عنوان الموضوع : وشك منور و صافي مع وصفاتى وبس للعناية بالبشرة
مقدم من طرف منتديات العندليب

وشك منور و صافي مع وصفاتى وبس



السلام عليكم و رحمة الله تعالى و بركاته


الماسكات اللي هنزلها هي ماسكات مجربة و هقول نتيجة كل وحدة و هقول طريقتي في الاهتمام بالوجه

طبعا لو هنعمل ماسكات من برة و ننسى التغذية النتيجة مش هتكون قد كده... عشان كده بنصح كل فتوكة... لو عايزة بشرة صافية ابتدي من الأكل..


*اشربي مية كثير

*كلي خضار و الافضل تكون مطهوة بالبخار عشان ماتفقدش فوائدها




*بشرة الوجه محتاجة بالأساس لفيتامين A و هو موجود في أصفر البيض، الكبد، اللبن و الزبادي... كمان ممكن تلاقوه كـپروڤيتامين A في كل الخضار اللي لونها أخضر ، و كمان في المانجا، الجزر....

*البشرة كمان محتاجة للزنك و الي ممكن نلاقيه في اللحمة و المحار و الكبد..

*اشربي عصائر ، عصير خيار، عصير خوخ، عصير ليمون، برتقال...

*ابعدي عن المنبهات، شاي ، قهوة، مشروبات غازية

*ابعدي عن الفواكه و الخضر المعلبة..






نيجي دلوقتي للاهتمام اليومي


عن نفسي بحاول على قد ماقدر ماستعملش مواد كيماوية لوشي خصوصا انه كل مرة يطلعوا مكون من المكونات بيعمل سرطان او بيعمل تجاعيد ...

يومي ببتديه عادي بغسل وشي بصابونة الطاووس المغربية 100% طبيعية، بغسله بيها 3 مرات و بمرر على وشي مكعبات مثلجة من مية ورد، او بمسح بقطنة فيها مية ورد و خلاص...


دي صورة صابون الطاووس






لو في الصيف بحط سان بلوك و بــــس





ساعات بستعمل غسول بدل الصابون و كل وحدة ممكن تستعمل الغسول اللي بترتاح معاه و أفضل الأنواع هو Neutrogena و عن تجربة!









نيجي دلوقتي لحمام البخار


ده الصراحة الحمام المغربي الاسبوعي بيغنيني عنه بس برده ساعات بعمله و هقول طريقة عمل حمام البخار للوجه بالنسبة لكل نوع من البشرة

أولا نعرف امتى نعمله و كل قد ايه!

بالنسبة لـــ :

البشرة الذهنية : حمام البخار من 6 دقايق ل 8 دقايق على الأكثر ، مرة كل اسبوع

البشرة المختلطة : لمدة 10 دقايق كل اسبوع

البشرة العادية : 5 دقايق كل اسبوعين

البشرة الجافة : مش أكثر من 3 دقايق كل 15 يوم

ملحوظة : مش بنصح بيه خالص لصاحبات البشرة الحساسة او الملتهبة او اللي بتتعالج بعلاج كيماوي لمرض ما


نيجي بقى لطريقة تحضير حمام البخار و ايه اللي ممكن نستعمله فيه

بالنسبة لــــ :

كل أنواع البشرة : ممكن نضيف ورد، لافندر ، ياسمين ، نعناع

البشرة الذهنية : كاموميا، قشور الليمون ، قشور البرتقال ...

البشرة الجافة : قطرات من زيت اللافندر، قطرات من زيت النعناع...

البشرة المختلطة : حبيبات الشاي

البشرة العادية : كل ما سبق و ممكن كمان زيت زعتر


الطريـــقة بقى :

حطوا الزيت او النبات اللي اختارتوه في اناء فيه مية مغلية و غطوا الراس بفوطة و سيبوا البخار ده موجه لوشكم مدة كافية ( و حسب نوع البشرة )





دلوقتي بعد ما عملتي حمام بخار لوشك لازم تعملي ماسك

بنلاقي وصفات بالهبل و من كثرهم بنكسل نعملهم اصلا

انا بقول كل وحدة تختار وصفة من الوصفات و تكون هي دي وصفتها المفضلة..

طيب و انا اعرف ازاي انه هي دي الوصفة المناسبة؟؟؟

طبعا هتختاريها بناء على نوع بشرتك و على نوع المشكل اللي بتعاني منه و على حسب الامكانيات المادية ( مع انه كل المكونات متوفرة في المطبخ )






المــــاسكـــات





أول ماسك : ماسك البيض

ساعات بكسل أعمل ماسك و باخذ بس بيضة




* بفصل صفار البيض عن الأبيض بتاعه

* باخذ الأبيض بضربه شوية بشوكة و بعدين بحطه على وشي،

*بحط على وشي أول طبقة و بسيبها تنشف

*لما بتنشف بحط على وشي ثاني طبقة و بحط عليها منديل ( انا بدل المنديل بستعمل الشرائح الي بنشيل بيها السويت .. افتكاسة يعني ) بلزقها على منطقة الجبهة و الانف و الذقن و بسيب لحد ما تنشف...

*بشيل الشرايح دي ( بتكون شايلة معاها الرؤوس السوداء و أي اوساخ )

*بغسل وشي بمية دافية

*باخذ صفار البيض و بذهن بيه وشي

* بسيبه لحد ما ينشف و بغسل وشي بمية دافية و بمرر مكعبات ثلج عشان اقفل المسام...

والله العظيم النتيجة جميلة جدا جدا جدا


ثاني ماسك : ماسك الحمص

الماسك ده بيصفي البشرة و بيفتحها

*تاخذي حمص مطحون و تخلطيه بمية ورد و تفرديه على وشك
*تسيبيه لحد ما ينشف و تشيليه بحركات دائرية و بعدها تغسلي وشك بمية دافية و تمرري بعدها مكعبات ثلج على وشك لقفل المسام او تغسلي بمية ساقعة

الماسك الثالث : ماسك اللوز و اللبن

ده ماسك بيبض بس لازم تعمليه مرتين و ثلاثة عشان تشوفي النتيجة:

*كمية من لوز مطحون
* شوية لبن دافئ

بتخلطيهم و تحطيهم على الوش لحد ما ينشف

لما تيجي تشيليه شيليه و انتي بتعملي حركات دائرية بايديك و بعدها اغسلي وشك بمية دافية و امسحي بمكعبات ثلج


رابع ماسك : ماسك النخالة ( الردة )

الماسك ده ينفع جدا لللي بشرتهم جافة، عادية او مختلطة

*صفار بيضة

*شوية نخالة ( الردة )

تفرديه على وشك لحد ما ينشف و تغسليه و تمسحي بمكعبات ثلج

خامس ماسك :ماسك العسل

الماسك ده بينظف البشرة بس لا بيبيض ولا بيشيل حبوب يعني تنظيف و بس

معلقة عسل و معلقة كبيرة حليب نيدو

تخلطيهم و تفرديهم على وشك 10 دقايق و تغسلي بعدها وشك بمية دافية و طبعا تمسحي وشك بمكعبات ثلج


سادس ماسك :

الماسك ده للبشرة المختلطة و العادية

*تاخذي صفار بيضة

*شوية قرفة

*شوية عسل

تخلطيهم و تحطيهم على وشك 10 دقايق و تغسلي وشك بمية دافية


سابع ماسك : ماسك الطين

الماسك ده ممكن تعمليه كل يومين لو عايزة نتيجة حلوة و سريعة.. بيفتح لون البشرة و بينظفها

*طين أبيض

*مية ورد

تخلطي كمية من الطين الأبيض بمية ورد تفردي الخليط على وشك و تسيبيه لحد ما ينشف و تغسلي وشك





مش بطلب منكم غير دعوة بصلاح الحال و انه ربنا يوفقني ف حياتي و ينولني اللي ف بالي..

بحبكن في الله

في آمان الله

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

لو عجبكم الموضوع قولو لى وانا ممكن اكمله لانه لسه ما انتهت وصفاتى

__________________________________________________ __________

>>>> الرد الثاني :

ينقل للقسم المناسب

__________________________________________________ __________

>>>> الرد الثالث :


الف شكر ياعسل عالموضوع الرائع

بارك الله فيك

لو بتقدري تكمليه كملي بس ياريت يكون باقي الموضوع غير مكرر

مودتي

__________________________________________________ __________

>>>> الرد الرابع :




شُكَرً لـًكْ عـًلى ......
عرضكْ الجميل لهـذاً الـموُضوُعُ
أيتــًهاً الــرائـــعهً ..دُمتـيً محلقهْ فيً
سماءْ ..سيدتـي ..
ولاحرمنا الله ً من تواجدك العطر
...نعـــ ..ـومه .

__________________________________________________ __________

>>>> الرد الخامس :

وين التفاعل يا بنات