عنوان الموضوع : ماذا افعل معها و هي طفلة
مقدم من طرف منتديات العندليب

السلام
راح نطرح عليكم مشكلتي ممكن تعتبروها صغيرة مي هي فريمو تقلقني و نتمنى تعاونوني
انا راجل عندي 28 سنة متزوج من عام و 5 اشهر من مرأة عندها 23 سنة
مشكلتي هي ان زوجتي طفلة بأتم معنى الكلمة فالاول كنت نحسب بسكو فارقت الاهل و تبدلت عليها الحياة بصح عقليتها صغيرة مثال ك
1- تخاف من الظلمة مرة راح تريسيتي فالليل ماكنتش فالدار رجعت صبتها ميتة بالبكاء حتى خلعت لكشما يصرى فيها
2-تخاف من القطوط و الحشرات و بمنى اخر "من كل اشكال الحيوانات " لدرجة مايتصورهاش انسان
3- كي تبغي حاجة و نقولها لا تبقى تلح و تلح "تعيش تعيش تعيش تعيش " حتى نقول هيه و اذا ماقلتش هيه تموت و معلاباليش واش يصرى
4- تصرفاتها مع باباها كي يزورنا ماهمش تصرفات تاع وحدة متزوجة "تقعد في حضن باباها و تحكي و ماكاش خلاص الحاجز هاداك مع خاوتها الذكورة تحكي معاهم بطريقة لوكان انا تحكي هكدا معايا اختي نتشوكا ؟
5- تظال تلعب مع الاولاد الصغار و تتمسخر معاهم و كل يوم تقول "جارتنا ولدت توأم لوكان تخليني نجيب واحد ..فالسبيطار اليوم واحدة ولدت و ماتت على الطابلة لوكان تخليني نجيب ولدها ..ولد اختك يهبل علاه ماتجيبوش يبات معانا .. توحشت ولد خويا جيبهولي .والخ..."
6-و الكارثة تسيبورتي الريال و ماش عادي بجنون كي تربح البارسا داري تتقلب علاه كيفاه و يعششو "و لوكان نقوللها انا واش دخلني تقولي كيفاه "
7- كل يوم جيبلي حاجة نقولها لا تقول مالا ماتحبنيش ؟
8-كي الطبخ كي اعمال المنزل كي تصرفاتها .......كارثة طبيعية ؟؟؟
9- تقري لولاد تاع بريمار كي تصرى حاجة لتلميذ تقوللي ذرك بعد نروح عندو لولاد اللي يقراو عندها كل فاكوننس نصيبهم عندي و بدات شو الحكاية تقلقني ؟
10- انا نخدم شرطي و مرات نخرج فالليل و هي ماتقدرش هاد الشي " علاه تخليني حدي .مالا نروح نروح . ماتزيدش تهدر معايا .تروح ذرك بعد لا نفتل روحي ...."
11-الحاجة اللي تهبلني تجي تصيبني نتفرج الجزيرة ولا العربية و تشوف الحرب و الدم تبدى تبكي تبكي تبكي حتى نبدل ندير للمدام تتفرج الجزيرة ولا طيور الجنة ....
كي نقولها على حاجة تبدى تبكي حتى قبل ما نعيط عليها و نكون صريح هادي نقطة ضعفي كي نزعف نقول واش داني
صحابي واح يقولي اضربها واحد يقولي خليها تبكي حتى تسكت وحدها واحد يقولي سايسها
كيفاش ندير راني نسايس فيها كي بنتي وانا مازلت ماولدت
بالاك في بالكم المشكل صغير مي يهمني رئيكم قبل ماتتطور مشكلتي و تتهدم داري و انا معنديش الزهر
و بارك الله فيكم و اعتذر على ازعاجكم
رئيكم يهمني


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

صاحبي مدام تسيبورتي الريال توشيها ما نتفاهموش ههههههههههه
ــــــــــــــــــــــــــــــــ
وعليكم السلام
خيرا إن شاء الله
المهم في القضية أنها تعي معنى الحياة الزوجية وتأدي واجباتها
أما الباقي فهو عادي بل بالعكس أراه شيئ جميل لو تفعل مثلها
فأنت بنزولك لمستوى تفكيرها تستطيع الأخذ بيدها وتطوير قدراتها الإدراكية
عليك أن تكن معها في تبيين حقائق الأمور وتعطيها دروس من خبرتك وإن شاء الله مع الوقت ستنضج وتصبح كبيرة بل أتوقع أنها ستكون إمرأة ذات خبرات كبيرة فلا تتعجل الأمر وإصبر عليها ولا تنسى أن تعطيها من خبراتك والوقوف إلى جانبها حتى تأخذ من الحياة ما تحتاجه لمستقبلها
عش معها طفولتها وإستمتع معها صدقني ستجد الأمر فيه سعادة لك ولها
بالتوفيق إن شاء الله


__________________________________________________ __________

>>>> الرد الثاني :

واش راح نقولك خويا مرتك راها فووووووووووووووووووور
صراحة ان مانعرفش فالحوايج هادو نتمنى ذوي الخبرة يعاونوك
ربي يهنيكم

__________________________________________________ __________

>>>> الرد الثالث :

السلام عليكم ورحمة الله وبركاته
حافظ على زوجتك الكريمة
فهي نادرة
والله الموفق


__________________________________________________ __________

>>>> الرد الرابع :

ربي يعينك اخي بالاك كانت مدللة في دار باباها
انصحك اخي انك تتكلم مع ابوها او اخوها و هو بدورو يهدر مع امها او اختها و يفهموها
و لكن انت ماتكبرش الحكاية قلهم برك انصحوها
او اذا عندك اختك قريبة منها تفهمها و هي مع الوقت رايحة تتبدل

__________________________________________________ __________

>>>> الرد الخامس :

المسألة ماتلزمش الطلاق على ما أظن

و لكن بما أنك انت اللي فاهم و واعي انت اللي لازم تعرفلها المفتاج تاعها و كيفاه تتعامل معاها و تهدر معاها

شوي صعيبة و لكن كي تعرف كيفاه تتعامل معاها تسهال الامور

ربي يوفق