عنوان الموضوع : البرانية طبق بالبادنجال من مطبخ ليزابال طبخ جزائري
مقدم من طرف منتديات العندليب





مرحبا حبيباتي ألكين هذا الطبق الذي يشتهر به الغرب الجزائري و هو لذيييييذ جداااا و هذه طريقتي في تحضيره



نحتاج الى حبات بادنجان طبعا يكون طازج يعني جديد
لحم الدجاج ولا لحم الغنمي كيما تبغي لزوج يجو ملاح انا كان عندي دجاج
حمص منفخ
حبة بصل من صغيرة الى متوسطة
فصين ثوم
ملح فلفل اسود عود قرفة كروية زعفران
بطاطا حسب أفراد العاءلة يعني فقط للديكور


في طنجرة ولا الكوكوطة ديري 2 م ك زيت بصل مقطع شراءح اللحم الحمص ملح و التوابل نقلي على نار هادية مع التحريك ومن بعد نمرق قيس ما يتغطى اللحم نغلق الكوكوطة و نخلي المرقة أو الصلصة تطيب على نار متوسطة



نروحو الآن للبادنجال نغسله مليييح و نقطعه شراءح تقدري تنزعي منه القشرة بالتناوب قبل ما تقطيعه كما في الصورة
نديره في إناء عميق فيه الماء و الملح هاذ المرحلة مهمة باش ما يشربش الزيت بزاف أثناء القلي و خليه حتى لوقت الاستعمال



مين تنحي الرؤوس تاع البادنجال تقدري تنحيلهم هذيك القشرة الخضراء بالموس كما في الصورة و تديريهم يطيبو فالصلصة مع اللحم مين يقرب يطيب انا ما نديرهمش

مين يطيب اللحم إذا كان تاع دجاج ننحيه مالكوكوطة و نحطه في صحن يبرد شوية طبعا نصفيه مالصلصة و نحمره فالزيت لي راح نقلي فيه البطاطا و البادنجال


نرابي الثوم و في مقلاة صغيرة ندير 2 م ك زيت و نقلي هذاك الثوم بلا ما نحرقه و نضيف عليه كروية على راس الملعقة تاع القهوة و نخلطهم و منبعد نضيفها للصلصة و نخليها تغلي شوية على نار هادية و ما تنسيش تذوقي الملح و طفي




في مقلاة كبيرة شوية ندير زيت غزير يسخن ملييييح و النار تكون من متوسطة الى قوية يعني بيناتهم و نقلي البادنجان بعدما نكون درته يقطر في كسكاس كي يتحمر من جهة نقلبه على الجهة الأخرى كما في الصور و نحطه فوق ورق ماص
نقلي كذلك البطاطا نقطعها دوائر ولا قطع صغيرة حسب الرغبة




التقديم
في صحن مسطح شوية une assiette plate نحط دوائر البادنجال ساير داير و نزيد فوقه البطاطا بلا ما نغطيه كامل و نسقي بشوية صلصة تكون خاثرة و الحمص و اللحم و نزين بالمعدنوس مقطع رقيق ممممممم ههه




ملاحظة : باش ما نضيعش الزيت و ما نكثرش الماعين نقلي البطاطا هي الاولى و نخليها بجهة و في نفس المقلاة نقلي البادنجال و نحطه بجهة و في نفس المقلاة تاني نحمر لحم الدجاج
نتمنى يعجبكم الطبق أخواتي راه لذيييذ و يستأهل تجربوه للي ما يعرفوهش على هذيك كثرت الصور هههه و شهية طيبة
و في الأخير دعوة خير بزاف عليا




>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

حيبتي ليزابال والله غير اتشهي اطباقك روعة

__________________________________________________ __________

>>>> الرد الثاني :

امممممممممممممممم يعطيك الصحة طبقي المفضل بصح بنتي و زوجي ما يحبوش الدنجال وعععععععع
نجي عندك و تقلشيني راني عارفة باللي كريمة وحنينة يا العزيزة يعطيك الف صحة

__________________________________________________ __________

>>>> الرد الثالث :

شكرا يعطيك الصحة نفس طريقتي

__________________________________________________ __________

>>>> الرد الرابع :

روعة ليزابيل مبدعة باطباقك باينة لديدة وتشهي يعطيك الف عافية حنونة تسلمى

__________________________________________________ __________

>>>> الرد الخامس :

شكراااا على مروركن العطر حبيباتي نورتن موضوعي

ام طيري الجنة على عيني و راسي غير ارواحي عندي وساااااهل نحطك في رموش عينيا