الكسرة نتاع منطقتنا تشبه للخبز العربي نوعا ما طبق جزائري
عنوان الموضوع : الكسرة نتاع منطقتنا تشبه للخبز العربي نوعا ما طبق جزائري
مقدم من طرف منتديات العندليب
السّلام عليكم أحبتي كيف حالكن
الحقيقة هادي أوّل مرة نشارك بموضوع في قسم الطبخ والسبب أني ماقدرتش نطلع الصور للميكرو وموضوع بلا صور يجيني لاعلاقة ، لكن اليوم تشجعت وقلت ماعليش نحطو وأمري لله
الشي اللي لاحظتو أنوّ كسرتنا ماشي مشهورة بزّاف ماشي كيما المطلوع هي تشبه للخبز العربي بصّح أحسن منّو من وجهة نظري طبعا ، على هاديك قلت نعرفكم شوية بيها ونستعين بصور من موضوع الأخ العضو المحترم من قسم الثقافة المحلية
نبداو بالمقادير بسيطة وتختلف من دار لأخرى في المنطقة اللي نسكن فيها ، بومرداس
حنا نديرو كيلة سميد رطب بزوج كيلات فرينة مع خميرة الكسرة عينك ميزانك على حساب الكمية والفصل والخميرة إذا جديدة ولاّ عندها مدّة ، نلمّو العجين بماء دافي ماشي يابس وماشي طري يعني وسط ونعجنوه ، أنا في الأوّل كنت نعجنو بزّاف ممبعد ولّيت نديرو في كيس مشمّخ نخلّيه يريّح شوية كي نرجع ليه نلقاه ولاّ هايل والفضل طبعا للأخت الوهرانية ربي يجازيها خيرا ، المهم بعد مانعجنوه نديرولو الملح أنا نحّي قرصات مسوسين قبل وإيدا ماعندكمش اللي ياكل المسوس ديرو الملح ديراكت زيدو أعجنوه شوية وممبعد خلّوه يريّح قيس ماتفرشو منديل كبير نتاع الكسرة ونسيرو فوقو سميد رطب ونبداو نقرصو الخبزات ونحطّوهم فوق المنديل حتى نكملو العجين كامل ، وممبعد نقرصو بالزوج قرصات نحطّو قرصة ونديرو فوقها السميد بزّاف باش ماتلصقش مع أختها ونزيدو وحدة فوقها ونقرصوهم مع بعض ونكونو فرشنالهم فوق طاولة ورشّينا فوق قطعة القماش شوية سميد ونحطوهم بجنب بعضاهم شوية بعاد باش مايلصقوش وممبعد نغطوهم ونخلّوهم يخمرو حتى نشوفوهم طلعو ورفدو غطاهم ونطيبوهم ، زمان كنا نطيبوهم في كوشة نتاع التراب بصّح صعيبة سيرتو في الشتا مي دكّا ولّينا نطيبو في نتاع الحديد وبغاز المدينة للأسف ماقدرتش نصورهالكم نخدموها عند الحدّادين وهي عمليّة نطيبو فيها بالزوج خبزات بالخف نكملوه
https://www11.0zz0.com/2016/03/16/20/237052781.jpg وهاهي صورة الكوشة نتاع التراب https://www10.0zz0.com/2016/03/16/20/724879761.jpgوهاهو الرابطwww.djelfa.info/vb نتاع الموضوع اللي جبت منو الصور وهي نفس كسرتنا وتشبهها تماما في الشكل الوصفة لاأعلم /showthread.php?t=900002
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
merciiiiiiiiiiiiiii
__________________________________________________ __________
>>>> الرد الثاني :
يعطيك الصحة ، باين يهبل
ماكنتش نعرف باللي كاين مناطق في بلادنا يعملو هذا النوع
تعودنا غير على الرخسيس والمطلوعة
سخفتييييني ، ابعثيلي 20 وحدة هههههه
تسلم الايادي
__________________________________________________ __________
>>>> الرد الثالث :
باينة روعة جزاك الله خيرا
__________________________________________________ __________
>>>> الرد الرابع :
باركة الله فيك خبز و عليه لكلام
__________________________________________________ __________
>>>> الرد الخامس :
رائع وحابة نجربو درك مي راح الحال
