسطة و اضع 2 حبات قرع متوسطين و نزيد الحمص و ربطة قصبر مربوطة كي تطيب الخضر تنزعيها و اضيف 2 ملاعق كبيرة طماطم مصبرة و شوية حمص و طبعا ملح و فلفل اسود و راس الحانوت و اخيرا نضيف الماء كما تلاحظين ما قليت والو و من بعد كي يطيب اللحم ارحي الخضر في ميكسور و ارجعيها مع المرق و بالطبع اذا نقص شىء اضيفي مع اضافة الماء الساخن اذا نقص ثم زيدي الفريك و اتركيه يطيب مع اضافة القصبر المرحي و اذا حبيتي اضيفى 2 فصوص ثوم مرحي و الله تجي روعة و كل من ياكل الحريرة انتاعي يرجع لي باه نعطيه الوصفة موفقة اختي الكريمة

__________________________________________________ __________

>>>> الرد الثالث :

شكرا منى2004 وBachira2 على مساعدتكم لي في التعريف بهذا الطبق الذي أعتقد أنه عاصمي بالدرجة الأولى. حنا في قسنطينة ما نحطوش الخضرة للجاري أي شربة الفريك بصح نقولكم الحق أنا كي كليتها في هذا العرس عجبتني خير على الوصفة أنتاعنا . إن شاء نجربها ونعملها من الآن فصاعدا حسب الوصفة العاصمية المهم كلها وصفات من بلادنا العزيزة.

__________________________________________________ __________

>>>> الرد الرابع :

اختي الشربة تاع الفريك الاصلية عمرها مانديرو فيها الخضرة تجي بلحم غنمي تحطي عليه ( البصل والثوم والطماطم حب والدبشة ترحيهم في الميكسور ) وتزيدي الطماطم تاع العلب والزيت فلفل اكحل والعكري وراس الحانوت بلاكي ديري القرفة والكمون و فلفل حار طبعا للي يحب الحار الكل يتقلاو مليح اكثر من ربع ساعة وتزيدي الماء لازم يكون سخون شوي بشوي وكل مرة يقلبي مليح المزيج حتى تمرقي القدرة انتاعك وتم ترمي الفريك وتقفلي القدرة انا نطيب الشربة في الكوكوت تجي خير وكيطيب الشربة تلقايها خاثرة زيدي ذري عليها النعناع اما يابس او خضر والحشيش طبعا

__________________________________________________ __________

>>>> الرد الخامس :

المشاركة الأصلية كتبت بواسطة أم ياسين الزهراء https://3andlib.xplainer.net/images/...s/viewpost.gif اختي الشربة تاع الفريك الاصلية عمرها مانديرو فيها الخضرة تجي بلحم غنمي تحطي عليه ( البصل والثوم والطماطم حب والدبشة ترحيهم في الميكسور ) وتزيدي الطماطم تاع العلب والزيت فلفل اكحل والعكري وراس الحانوت بلاكي ديري القرفة والكمون و فلفل حار طبعا للي يحب الحار الكل يتقلاو مليح اكثر من ربع ساعة وتزيدي الماء لازم يكون سخون شوي بشوي وكل مرة يقلبي مليح المزيج حتى تمرقي القدرة انتاعك وتم ترمي الفريك وتقفلي القدرة انا نطيب الشربة في الكوكوت تجي خير وكيطيب الشربة تلقايها خاثرة زيدي ذري عليها النعناع اما يابس او خضر والحشيش طبعا

نحن ايضا نطهو الشربة هكذا بدون خضر و تجي عاقدة ( نرحي في الميكسور ) و لازم تتركها على نار هادئة حوالي ساعة ونصف و يجب ان تعرفي المقادير مثلا فنجان حليب من الفريك يعمل 4 صحون فقدري اللحم و البصل و الطماطم على حساب هذه الكمية , اضيفي الماء الساخن دفعة واحدة كي تمرقي و اتركيه حتى يختار