عنوان الموضوع : هذ المرة خبرة 20 سنة فتيل مش قتيل طريقة جزائرية
مقدم من طرف منتديات العندليب

الى الاخت lauparadisa راني درت ريقة فتيل البركوكس او العيش كيما انسموه احنا باه يستفادو جميع الاخوات كون انحها في موضوع الفتيل ممكن ما يشوفوهاش

شوفي حبيبتي اولا غربلي الدقيق انتاعك يعني ديريه في غربال الرطب كيما انسميوه اي تخرجي الارطب وحدو والاحرش وحدو انتي تخدمي بالارطب والاحرش خبيه لزوم البسبوسة هههههه هك اندير انا وتقدري اتخلي مع الارطب شوية فرينة مش بزاف
من بعد هزي حفنة انتاع المحمصة انتاعك سوميها او اغسليها كيما اقولو اخرين وصفيها من الما مليح وحطيها في القصعة انتاعك وانثريها باه اتشيح شوية
وجيبي حاجة حطي فيها الما والملح وحطي مغرف ماكلة وحطي بجنبك السميد هذاك او بالاحرى الدقاق /الدقاق يعني الدقيق الارطب عندنا /وحطي فيه مغرف بنفس حجم المغرف اللي في الما
ومن بعد تبداي اتسمي بالله واتقولي يا ربي سهلي وابداي لوحي مغرف ما على هذيك المحمصة ودوري شوية وزيدي لوحي مغرف دقاق ودوري بسرعة باه ما يجيش فيه الكور
وكملي مرة مغرف ما ومرة مغرف دقاق حتى اتشوفيه بدا يطلع تقدري ثم تستغناي على المغرف لكن اذا خفتي خليها يعني المغرف انتاع المبتدآت هذ الطريقة علمتني فيها انسيبت اخي ربي يرحمها ويجعل مثواها الجنة شافتني عند بنتها وقتلها اليوم نفتل العيش وخلاص خلوني مالا كي شافتني قاتلي ما تبدايش اتلوحي بالغراف كيما القارحات انت اول مرة لوحي بالمغرف حتى يتبرملك مليح
متتنسايش كل مرة كي اتلوحي الدقاق حطي الكف انتاع يدك وابرمي العيش انتاعك يعني تحطي الكف وبحنية تدوري في اتجاه واحد لكن في كل الاماكن بلا ما تهزي يدك * نتمنى تفهمي هذ النقطة * هذا هو اللي راح اخلي العيش يطلع واكون مبروم وهذاك اللي يهربلك للجوانب تجبديه في الوسط وتبرميه بكفك
وكي يطلع العيش للحد المرغوب تحكمي السيار ابو عيون غليضة واذا كنت تعرفي تلعبي بيه راح يتلم العيش في الوسط باه تفرزيه اتنحي انتاع الوسط واللي بقا راح تلقايه شوية ارقيق زيدي افتلي عليه حتى اولي بنفس حجم اللي نحيتيه اهنا ممكن اتكوني مبتدئة اذا حاولي اتدوري السيار في مستوى واحد وباتجاه واحد وبشكل دائري يعني ماتخليش السيار اكون مايل تقدري تنجحي في المهمة وتاكلي احسن عيش ومن مين من صنع اديك وما تنسايش افوريه وتحليه بيديك لازم يتحل باليدين وهو سخون باه ما يركبش هههههه يعني ما تركبش حبة فوق اختها ويبان حبة خشينة وحبة رقيقة
ملاحظة هامة جدا جدا كي تنحي العيش انتاعك اللي وجد بالاك اتحطيه فوق بعضاه يعني حتي حذاك درا ولا سرفيتة كبيرة وحطي فيه
علاه خاطر احنا استعملنا الارطب انتاع الدقيق وممكن اكون ما يشربش الما اذا راح يلصق في بعضاه وراح اتولي عندك كتلة انتاع عجين مستحيل تقدري تسلكيها
اذا الحل انثري العيش انتاعك بحيث ما تركب حتى وحدة على اختها باه ما يتعجنش
هذا قبل ما تفوريه من بعد فوريه عادي وانت وش حابة تستهلكوه في يومو او تشيحيه واتخبيه كيما اندير انا نفتل منو للعولة وانخبي لاني عندي عايلة 8 اشخاص

اي سؤال اتخلوه اهنا او في الكوزينة عند لبنات هههههه


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

ههههه فتيل و قتيل
مواضيعك روعة و في غاية الاهمية نستفادوا منها كامل مثل انا ما نعرفش نفتل امي و اخواتي الي يفتلوا
نتمنى يثبتوا المواضيع في زوج
تسلميلنا راياحين


__________________________________________________ __________

>>>> الرد الثاني :

المشاركة الأصلية كتبت بواسطة جيادا
ههههه فتيل و قتيل
مواضيعك روعة و في غاية الاهمية نستفادوا منها كامل مثل انا ما نعرفش نفتل امي و اخواتي الي يفتلوا
نتمنى يثبتوا المواضيع في زوج
تسلميلنا راياحين

والله هذا شرف ليا كون يتثبت بصح ما يهمنيش المهم تستفادو منهم وخلاص
شكرا ليك نورتيني

__________________________________________________ __________

>>>> الرد الثالث :

رياحين يالطيوبة الحبوبة. موضيعك. داءما روووووعه
وماتبخليش علنا الله يجزيك الخير. ويشافي لك ندى يارب

__________________________________________________ __________

>>>> الرد الرابع :

المشاركة الأصلية كتبت بواسطة أم إناس
رياحين يالطيوبة الحبوبة. موضيعك. داءما روووووعه
وماتبخليش علنا الله يجزيك الخير. ويشافي لك ندى يارب

الله اجازيك الخير انت التيوبة حبيبتي ربي اخليك لينا ويعتيك وقفة ساهلة ان شاء الله

__________________________________________________ __________

>>>> الرد الخامس :

يطيك الصحة رياااحين راكي خبرة فكلش ماشاء الله من طياب و غسيل و فتيل و الاهم خبرة 22 سنة قتييييييييييل خخخخ