علاج الشعر بين الحقيقة والخيال (متجدد ان شاء الله) لشعر طويل
عنوان الموضوع : علاج الشعر بين الحقيقة والخيال (متجدد ان شاء الله) لشعر طويل
مقدم من طرف منتديات العندليب
علاج الشعر بين الحقيقة والخيال (متجدد ان شاء الله)
أزيكم يا فتوكات ؟؟؟
*************
أنا طبعاً اليومين دول لزقة في قسم الشعر علشان بعمل كورس مكثف لشعري اللي اخدت قرار اني ههتم بيه واعوضة البهدلة اللي بهدلتهالو
بس لقيت حاجات كتير مفيدة ولقيت حاجات كتير مش صح
وبما أني بحبكم في الله قلت لازم أقولكم على الحاجت دي
والموضوع ده طبعاً تبع الجروب بتاعنا
(عايزين نبقى احلى بنات في العيد)
بس انا فضلت اخليه مستقل لوحده علشان الفايدة تعم على الجميع اللي هيمشي معانا واللي مش عايز
علاج الشعر ما بين الحقيقة والخيال
1- في بنات كتير بتشتكي انها عملت حمام زيت ومجبش نتيجة وواحدة تانية تقول وقع شعري والتالتة تدعى اللي قالت الوصفة و...................
لحظة واحدة بس
انتي استخدمتي الزيت ازاي
لازم الأول تمشي مع شعرك واحدة واحدة وتفهميه ..
يعني واحدة عمرها ما استخدمت زيوت وتروح تعمل تركيبة زيت معقدة ومكلكعة وفيها عشرين الف نوع زيت
وممكن كمان تبقى فيها زيوت تقيله زي الحية والحشيش و الزيوت الهندية وغيرها
ده غلط
ممكن التركيبة تبقى تحفه فعلاً وجابت نتيجة مع ناس تانية
لكن مش كل واحدة زي التانية
أنتي ممكن شعرك يبقى ضعيف وبصيلته ضعيفة متستحملش فتقع
والناس اللي متعوده على الزيوت غيرك انتي لسه شعرك متعودش على الزيوت المركبة
ايه الصح
أبدأي بزيوت بسيطة نوع واحد او اتنين ومتكتريش علشان شعرك يتعود على الزيوت وبعد كده زودي
علشان تعرفي شعرك بيحب ايه ومبجيش على ايه؟؟
2- نفس الكلام على الفترة اللي هتستخدمي فيها الزيت في الأول متزوديش قوي
في ناس بصيلة شعرها ضعيفة(طبعاً دي مع الوقت بالأهتمام ممكن تقوى)
ينفعش تنام بحمام الزيت وهي كبسه شعرها بالكيس
كده برده غلط
اه معاكي في بنات كده وانا منهم بنام بيه عادي
بس لازم واحدة واحدة مع شعرك
في الأول كفاية 3 او 4 ساعات وبعد كده زودي
انا عارفة ان في بنات عادي الموضوع معاهم حتى لو كانت اول مرة يستخدموا حمام الزيت بس بتبقى بصيلة شعرهم قوية تتحمل
3- احنا بعمل ايه كمان حاجة غبية قوي
قبل ما بناخد الشور بتعملي حمام زيت وممكن تكون فروة راسك مليااانه دهون وتراب ورواسب
ابقى قبليني لو فروة راسك استفادت
شعرك ممكن يبقى طري لما تغسليه لكن من بره بس
استخدمي حمام الزيت على شعر نضيف
وهقولك على فكرة حلوة قوي ممكن تعمليها تحل المشكلة دي
اعملي لسيون طبيعي من السدر لو شعرك دهني
ومن السدر والروز ماري لو شعرك جاف
واغسلي راسك بيه قبل حمام الزيت وبعد كده بالشامبو
كده هتستفيدي من اللسيون وفي نفس الوقت هتنضفي شعرك علشان يقدر يستفيد من الزيت
4- طبعاً دي كلنا عارفينها ان نوع الشعر بيفرق من واحدة للتانية واللي هيمشي معاكي ممكن ميمشيش مع غيرك
وكل شعر ليه طريقة بيجي عليها في ناس شعرها بيطول وبيجي قوي على الدهان مش حمام الزيت
وفي ناس شعرها بينشف جداً من دهان الزيت فالحل ليها حمام زيت يتغسل
وبلاش كل شويه نشكك في بعض
5- في زيوت واعشاب مفيدة جداً بس بتنشف الشعر الجاف
يبقى لازم احط معاها زيوت واعشاب منعمة للشعر
وكله بيجي بالتدريج
نيجي بقه لنقطة مهمة جداً
ربنا عز وجل خلق في الكون دي سنن كونية لا تتغير ولا تتبدل
و خلق لنا اسباب لكل شئ وواجب علينا اننا نتعبد لله بالأخذ بيها
بس ربنا قادر انه يعطي بدون اسباب
وبرده ممكن اخد بالأسباب ومتجبش نتيجة
كم مره واحد تعب ومرض واخد العلاج مظبوط ومجبش نتيجة معااااه؟؟
وكم مره واحد كان عنده مرض خطير وربنا شفاه بدون علاج
يبقى قلبي متعلق بالله مش بالأسباب والزيوت والاعشاب
ربنا قادر يعطينا بدون اسباب
2- الله عز وجل خلق الأسباب دي نوعين ملهمش تالت
اسباب كونية :-ذي العلاج والأعشاب والزيوت ودي بنعرفها من التجربة
واسباب شرعية :- ودي بقى لازم لازم يكون فيها دليل من القران او السنة او فعل الصحابة
شفت في المنتديات الفترة اللي فاتت علاج الأمراض ومنها الشعر بأسماء الله الحسنى وده غير صحيح بالمرة وموردش فيه اي شئ ومينفعش نعمله
امال ايه؟؟نعمل ايه؟؟
الرقية الشرعية الثابتة عن الرسول صلى الله عليه وسلم وده مش وقته اشرحها هنا
اعملي بحث عنها وانتي تلاقيها
وكفايه بقى لحسن تعبت قوي من الكتابه
على فكرة الموضوع ده مش منقول وخلاصة لفى وبحثى
عايزة تقييم بقى
وهنكمل بعدين
يا رب تستفيدوا من الرغي بتاعي ده
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
الله يعطيك العافيه
__________________________________________________ __________
>>>> الرد الثاني :
مشكوووووورة ماقصرتي
الله يعطيك العافية
__________________________________________________ __________
>>>> الرد الثالث :
تسلمي على الجهد الاكثر من راااااااااااااااااااااااااااائع
__________________________________________________ __________
>>>> الرد الرابع :
سلمت يداكي على النصايح المفيده
__________________________________________________ __________
>>>> الرد الخامس :
شكرا علي نصائحك عزيزاتي
رد مع اقتباس
