عنوان الموضوع : مشكلتي مشكلتي
مقدم من طرف منتديات العندليب

المشكل تاعي مش مايتحلش ولا صعيب بصح حبيت تعطوني رايكم وواش تديرو لوكان جيتو في بلاصتي
نبدالكم الحكاية........وهادي الحكاية فاتت بصح كلش يبدى منا والله ماكدبت حتى في حاجة منها
انا من العام الماضي مانهدرش مع حماتي وهي تاني والسبب انها تهمتني قلتلها كلام في احدى المشاجرات بيني وبين زوجي هو راح جابها زعمة بش تركح الحالة على خاطر ضربني كي جات قالت لي علاش تقابدتو قلتلها راهو يقولك هو خير قالي راجلي قوليلها نتي قولتو انتا قوللها انا مانقولش مالا اتهمتني باللي قلتلها ماجيتك ما شكيتلك يعني كاني قلتلها واش دخلك وانا والله ما قلتلهاش هكا وراجلي معايا وشاهد
بعد ما تسامحنا انا وراجلي قلتلو عيط لامك نطلبوا منها السماح على خاطر قلقناها معانا راح جابها وسلمت عليها ثلاث مرات وقلتلها سامحيني ثلاث مرات على خاطر شيطناك معانا المهم رجعت لدارها عادي وبقيت نروح عندهم عادي بصح هي عادت ما تجيش وانا ما شكيت في والو على خاطر علابالي باللي مادرتلها والو وما كنتش حاسبة انها متهمتني بهاديك الهدرة
بعد ايام جاو عندي دارنا وبحكم انو دار شيخي لاصقة في داري توقعنا انو عجوزتي تجي تتلاقاهم خاصة انهم عام ماجاوش عندي بسبب مرض بابا وبتره لرجله المهم زوجي راح لامو قاللها ارواحي ماحبتش تجي انا رحت نستفسر علاه ماجاتش قالتلي لاه نجي مانجيش ماشي على جال داركم نجي وقالتلي من نهار قلتيلي ماجيتك ماشكيتلك حلفت دارك ماندخلهاش حاولت نفهمها باللي اني ماقلتلش هاكا بقات مصممة على رايها قلتلها صحا نقولو راني قلتلك هكا ياخي جبناك وطلبت منك السماح قالتلي هيه بصح قلبي ماصفاش المهم بقات شادة في قصتها ودارتها سبة باش تخرجني ماشي مليحة قدام ولدها وقدام العايلة بصح ولدها كان معانا وشاهد اني ماقلتلهاش هاداك الكلام المهم قالتلي مانجي لا علاجالك لا علاجال داركم رجعت لداري وقررت انا تاني مانزيدش نروح على خاطر ماقيمتش دارنا وخاصة بابا اللي كان مريض
بعد الحكاية هاديك مابقيت نهدر معاها ما تهدر معايا وحرشت بناتها عليا وعاد حتى واحد ما يجي واللي تجي لدار باباها يعيطوا لراجلي يتلاقاهم تما ومايجيوش لدارو بسبتي مع اني والله عمري ما قستهم لا هم لا امهم حتى صرا المشكل هاداك لي دارتو هي وانا والله بريئة
المهم راجلي عاد يحاول خواتاتو بش يجيو عندو وهوما يتكسلو عليه ومايجيوش حتى يجيبهم هو بالسيف ومايقعدوش اكثر من خمس دقائق
مرة من المرات جاب اختو لعندنا شافت كاش ريدو عندي عجبها قالتلي اخدميلي مثلو قلتلها اني مانخدمش للناس على خاطر راني مبتدئة وبعد الحاح شديد قلتلها ان شاء الله
المهم بعد ما قررت نخدملها واحد تفاجئت انها ولدت يعني كانت حامل لمدة تسع اشهر وماقالتليش صراحة غاضني الحال على خاطر هادي حاجة ماتتخباش حتى على العدو ...وكانو كي تقولي راح نحسدها ولا مانعرف واش نديرلها يعني راهم مدايرينلي out من لافامي تاعهم حتى الحمل يخبوه عليا يعني كي حبت مصلحتها عندي تهدر معايا وحاجة ماتتخباش تخبيها تصورو في هاداك النهار لي حاولتي على الكاش ريدو شبعت زوخ عليا بالحوايج و الاثاث لي شراتو لدارها هدرتلي عليهم حبة حبة وبالسومة تاعهم والحمل ماهدرتليش عليه
انا من نهار سمعت الخبر قررت مانخيطلهاش على خاطر حسيت انهم مخرجيني من العايلة تاعهم كامل يعني هادي اهانة لكرامتي فمابالك لوكان نولي انا خياطتهم الخاصة يزيدو يرخسوني مليح
قولولي واش تديرو لوكان جيتو في بلاصتي ؟؟من فضلكم كل وحدة تحط انو الحكاية هادي صراتلها ليها وتقولي رايها
وشكرا


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

أختي كي تبٌقاو مقاطعيين بعضاكم مش حل

في ٍأيي راجلك لازم عليه يلعب الدور تاعو

هو اللي يحاول يقارب بيناكم و نتي ثاني حاوي أنك تكسبيهم

يعني من ذاك تبعثليهم حاجة ماكلة ولا باش تكسبي ودهم

أما اذا بقاو هما مقطعينك نتي أقعدي عامليهم نورمال اذا جاوك ضيفيهم باركلهم المهم باش ما تجيش من عندك

__________________________________________________ __________

>>>> الرد الثاني :

كون جيت انا نسمح فيهم كامل و نروح نعيش وحدي


__________________________________________________ __________

>>>> الرد الثالث :

يا اختي واش نقولك الناس كامل راهم هكذا
عندي اختي تاني تعاني مع عجوزتها وبناتها والله صرالها نفس الموقف العجوزه تفوت على دارها وما تدخلش من غير سبب هكذا غيره وخلاص وبنتها خبات على اختي حملها ولانها مغتربه كل يوم تعيط في ال***** وتهدر معاهم وجامي قالتلها على الحمل حتى نهار ولدت؟؟؟ وخلي وخلي
اختي مسكينه كانت تروح عند عجوزتها وتقضيلها الشغل وتطيبلها بصح ضرك خلاص ماهيش تروح الا كي تكون عندهم مناسبه وما تبات عندهم ماوالو تروح لدارها كي البرانيه
طبعا احنا وماما دايمن نقولولها كبري عقلك ما تعانديهمش ، بصح القلب لحمه !!! كي يقيسك انسان ويبقى دايمن يعاودلك في نفس الافعال تكرهيه
المهم انت اختي كبري عقلك وما تعانديهمش اذا جاوك مرحبا واذا ما جاوش راكي فيدارك ما تخميش فيهم قاع
لكن حاولي رغم هذا تروحي عند عجوزتك واحتسبي مضايقاتهم لله واكيد ربي ما يخليكش وحدك خاصه ونحن على ابواب الشهر الفضيل ،، اخدمي للاخره تاعك هذي دنيا فانيه ويا سعدك يا فاعل الخير

__________________________________________________ __________

>>>> الرد الرابع :

لا تقابلي الاساءة بالاساءة مهما كانوا يبقاو دار راجلك وجدة وعمات اولادك وحتى ماتكونش حساسية بين الاولاد واهلهم وبينهم وبين اولاد عماتهم وجدتهم مستقبلا تنازلي مش على كرامتك طبعا ولكن لاجل صلة الرحم وانت قدام ربي صافية وهما الله يسهل عليهم حتى اذا ماخبروكش بقصة الحمل مش مشكل اذا هوما ماداروش منك انت ديري منهم واعتبري الموضوع عادي كانها وحدة من جاراتك زيدت وروحيلها عادي وباركيلها واخدميلها وش طلبت منك يعني ببساطة اقتليهم بالقدر وبالنية الصافية يعني صفي قلبك وتعاملي معاهم كيما يلزم كأهل ويطولو ولا يقصرو يرجعو يرجعو ياك الحمد لله راجلك مليح معاك الدنيا ومافيها صلي اهله وماتقطعيهمش حتى اذا هما قاطعوك وربي كبير سبحانه والله يصلح الاحوال بيناتكم

__________________________________________________ __________

>>>> الرد الخامس :

كون جيت في بلاصة راجلك نحكمك انتي وامه نديكم للغابة نخليكم هناك تكلكم الفيران

وانا نروح ننكري فلبحر نريح راسي