زيراوي وملتوخة من مطبخي المطبخ الجزائري
عنوان الموضوع : زيراوي وملتوخة من مطبخي المطبخ الجزائري
مقدم من طرف منتديات العندليب
من اطباقنا التقليدية الزيراوي والملتوخة
راح نبدى بالزيراوي لانو نفس المرحلة الاولى والمكونات تاع الزيراوي هي نفسها تاع الملتوخة
المكونات
3كيلت سميد متوسط
1كيلا سمن ذايب
ملح
ماء معاه ماء ورد او ماء زهر
زبدة
عسل .مكسرات .شامية هذي اختيارية
نبسس السميدبالسمن الدافئ كيما نعمل للمقروض ثم نرشو بالماء الدافئ لي عملت فيه ماء ورد وذوبت فيه الملح نخدم برؤوس الاصابع فقط ما نعجنش
ثم نحطو في بلا ونقصو مربعات ونطيبو في الفور
لما يطيب نفرغو ه في اناء كبير ونحاول نفتتو بالاستعانة باي غطاء لانو كل ربة بيت عندها اسلحتها المطبخية ههههههه
ونرحيه في روبو ما راحش نكونوا في حاجة للسيار لان العجينة راهي مبسسة
نرشوه بما ءزهر مثل الكسكسي ونخلوه يشرب ما نكثروش باش ما يعجنش ونحاول نحلو مابين كفوف اليد
ونحطوه يفور تفويرة اولى
ثم نفرغوه ونحلوه ونعمل قطعة زبدة ونزيدنرشو بماء زهر ونعاود تفويرة ثانية
لما يفور ننزلوه ونحلوه بملعقة كبيرة ونعملو كمية مليحة زبدة ملاحظة هنا نعمل زبدة موش سمن +العسل +المكسرا ت مرحية خشينة انا هنا عملت لوز وجوز+الشامية
ونعملو في صحن ونجملو حسب الموجود وهذي الصور للتوضيح
هذا هوسلاحي لي نفتت بيه
في الصور انا التفوير صورت مرحلة وحدة لانها نفسها
2الملتوخة
الملتوخة هي طبق نعملوه في الربيع خاصة مع اللبن
تتميز بيه منطقتنا
المقادير
3كيلات سميد
1كيلا سمن ذايب ودافئ ماء وملح
غرس منقي ومرحي
زبد ة ستار اوزبدة عربي من الافضل
عسل
مكسرات
واختياري نستلي كاراميليزي
الطريقة
نبسو السميد ونفس مراحل الزيراوي حتى نخرجوه من الفور ونفتتوه ونرحوه
هنا مانفوروشو وانما نزيدولو الغرس والزبدة وكمية عسل +نستلي ونعجنوها مليح او لي عندها البتران تستعمل البراkوتعجن بيه حتى ترطاب ونحطها في صحونة ونجملها بالموجود
اناهنا هذو الصحونة راني بعثتهم ذواقات قبل رمضان بنهار لانو من عادتنا نقرشو نهار الشك ونعملو حاجة تقليديةوواحد منهم بعثتو لام الاخوان وواحد راح نخليه لعزيزتي ام محمد تاج لانو الصور راهم عندي من قبل رمضان ووعدتها نحط ليها الوصفة ومن وعد وفى
وهذا طاس لبن باش تكتمل الوجبة
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
Veryyyy good يعطييك الصحة
__________________________________________________ __________
>>>> الرد الثاني :
يعطيك الصحة اختي
__________________________________________________ __________
>>>> الرد الثالث :
ام الاخوان مرحبا بيك وقتاه انتسبتي هذي مفاجاة سارة
سارة مشكورة عزيزتي
__________________________________________________ __________
>>>> الرد الرابع :
مشكووورة دائمة الحمد نتمنى نكون ضيف خفيف على قلوبكم
__________________________________________________ __________
>>>> الرد الخامس :
اممممممممم دائمة الحمد ربي يبارك راه يشهي ديت حقي نتقهواو بيه اليوم صباح
رد مع اقتباس
