♥► مـــــ(12)ـــن مطبخي : فتات , سمنيات , محجوبة , شواط ◄♥ المطبخ الجزائري
عنوان الموضوع : ♥► مـــــ(12)ـــن مطبخي : فتات , سمنيات , محجوبة , شواط ◄♥ المطبخ الجزائري
مقدم من طرف منتديات العندليب
اهلا بالجميع في موضوعي
هاذ الموضوع ان شاء الله يكون شاامل وكامل ومفيد للبعض منكن
رايح يشمل كل من السمنيات ومشتقاتها ههه
يعني :
سمنيات , فتات , محجوبة , شواط
هاذو لي نديروهم حنا بهاذ العجينة
ونبداو اولا بيها وهي سهلة يعني ما وملح وخلاص ههه
العجينة : دقيق + ملح + ماء
تجمعيها حتى تولي عجينة وتعجنيها مليح ثم تبقاي تسقي وتعجني
وأظن أنو الاخت لوهرانية سهلت علينا مهمة العجن بفكرة الكيس المبلل أنا مازلت ماجربتهاش
بالصح الاخوات يقولو باللي راهي مليحة
أنا عجنتها في الفحلة تاعنا تع الدار ههه لي هي العجانة ههه
وكيما تخلصي العجن مليح وتولي العجينة ملساء
ديري شوية زيت فيديك وابداي اعملي الكويرات
وحطيهم في بلاطو مدهون بالزيت
وغطيها وخليها تنزل مليح باه يجيك العمل ساهل عليها
في مكان واسع ابداي اخدمي
سينية مقلبة او مايدة المهم وش متوفر عندك
وافتحيها رقيقة بالطريقة التالية
وحاولي ماتقطعيهاش
كيما تكون هكا وتطيبيها طول على الطاجين تمدنا ما يسمى بالفتات (رقاق)
نسيت ماصورتش انا تاعي هاني سرقتلكم تصويرة ههه
واذا حبيتي تطبيقها بالطريقة التالية
رايحة تمدلك السمنيات (مسمنة)
أكيد مع كاس حليب ومعجون المشمش ماكانش ماخير منهم يمي يمي
(هاهوووك لفتات تاعي هههه بش ماتقولوش اني مانعرفش نديرو)
واذا حبيتي تديري لمحجوبة اكيد بالطماطم
وتكملي الطي كيما قبل
وماعنديش صورة لمحاجبي ههه كي نزيد ندير نحطلكم
واني ماحبيتش نسرقهم علابالي تعرفوهم بكل
ما بقانا غير الشواط
كاين في بعض المناطق يشخشخو الفتات ويخدمو بيها
حنا عندنا نحبو نشخشخو السمنيات احسن
يعني بعد ماتكوني طيبتيها على الطاجين عاودي ورقيها واقسمها قطع صغيرة هكا
واخدميلها مرقة حمرة
بصل + دجاج (احسن من اللحم) + زيت + ملح + فلف أسود + فلفل حار + حمص + جريوات (كانت ماعنديش)
قلي مليح وامرقي وكي تطيب اللحم نحيها وخلي لحمص تكمل طيب
حطي الطماطم وتكون المرقة واجدة
الشواط نفوروه مرة وحدة مليح
كي نحيوه نحطولو شوية زبدة
ويتسقا قبل التقديم مباشرة لانو يبرد في سع
صفي المرقة وتكون سخونة مليح وحطي فيها شوية زبدة
واسقي بالشوية وخلطي في نفس الوقت بالفرشيطة
وهوا يشرب ونتي زيديلو لمرقة حتى تشوفيه تشبع
وقدميه مباشرة
وبالهنا والشفا
وان شاء الله يفيدكم الموضوع
تحيايت
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
الله يبارك
والله غير شهيتيني
بالصحة عليكم
__________________________________________________ __________
>>>> الرد الثاني :
ما شاء الله كل شيء هايل يعطيك الصحة اختي
__________________________________________________ __________
>>>> الرد الثالث :
يمي يمي انا منحبش هذيك الشخشوخة يوجعني منها راسي خخخخخخخخخ بصح المحاجب يسخفوووو يسخفوووووووووووووو
بصحتكم
__________________________________________________ __________
>>>> الرد الرابع :
بارك الله فيك .... ربي يدومها نعمة ....شكرا على المجهود
__________________________________________________ __________
>>>> الرد الخامس :
بارك الله فيك مجهود تشكرين عليه
رد مع اقتباس
