الشخشوخة المسيلية على أصولها بالخطوات المصورة من مطبخي راكم معروضين طبخ جزائري

عنوان الموضوع : الشخشوخة المسيلية على أصولها بالخطوات المصورة من مطبخي راكم معروضين طبخ جزائري
مقدم من طرف منتديات العندليب

السلام عليكن حبيباتي
اليوم بإذن نديرلكم طريقة عمل الشخشوخة المسيلية على أصولها بالمراحل المصورة
طبعا كاين عدة أنواع من الشخشوخة الي تتغلى و لي تتسقى و شخشوخة القمح و كاين تاع الرغدة أوالشعير هاذو بالنسبة لولاية المسيلة
اليوم راح نعمللكم شخشوخة المريش و هاذي لي تتسقى بالمرق نعملوها في المناسبات الدينية أو في الأعراس
مقادير العجين : دقيق رطب من النوع الجيد لي يكون فيه العلك +كمشة فرينة +ملح +ماء أعجني و أدلكي كيما عجين المحاجب و خليه يرتاح

https://im31.gulfup.com/ldk9X.jpg

ممبعد قطعيه كويرات صغيرة قد حبة الجوز خطرش رايحين نديرو ب 2 طبعا إستعملي الزيت ... في الصورة يبانو كبار بصح هما صغار و أطلقوا كي إرتاحوو

https://im31.gulfup.com/Cimeq.jpg

هنا تبداي حطي الطاجين يسخن على نار هادئة
حطي كويرتين فوق بعض و ديري بيناتهم الزيت و أبداي تحلي رقيق وهزيها حطيها فوق الطاجين و غير تشوفيها نشفت أقلبيها رايحة تنتفخ شوفي

https://im31.gulfup.com/qbO5w.jpg

https://im31.gulfup.com/48Ja1.jpg
و غير تشوفيها نشفت ثواني فقط أقلبيها رايحة تنتفخ شوفي


https://im31.gulfup.com/JRLUc.jpg

https://im31.gulfup.com/f9qDV.jpg
و تقعدي تقلبي حتى تشوفيها طابت مالازمش تتحرق أو تيبس


https://im31.gulfup.com/yn38I.jpg

هنا هزيتها باش يطيبو الجواشي ممبعد نحيها و حطي أخرى طيب و هكذا

https://im31.gulfup.com/c3SVL.jpg


طبعا لي طيبيها لازم تفتيها بسرعة باش ماتبسش ممبعد تجيك صعيبة المهم لازمك اتقرصي القرصة و طيبيها و تفتيها في نفس الوقت وإذا عندك البنات أو لي يعاونك نقولك ياسعدك هههه أعطيهم يفتولك
https://im31.gulfup.com/miWaB.jpg

https://im32.gulfup.com/hX22w.jpg
نجو للمرق ساهل ماهل :
نحتاجو قطع لحم أو دجاج
بصل كمية مليحة وكل ماكان المرق بزاف كل مانزيدو البصل بزاف و أنا عائلة صغيرة عملت 3 بصلات متوسطين و 3 سنات كبار ثوم المهم هي تحب البصل بزاف
2 حبات طماطم حب مرحية
القليل من الشحم أنا مادرتوش راجلي مايحبش حتى يشوفو بصح يمد بنة هايلة
قليل من الزيت، ملح. ملعقة أكل فلفل أحمر مرحي و لي يحب الحار يزيد
لفاح و هو كسبر حب مرحي متبل فيه بزاف حوايج أخرين تخدمو أمي
قطعة صغيرة سكر أو ملعقة قهوة باش يوزن حموظة الطماطم
حمص ، طماطم علب ، كسبر أخضر و فلفل أخضر


https://im32.gulfup.com/JKM3W.jpg

https://im32.gulfup.com/1sLx3.jpg

نرحي البصل و الثوم و الطماطم الحب و نفرغ على اللحم +نحط التوابل ملعقة فلفل أحمر +ملعقة لفاح +ملح +سكر+الشحم +الحمص +شوية زيت+طماطم علب+و نحمص كلشي مليح مليح تم نمرق و ندير قليل من الحشيش مقطع و نغلق الكوكوطة تطيب حتى يطيب اللحم

https://im32.gulfup.com/EKouK.jpg

https://im32.gulfup.com/GsL6k.jpg

https://im32.gulfup.com/d01Qi.jpg

https://im32.gulfup.com/3Cgkn.jpg

ننزع اللحم ثم نعطر المرق بملعقة لفاح أو الكسبر المرحي و نزيد الحشيش و الفلفل الأخضر نشقه و نرميه في المرق و هذه هي مرقتنا وجدت

https://im32.gulfup.com/oInAT.jpg

https://im32.gulfup.com/b3euL.jpg

https://im32.gulfup.com/bDGhg.jpg

https://im33.gulfup.com/rZJ8g.jpg

أنا هنا خدمت اللفتات أو الرقاق أو الشواط نهار من قبل فلازم نفوره شوية فقط قيس ممايسخن خطرش يتعجن و نغطيه

https://im33.gulfup.com/LVjMc.jpg


نجو لطريقة التقديم
نجيبو قصعة أو طبسي عريض نحط قليل من المرق و نحط فوقه القليل من الرقاق ثم نسقيه بالمرق ثم نحط الرقاق ثم نزيد نسقيه و هكذا حتى نكمل و نعمر الطبسي نزين بالحمص و الدبشة و الفلفل المقطع و اللحم و نقدمه مباشرة مالازمش يقعد مدة طويلة خطرش يبرد و ينشف و تروح بنتو

https://im33.gulfup.com/P0RGM.jpg

https://im33.gulfup.com/uaqtU.jpg

https://im33.gulfup.com/q2htx.jpg

https://im33.gulfup.com/vstH2.jpg

https://im33.gulfup.com/9VPjz.jpg
و راكم معروضين أتفضلو حبيباتي
حقى أحنا الدبشة فوق الشخشوخة لااااااااااااازم يعني لي يحطلك شخشوخة بلا حشيش كلي ماحطلك والو
و نحب نشكر بزااااف أم كوثر على االتثبيت يااااااااااي


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يعطيط الصحة ام انس اطباقك في القمة والله في وقتها مع هذا البرد وحظ موفق في المسابقة

__________________________________________________ __________

>>>> الرد الثاني :

ماشاء الله حنونة نفس طريقة اختي دات عليكم طريقة يامسيليات ممممممممممم

__________________________________________________ __________

>>>> الرد الثالث :

يم يم الصور تحكي وحدها ربي يخليك اختى ام انس
تشهي اللهه يبارك

__________________________________________________ __________

>>>> الرد الرابع :

اااام تهبل ضقتها من قبل دارتهالنا مرت خالي مسيلية تهبل بصح تشوي حااااااااااااارة
يعطيك الصحة وبارك الله فيك

__________________________________________________ __________

>>>> الرد الخامس :

يعطيك الصحة و بركة الله فيك نستنى الشرح عجبتني روعة