عنوان الموضوع : **كرات السميد بالزعتر و الفول أكلة تقليدية شتوية تغنيك عن الذهاب للطبيب**
مقدم من طرف منتديات العندليب

السلام عليكم أحبتي الكرام
اليوم جبتلكم هاد الاكلة مشهورة في عائلتنا و الكل يحبها و راهي خصوصا للي ما يحبوش ياكلو الفول يابس مثلي انا و خاوتي ههههه ماما تكلخلنا بهاد الاكلة و أكييييييد كي تعملهالنا ناكلو الفول تاعها لنو حقيقة لذيذة بزاااااف بزااااااااف
و راهي مفيدة لصحة بزاف لانو مكوناتها غنية و أيضا في فصل الشتاء تحميك من الأمراض خصوووصا القريب
و انا صراحة كل نهاية اسبوع نقول لماما اديرهالنا لاني ما نقدرش نستغنى عليها
ههههه راني غير نهدر طولت ندخلو فالوصفة انا ايلا بديت نهدر ما نكملش هدرة
المقادير:
للكرات نحتاج:
كمشة صغيرة نعناع يابس
كمشة صغيرة نابطة (ممكن تستغناي عليها)
كمشة صغيرة زعتر
كمشة صغيرة فليو
نحمصهم في مقلة على نار قليلة ثم نرحيهم مليح و نضيفلهم:
رأس الحانوت
فلفل عكري و شوية فلفل أسود و كمون و ملح و 5 سنات ثوم رابي و فنجال ىتاي زيت
2 كؤوس كبار سميد و نخلطهم مليح ثم نبدا نبلل فيهم بالماء حتى يولي يتلم و نقدر نشكل كريات
ثم نشكل كريات مثل ما راه موضح فالصور و نديرهم يفورو في كسكاس كيما نفورو الكسكس و نغطوهم و كي يفورو مليح رانا ننزعوهم و نحطهم في صحون و نفرغ عليه الفول اللي نكونوا طيبناه من قبل.
طريقة تحضير الفول:
نحتاج فول يابس بعدما ننزعولو القشرة تاعو و نقسموه على أثنين و نطيبوه مثل ما نطيبو البيصارة أو البيصار
نحطو الفول فكوكط اي طنجرة ضغط و نغطيه بالماء و نغلق عليه و نخليه يطيب و راه يشد شوية في طيابو بعدما يطيب نزيد عليه الثوم 2 سنات او 3 و 2 ملاعق زيت و ملح و فلفل و كمون و ملعقة أكل طماطم مصبرة و نخليه يزيد يكمل طيابو و نديروه شوية خفيف كيما شوربة ما يجيث ثقيل .
كاين نوع فول كي يطيب يذزب وحدو و كاين اللي يبقا حب ايلا بقالك حب ارحيه بالميكسور.
و الصور راه تبين كل شيء
























ملاحظة:
انا ما نحب فول يابس و ما نحب زعتر لا نابطة لا فليو هههههههه لكن سبحان الله كي تجمعهوملنا ماما في هاد الاكلة ناكلوهم و نزيدو و كون نصيب نعيش غير في هاد الاكلة هههه.

لاتنسوا أمي من صالح دعائكم هي من قدمت لكن الوصفة و ادعو لها بالخير و ان شاء الله تزور الكعبة يااااا رب



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

Mafhamtch kifah darti foul wala mathoun

__________________________________________________ __________

>>>> الرد الثاني :

والله شوقتينا كملي الله يرضى عليك باينة بنينة وصحية

__________________________________________________ __________

>>>> الرد الثالث :



__________________________________________________ __________

>>>> الرد الرابع :

المشاركة الأصلية كتبت بواسطة mary1987
mafhamtch kifah darti foul wala mathoun

المشاركة الأصلية كتبت بواسطة nadha2005
والله شوقتينا كملي الله يرضى عليك باينة بنينة وصحية

المشاركة الأصلية كتبت بواسطة la princesse

راني كملت الوصفة حبيباتي

__________________________________________________ __________

>>>> الرد الخامس :

44444444444444444444444444444