عنوان الموضوع : مشكلتي تم الحل
مقدم من طرف منتديات العندليب

السلام عليكم
مشكلتي واحد خطبني على اساس يحبني و انا عجبتني شخصيته و وافقت عليه. لكن مع الوقت اكتشفت انه الصفات اللي انا نحوس عليها و كنت نشوفها في الاول ماكانش و حسيتو تبدل . يحوس يفرض عليا الشي اللي هو مقتنع بيه. قلت ما عليش. واش خلاني نشد فيه انه متخلق و متدين. لكن منذ ايام و احنا نحكو تطرقنا لموضوع تعدد الزوجات و انا على نيتي سألتو اذا هو في يوم من الايام راح يتزوج عليا. تعرفو كنت نستنى في كلام يفرح القلب باللي مستحيل و راح نبقى معاك على الحلوة و المرة و حاجات من هذي. قام جاوبني اكيد مادام هذه حاجة في الدين و كان عندي سبب مقنع ... ايه عندو الحق اذا انا ما كنتش قايمة بالواجب تاعي كيما يلزم ... بصح رجعت سألتو يعني اذا نمرض و لا رب ما رزقنيش اولاد تتزوج عليا. قالي ايه ... و الله غاضتني روحي و بكيت. و زعفت منه و قلتلو دار بابا احسن ليا. رد عليا خلاص انا تاني اذا هكذا ما نتزوجش خير... درك تصالحنا و كي تناقشت معاه في الموضوع يحكي كأنو التعدد واجب و الا فرض و يقولي واش تحبي نكون ضد التعدد تحبي تدخليني جهنم والله قعدت حايرة في روحي و صرت خايفة من حياتي معاه. يعني انا تمنيت واحد يكون مخلص معايا و يوقف معايا في المحنة اذا نمرض و الا ما يرزقناش رب الذرية بعيد الشر. هو كلش بالمكتوب انا واش ذنبي اذا حاجة كيما هذه صراتلي. و الله نكره الكذب بصح هذاك اليوم تمنيت لوكان كذب عليا و قالي نوقف معاك و ما نقدرش نتزوج عليك... يارب احنا مازال ما تزوجناش و هو يقولي مستعد نتزوج عليك اخرى... انا و الله مستحيل نخمم نخليه اذا تصرالو حاجة. انا من هذاك اليوم و انا مقلقة و نخمم اذا صح يحبني. يعني اذا يحبني ما ظنيتش كان قالي من حقو يتزوج عليا. و الله هذا الكلام يجرح بزاااااف. بالاك تقولولي واش داكم لهذا الموضوع بصح هذا واش صار. فهموني انا غلطانة نزعف من كلامو و اذا اي وحدة منكم في بلاصتي راح تتقبل هذا الكلام عادي.. و حبيت نعرف يعني خلاص ماكانش رجال مخلصين في هذه الدنيا. راكم كامل عندكم نفس التفكير و اذا سألتك خطيبتك اذا تمرض تتزوج عليها ترد ايه نتزوج ؟؟؟ يعني في رايو هو ما يقدرش يكون في بلاصتي و هو اللي يمرض والا يكون المشكل من عنده مايجيبش اولاد بعيد الشر. يعني انا في هذي الحالة من حقي نطلب الطلاق و نعاود نشوف حياتي. بصح و الله قلبي ما يطاوعنيش. و هو يقدر عادي يتزوج عليا... ما نيش متقبلة الحكاية خلاص كل ما نتفكر نقعد نبكي كيفاش قالي هذاك الكلام
اسمحولي طولت عليكم بصح ما عرفتش واش ندير. تصدمت من كلامو و غاضتني و حبيت نفرغ


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

وعليكم السلام

انتي مخطوبة وغاضك كلامه كي تتزوجي واش اديري

حاجة دريها في بالك مليح الراجل سواء قالك ولا مقالكش عن فكرة التعدد فهو راهو دايرها في باله لانها حاجة من حقّه

غير فوتي الموضوع هذا معاه

__________________________________________________ __________

>>>> الرد الثاني :

سبحان الله

تناقشينه في موضوع غيبي

لا يعرفه لا أنت ولا هو

والموت أقرب إليكما منه

__________________________________________________ __________

>>>> الرد الثالث :

بعد الزواج يتبدل مي كي تكوني انتي معاه مرا

ماتتقليقيش
ربي معاك

__________________________________________________ __________

>>>> الرد الرابع :

حرت وش ننصحك

لانو حنا النساء نحبو هذاك الراجل لينا وحدنااا ووووو


وسبحان الله حكايتك هذي ااوه فكرتني ببزاف حوايج ااااااه


اتفهمي معاه ضوك خير

الرجال يعرفوو يطبقو الشرع غير فالتعدد


حسبنا الله ونعم الوكيل

اتفهمي معااااااااااااااااااااااه متخليهاش حتى تتزوجي ويدخل عليك الزاوجة


الصراحة معرفتش وش نقلك اوووف اوووف

استخيري واستخيري وادعي وربي يسهلك


__________________________________________________ __________

>>>> الرد الخامس :

السلام عليكم
ممكن هو كان يشوف رد الفعل نتاعك وخلاص عند اجابته
ا اختي ماتعمريش راسك خلي كل شي للوقت..ماتسبقيش الاحداث

ربي يهنيكم