عنوان الموضوع : زوجي سرقني مشكلتي
مقدم من طرف منتديات العندليب

السلام عليكم
[انا حكاتي ومافيها اني تزوجت من 9اشهر زواج تقليدي .

في ايام الاولى من الزواج زوجي قالي وريلي ذهبك
انا وريتهولو.بعد ايام جاء لي وقالي محتاج دراهم انا حرت معنديش منين نجيب
امالا ولا قالي اعطيني حاجة من ذهبك متقبلتش الفكرة ومن بعد قلت ماعليه هادا راجلي وراح يرجعلي واش دا
يامات من داك زاد عاود نفس لحكاية انا مقبلتش .هو معجبوش الحال وشنف عليا
بقيت انا نخمم منين نجيبلو وليت سلفت على اختي
باه رجع معايا نورمال
وقال خلال شهر نسلك ديوني
فاتت7 اشهر وانا نستنى حتى نوض على مصيبة سرقلي محزمة تاع ذهب وكي قتلو عليها ضربني
قالي تحوسي على لحزام ولا نحى حزامو وضربني
سمعت بماه وباباه كي كان يضرب فيا قالولي وش فيها راجلك وحقو يدير وش يحب
قلت ليما وبابا قالولي متخليش دارك والذهب مخلوف وزيد كي تطلقي راح الناس تشفى فينا
انا مبقاتليش غير في الذهب انا نبكي على عمري وين وكيفاه نتمو معاه انا طلبت الطلاق وراني حامل ضك في الشهر الثاني .وش تنصحوني


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

السلام عليكم
صراحة أختي انت في موقف لا تحسدين عليه سرقك و زاد ضربك لا حول و لا قوة الا بالله أدعو لكي من صميم قلبي ان يفرج الله همك ما كنش كيما رأي الوالدين هما وحدهم لي ما يحبولكش الضر ما تزيديش تخلي ذهبك و دراهمك في دارك خبيهم عند والديك هذا اذا قررت تقعدي عندو صراحة تقعدي عندوا مراه حل تطلقي مراه حل

__________________________________________________ __________

>>>> الرد الثاني :

ياااو ادا راجل ولا بطل....اختي غير انتي الي بيدك القرار انا ندعييلك ربي ينورك عقلك و يدلك على الطريق الصحيح و يفرج علييك عن قريب...و يهدي زوجك و يصلح بالواااااا و يفيق مع روحو ان شااااااااااااء الله...

__________________________________________________ __________

>>>> الرد الثالث :

والله موقف صعيب والحل وهو لي راح يكون بيديك

شوفي نتي ادا كان في راجلك صفات وحدو خرى

مليحة تغلب على الحوايج اللي مش ملاح لي دارهملك

وتكوني سير بلي مايزيدش يعاود وش دار طبعا بعد ما تتحاورو

بلاك الحوار معاه راح يفيدك بلاك كانت عندو سبة كبيرة باه يديلك الذهب

معلبليش مي انا نقول والله الطلاق مش مليح خلاص مهما كانت الاسباب سيرتو راه عندك بيبي في كرشك ومزالك عروس

9 اشهر زواج مزلتي سيرتو يقلك العام الاول نتاع الزواج صعيب وبلاك مبعد يتعدل راجلك ويهديه ربي

والله راني حاسة بيك وعندك الحق نتي بسكو مي زيدي اصبري شوي علاجلال وليدك

بصح لازاد عاود هادي لغلطة لكبيرة يخي يقلك المؤمن لا يلدغ من الحجر مرتين

وربي يهديييييييييييييييييييييييه ان شاء الله

__________________________________________________ __________

>>>> الرد الرابع :

والله يا اختي ربي يكون معاك اختي ننصحك ذهبك عمرك ولا تخليه في دارك او دراهمك والو وكبري قلبك مادام فيه طفل جا في الطريق واذا قالك وين راه الذهب قوليلي نحهولي بابا الله غالب وشوفي من بعد اذا عاود الفكرة قوليلو معنديش منين نجيبلك ومرة مرتين ان شاء الله يترقيل ربي يكون معاه

__________________________________________________ __________

>>>> الرد الخامس :

ربي معاك اختي راجلك يسرقك الاصل راجلك الامان ديالك لكن سرقك هادي موصيبة واش نقول لاختي دسي ذهباتك عند الاهل ديالك وقولي سلفتيهم لاختك باش يقطع لياس واصبري واش ديري.