عرفي أفضل ماركات الماكياج احدث موضة
عنوان الموضوع : عرفي أفضل ماركات الماكياج احدث موضة
مقدم من طرف منتديات العندليب
عرفي أفضل ماركات الماكياج
أحمر الشفاه
أوّل حاجة بالنسبة للروج فيه ماركات كويسة للروج؛ زي ماركة ديور، ودي بيكون فيه منها ليب جلوس، وهو مش لامع أوي، وبيكون فيه ألوان حلوة، وبيدّي شكل حلو أوي وهو مخصّص أكتر للزفاف.
كمان من الماركات الكويسة للروج هي ماركة L'OREAL (لوريال)، وده بيكون مكوّن من جزأين؛ أول جزء بيكون مرطب وده بنحط منه قبل الروج علشان يرطب الشفايف وطبعا بيكون شفاف، والجزء التاني بيكون الروج، وده متوفّر منه ألوان كتيرة زي ما إحنا عايزين، والماركة دي من أكتر الماركات ثباتا بالنسبة للروج، ونقدر نحط منه في كل المناسبات، وده علشان ثباته العالي، كمان علشان سهل إننا نحطه في الشنطة من غير ما نخاف إنه يتفتح مثلا؛ وده لأنه محكم جدا ومش سهل الفتح.
كمان فيه ماركة Shiseido (شيسيدو)، وده بنلاقي منه الألوان الطبيعية القريبة من لون الجسم زي البيج والروز والبينك، علشان الموضة السنة دي إن مظهرنا يكون صحي ووشنا رايق وألوانه صحية ومبهجة.
كمان من أنواع الروج اللي أنا شخصيا بافضلها هو الروج اللي بيكون في باليتة زي ماركة Make up forever ودي بتحتوي على 5 ألوان، وميزتها إنك تقدري تخلطي الألوان اللي إنتي عايزاها بسهولة، علشان توصلي لدرجة معينة.
الحواجب
رسمة الحواجب من أكتر الحاجات اللي بتسبب مشاكل لمعظم البنات؛ وده لأنهم ممكن يستخدموا أقلام رسم الحواجب، وطبعا ده بيسبّب تساقطها، وكمان بيكون شكلها مش طبيعي وبيدّي سن أكبر للبنات.
ومن أكتر الماركات اللي بافضّلها لبودرة الحواجب هي بودرة Body shop، ودي بتكون متوفّرة بلونين، وبتكون مط مافيهاش أي لمعة، ومعاها الفرشة المخصّصة لرسم الحواجب.
أهم حاجة في رسم الحواجب هو إننا ما نرسمهاش من بدايتها وكمان مانرسمهاش بشكل جامد؛ لأنها هتدّي شكل مصطنع أوي وهتخلّي الشكل مش مقبول.
كريم الأساس
من أفضل الماركات لكريم الأساس هي ماركة ميبلين (Maybelline)، وهو سائل وده بانصح بيه البنات اللي مش بيكون عندها مشاكل حقيقية في وشها ومحتاجة تداريها؛ لأنه بيعمل تغطية جيدة للبشرة وبيدي شكل طبيعي جدا ولون موحد للبشرة ومابيعملش طبقات لون على الوش.
كمان فيه أشكال كتير من الفونديشين زي مثلا الفونديشين الموس (mousse foundation)، وده بيكون ملمسه ناعم مش جاف ولا سائل، وبيتوزّع على الوش بسهولة؛ لأن تسييحه سهل، وشكله النهائي بيكون حلو أوي.
فيه كمان ماركة ديرما، وده أنا باستخدمه كمان ككونسيلر تحت العين علشان يداري أي مشكلات موجودة زي الهالات أو غيرها، باحط منه على الوش كله وكمان تحت العين، وبعدين باحط عليه بودرة زي أي كريم أساس.
البودرة
بعد ما نحط كريم الأساس مهما كانت ماركته لازم نحط بعده بودرة علشان مايبقاش شكل وشنا دهني.
ومن أفضل أشكال البودرة هي البودرة السايبة مش المضغوطة، ومن الماركات الكويسة في البودرة ماركة Mac(ماك)، وأنا بافضّل إننا نحط البودرة بالفرشة مش الأسفنجة ونوزّعه على وشنا بالكامل.
أفضل طريقة بنختبر بيها البودرة أو كريم الأساس قبل ما نشتريه هي إننا نجرّبه على وشنا مش على إيدينا؛ لأن دايما لون الإيد مختلف عن لون الوش.
مزيل الماكياج
ماتستهونوش بمزيل الماكياج لأنه مهم جدا، ومن أفضل الأنواع هي Maybelline؛ وده لأنه هادي على البشرة وكمان لو دخل جوه العين مش بيسبب أي مشكلة؛ لأنه مخصّص للعين والبشرة، وكمان مش بيعمل أي مشكلات أو حساسية للبشرة.
بناخد من المزيل ده على قطنة ونمشّي به على وشنا مرتين وبعدين ننشّفه بقطنة ناشفة، وبعدين نغسله في الآخر بأي غسول، لكن لازم نحرص إننا نبعد تماما عن إزالة الماكياج بالغسول على طول.
التونر
من الحاجات المهمة قبل ما نحط الماكياج، إننا نرش وشنا بالتونر؛ وده علشان البشرة ماتشربش الماكياج ويبقى تسييحه أسهل.
دلوقتي هنعرف إزاي نقدر نمسح الماكياج بمزيل الماكياج
هنستخدم مزيل الماكياج على قطنة ونمشي بها على الوش بهدوء من غير ما نضغط على البشرة جامد، وكمان نمسح العين كويس والرموش باستخدام قطن الأذن.
بالله عليكم اللى يستفد يقيم ويرد عليا بليززززززززز
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
انا استفدت من موضوعك
ولك احلى تقيييم
__________________________________________________ __________
>>>> الرد الثاني :
شكرا اختى يعطيكى العافية
__________________________________________________ __________
>>>> الرد الثالث :
مشكووووووره
الله يعطيك الف عافيه
__________________________________________________ __________
>>>> الرد الرابع :
يعطيكي الف عافيه على المعلومات
__________________________________________________ __________
>>>> الرد الخامس :
فعلا موضوعك قيم ومفيد
يعطيك العافيه يالغلا
الف الف الف شكر لك
يقيم
