اعتطولنا نصائح للغات الاجنبية باك ادبي

عنوان الموضوع : اعتطولنا نصائح للغات الاجنبية باك ادبي
مقدم من طرف منتديات العندليب

يا جماعة يعني كيفاش نبداو نرجعو حنا بدات لغات..........استنا رد سريع انشاء الله


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكي اختي امال مكانش نصائح خاصة واش لازملك هو انو يكون عندك رصيد كبير من المرادفات كونك تقراي لغات اما المواد الادبية حفاظة برك مع علابالك لازملك تحلي كم كبير من المواضييع والحوليات اما الرياضيات فهي اسهل مادة حاولي كيفاه تفهميها مليييييييييييح وتحلي فيا شوية تمارين ....وحاجة ما فهامتيهاش سييي كيفاش تفهميها سواء من استاذ المادة او زميل/ة يكون شاطر فيها..........هادا ماكان ...وان شاء الله تدي الباك....ونزيدلك حاجة راجعي كل يوم ..والمواد الادبية حولي كيفاش تنوضيلهم بكري ...ان شاااء الله ربي معاااااااااك

=========

>>>> الرد الثاني :

مساء الخير أختي تقدملك تجربتي وهي مفيدةان أردة درسة اللغة الفرنسية في مدرسة خاصة لكن لم أستفد الى القليل رغم أنني درسة جميع المستويات فقمت بالدراسة وحدي ودلك بستعمال مواقع اللغة الموجودة على الانترنت وقرائت القصص وحفظ قواعد اللغة وكتابة كل يوم جملة حتى وجدت روحي أتقن اللغة جيدا أتمنى أنأكون أفدتك https://3andlib.xplainer.net/images/smilies/dj_17.gif

=========

>>>> الرد الثالث :

لازم تراجعي طل المواد ديالك

=========

>>>> الرد الرابع :

السلام عليكم ، أول لازملك الإرادة ، معناه لازم تكوني حابة صح تدي الباك ، راكي حابة تديه ، من قلبك ،
لازم تتخلاي عن مشاهدة التلفاز ، لازم تتخلاي على الجماعة في الثانوية مع البنات اللي يهدرو في الغير مفيد ، حضري جدول توقيت خاص بيك للدراسة في المنزل ، مثلا ، يوم الأحد من 6 مساءا إلى 8 مساءا اللغة الإنجليزية أو مادة أخرى ماتفهميهاش ، من 8 مساءا إلى 10 مساءا فلسفة ، من 10 إلى وقت النوم تحضير المواد اللي تدرسيهم يوم الإثنين و هكذا حضري جدول توقيتك ، أعطي فيه وقت كبير للمواد اللي راكي ضعيفة فيهم و ماتهمليش المواد الأخرى ، أيضا مع الصباح الباكر ، حاولي الإستيقاظ على الساعة السادسة أو الخامسة ، و قومي بحفظ بعض الدروس في الجغرافيا أو التاريخ ، أو الشريعة ، و لما لا بعض المصطلحات الفلسفية ،

خلال هذا البرنامج مثلا مادة الفرنسية في الساعتين المخصصين ليها حاولي أنك تفتحي موضوع باكالوريا ، ترجمي النص بدون كسل أو ملل واكتبي الكلمات اللي ترجمتيهم ، لازم مع الوقت تحفظيهم و هكذا كيما قالت الأخت تقوى الإيمان ، يصبح عندك رصيد كبير من المفردات ، المهم خلال كل ساعتين خصصتيهم لمادة حاولي تفتحي مواضيع بكالويا وهكذا

إذا كنت خصصت للفرنسية 8 ساعات في أسبوع و 8 للإنجليزية و 6 مثلا للإسبانية أو الألمانية هذا يعني 4 مواضيع باكالوريا للفرنسية خلال أسبوع و 16 موضوع خلال شهر و باقي للباك حوالي 6 أشهر واش رايك ، كم عدد المواضيع اللي تكوني فتحتيهم و كم عدد المفردات اللي تكوني حفظتيهم ............في كل مادة من المواد نفس الشيئ مع باقي المواد مثل التاريخ و الجغرافي موضوع في كل ساعة ، تفتحي الموضوع و تحفظي الإجابات و......

أوقات الفراغ في القسم أو أوقات غياب الأساتذة أو وقت مابين الساعات ، حتى هو وقت مهم ، خلال مراجعتك ، ضعي خطوط تحت واش ما فهمتيش و في هذه الأوقات حاولي تسألي الناس اللي معاك و يعرفو ، أو الأساتذة ، و اللي يسأل ماشي عيب ، العيب هو أنك يكون عندك سؤال تخجلي تسألي عليه ، حتى تلقايه في الباك تندمي ، وتقولي لوكان ........

ربما رايحة تقوليلي صعيب البرنامج اللي قلتولك ، و لكن الحقيقة أنو يطبقوه اللي صح عندهم الرغبة باه يدو الباك ، و ما حابينش يعاودو يشوفو أساتذتهم العام الجاي في نفس القسم .

المهم و الأهم و الأهم من المهم المواضبة على البرنامج من الآن إلى يوم الباكالوريا .................و كان الله في عون الجميع

أي استفسار أو مساعدة أنا في الخدمة .......

=========

>>>> الرد الخامس :

يعني ماعنديش كيفاش نعبركم...........بارك الله فيكم على المجهود لراكم تقمو بيه نشكركم بزاف على هدي نصائح وريحا نعمل بها من اليوم انشاء الله منخيبلكمش دني يا رب .........

=========