و انتوما.... واش رايكم للنساء
عنوان الموضوع : و انتوما.... واش رايكم للنساء
مقدم من طرف منتديات العندليب
الراجل(السعيد) و مرتو(صليحة) مريحين...السعيد يتفرج على أخبار الثامنة..."أعرب عضوخطيرفي عفسة من عفايس الماركيانعن فرحه الكبير بالانجاز الدي حققته الجزائر عل الصعيد الاقتصادي
"وفجأة.. طب..صليحة فرمات التلفزيون..
-علاه فرميتيه
-واش..انتا يا تخدم يا تتفرج و انا وااااااااش
-بدينا...أيا واش تسحقي..
-ماك ناسي والو’’
-أهدري راني اسمي قريب ننساه
-عيد ميلادي فات و ما اشرتليش كادو
-يا مرا اكبري شو..
-مانحبش نفهم..
-علابالك بلي الشهرية مازال ما دخلتش..انتي عيد ميلادك في أول الشهر..و أنا يخلصوني في في نهايتوو
-و أنتا وقيل حابني انروح للبلدية انبدل تاريخ ميلادي..
-اتديري مزية
-انت ما و ليتش كيما بكري..ما وليتش تحبني خالص..وينهو حبك ليا يا السعيد وينهو..
-خرج مع حبك ليا..ضربتهم طاكسي فالطريق..ماتو..
السعييييييييييييييييييييييييد
-آه..آه..واش...يا لالة..ما ماتتش..بصح راه مخلوع من عيطتك..لوكان تزيديه وحدة تحبسيلو قلبو
شهد السعيد و استغفر..و من بعد قال لصليحة
-غدوة يا لالة نشريلك الكادو..و ضركة خليني نرتاح راني تعبان
غدوة مع ناضو الزواوش ناضت معاهم صليحة..راحت للسعيد وقفتلو عند راسو كي لعسكري..و كلعادة بكل حنان قاتلو
السعيييييييييييييييييييييييييييييييييييييييييييد
السعيد مسكين..ناض فاقد للداكرة ..من هاديك العيطة
-وووو واش..اااشكون لي مات
-ايا نوض..راح الحال..ولا انسيت وش قتلي لبارح
-مانسيتش..بصح الفيترينات قافلين ضورك
-علابالي..بصح السوق فاتح...نوض لفريجيدار راهي فارغة..و لكوزينة قع فارغة..ايا نوووض
ناض السعيد و راح اتسلف دراهم من عند جارو(لخضر)وراح للسوق..وهنالك في سوق عين المكان تأكد بنفسو من صحة أخبار الثامنة....
لمهم صرف على قدر دراهمو و روح..مد القضيان لمرتو و قالها
-هاكي..و اشفقي
-علاه أنا موالفة انفزد ولا شفتني ندي لدار بابا
ياودي الدنيا راها طايرة..واش حابتيني اندير..نسرق..
-و الله الدنيا طايرة على الناس كامل..مش غير عليك انت
-بصح انا زوالي..بيدون الزيت راه ب 61 ألف..ياربي بكري كوننا نطيبو بالشحمة و لاباس
-و من سمعك..يا الله ..بسم الله..و لا ناسي بلي عندنا شهرين..لا شحمة ..لا لحمة لا.. عظمة
-شوفي روحي قيليني خيرلك
-و حليب الطفل مونهو يشريه..والطفلة تقطع صباطها و راها تجري بالحفا..و الما لحو خلاص..وال
-و انا راني مخليهالك..عومي فيها
يخرج السعيد من دارو و الدنيا أضيق عليه من خاتم
ويخلي صليحة فالدار تبكي..و الطفل الصغير يبكي..
و الحب طيش روحو من السانكيام
وشكون منهم لغالط..هي.و لا هو..ولا الخبير المريكاني..ولا نشرة الثامنة
هداك المخلوق اللي كتب الحب في زمن الكوليرا علاه ما كملش خيرو و زاد دار الحب في زمن بيدون الزيت..
و انتوما.........واش رايكم
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
فووووووووور هاد الحكايه الغلط تاع المرا ما حسنتش عون الراجل
__________________________________________________ __________
>>>> الرد الثاني :
el denia hia li ghalta
__________________________________________________ __________
>>>> الرد الثالث :
لمراااااااااااااااااااااااااااا طبعاااااااااااااااااااااااااا
__________________________________________________ __________
>>>> الرد الرابع :
المشاركة الأصلية كتبت بواسطة lola-dms 
فووووووووور هاد الحكايه الغلط تاع المرا ما حسنتش عون الراجل
شكرا على تفاعلك اختي
__________________________________________________ __________
>>>> الرد الخامس :
المشاركة الأصلية كتبت بواسطة source de vie
el denia hia li ghalta
حتى أنا نوافقك الراي
شكرا على مرورك
رد مع اقتباس
