عنوان الموضوع : نصائح لمن سيجتاز بكالوريا 2015 bac - خاصة لمن يجتازه للمرة الثانية - للثالثة ثانوي
مقدم من طرف منتديات العندليب

السلام عليكم
اولا ان شاء الله ربي يكون معاكم و تنجحو كلكم ان شاء الله
عندي بعض النصائح اولا لمن لا يجتاز البكالوريا للمرة الاولى
يعني المرة الثانية او الثالثة او الرابعة او حتى الخامسة و السادسة
لان العلم ليس عيب و لا ياس مع الحياة
العبد لله ايظا خسر البكالوريا في السنة الاولى
و اقولها لكم بصراحة ليس سهلا ان تعيد البكالوريا مرة اخرى
لكن يجب ان تكون لك القوة و الثقة لاعادة البكالوريا مرة اخرى
و الحمد لله انا ربحت الباك العام اللي فات بمعدل قريب ل14
لدلك لا تسمح لاي احد يقول لك من خسر الباك الاول صاي راحت عليه
حتى لوكان يربح الثاني يربح ب 10
مديروش عليهم و مديروش على اي واحد يحب ينقص من معنوياتكم
و كون ثقتكم في نفسكم كبيرة .. علابالي صعبة بزاف بصح كيما يقول اوباما
yes we can
بالنسبة اللي يفوتو الباك لاول مرة .. الباك هو مجرد امتحان فقط متخافوش بزاف
النصائح لنعطيها للجميع هي اولا اتكلوا على ربي و زيرو رواحكم
هدا عام فقط
حط قاع اللي عندك و مبعد ريح باش مين تكمل على الاقل تقول بلي درت اللي عليك
لانه احيانا بسبب 0.01 او 0.2 تخسر الباك او ميعطوكش تخصص جامعي كنت باغيه
انا كنت علمي لدلك لا افقه كثيرا في الشعب الاخرى
اما تخصصي اللي كنت فيه نقولكم عليه . العلوم و الفيزيك و المات منهدروش عليهم
هادوك هوما الاساس
الفلسفة ثم الفلسفة ثم الفلسفة متقولش راني فاهم و نهار الباك نخدم لا
لازم تكون معات على كتابة المقالات و ايظا متحقروش المواد الاخرى خاصة اللغة العربية لان معاملها 3
و تقدر تجيب 16 او 18 بسهولة و المواد تاع الحفظ
احفظوا كل الدروس متخلوش درس او تحفظوا غير جهة واه و جهة لا لن كل شيء يمكن يطيح في الباك
مثلا العام اللي فات في التاريخ كنت نحفظ هيا و صبت هاديك معاهدة طرابلس تاع الاستقلال
قلت هادي محال تطيح .. ايا طاحت في الباك و على 4 ( الوضعية الادماجية ) ايظا الاسلامية
انا الحمد لله كنت محظوظ لكن الكثير طاح في الفخ .. كيما تعرفو في الاسلامية كاين الجزء الاول تاع القران
و الثاني تاع السنة .. مند النظام الجديد يديرو السيجي الاول على 14 للقران و الثاني على 14 في السنة
هيا يحفظوا 4 دروس يقولك 14 مضمونة .. العام اللي فاتت دارو في زوج قران او السنة .. مرانيش متدكر ههه
الحوصلة .. المهم لازم تحفظوا كلش و متتركوش حاجة للحظ
بالنسبة ليوم الامتحان .. يعطوك 30 دقيقة باش تخير السيجو .. خيره انت في 30 دقيقة لا 5 دقائق
لا 50 دقيقة ( هاته بالنسبة لكل المواد الى العلوم و الفيزياء و الرياضيات لان كل واحد و السرعة تاعه
لانني في الباك خيرت السيجو في 5 دقائق و كملت نيشان مع الوقت لدلك مع المواد الاساسية
انت و تعرف روحك ) لكن المواد الاخرى راه عندك الوقت .. خد كل وقتك و لما تخير سيجو متشوفش
السيجو الزاوج صاي و ان شاء الله يكون غير الخير
سمحلولي طولت عليكم شوية
المهم اي واحد عنده اي استفسار في اي مجال يخص البكالوريا يراسلني على الخاص
مكانش حتى مشكل
اخوكم في الله ( سيد احمد الجزائري ) احمد مصطفى من وهران
تحياتي



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

سلام سيدو انا تاني من وهران و راني حابة بعض النصائح هدا عامي الاول باك

=========


>>>> الرد الثاني :

بارك الله فيك خويا وربي ينجحنا و ينجحك انتا تاني في الجامعة




=========


>>>> الرد الثالث :

وعليكم السلام ورحمة الله وبركاته بارك الله فيك خيي الله يوفقك وينجحك

انا اجتازه للمرة الثانية لاني رسبت بالمرة الاولى صح في الاعادة تحتاج الى ثقة وارادة كبيرة

شعبتي تسيير واقتصاد انا المشكل تاعي في الحفظ المحاسبة ديت فيها معدل والناس بزاف عاونتهم مواد الحفظ

على اية حال لست نادمة انا عملت الذي عليه رغم سوء صحتي التي كانت وكانت مشيئة الله الرسوب لعله خير

=========


>>>> الرد الرابع :

السلام عليكم سيد احمد انا هذه السنة انفوت الباك للمرة الثانية الاولى كانت في سنة 1991 و الثانية السنة الماضية و الثالثة هذه السنة ....للعم انا موظف و راني بديت في المطالعة ..هل من افادة تفيدنا بها ...

=========


>>>> الرد الخامس :

المشاركة الأصلية كتبت بواسطة la princesse imen
سلام سيدو انا تاني من وهران و راني حابة بعض النصائح هدا عامي الاول باك

و عليكم السلام اهلا بناس وهران
بالنسبة للباك الاول لازم تركز مند بداية السنة
و كيما كاونوا يقولولنا .. العام تاع الباك مفيهش عطلة
العام تاع الباك يكون غير قراية و ان شاء الله تحس بالراحة في جويلية
مين تشوف اسمك في قائمة النجاح في الثانوية
تماك تنسى قاع التعب اللي فات في العام

=========


واش رايك في اللي عاودا سبع مرات في كل مرة يشيق في الباك اكثر بحالك هاذي ارادة ولا جياح
والمعني هو انا


المشاركة الأصلية كتبت بواسطة eve4ever
بارك الله فيك خويا وربي ينجحنا و ينجحك انتا تاني في الجامعة


شكرا لك
و انتم ايظا
اتمنى لكم النجاح

المشاركة الأصلية كتبت بواسطة صفا الروح ايمانوو
وعليكم السلام ورحمة الله وبركاته بارك الله فيك خيي الله يوفقك وينجحك

انا اجتازه للمرة الثانية لاني رسبت بالمرة الاولى صح في الاعادة تحتاج الى ثقة وارادة كبيرة

شعبتي تسيير واقتصاد انا المشكل تاعي في الحفظ المحاسبة ديت فيها معدل والناس بزاف عاونتهم مواد الحفظ

على اية حال لست نادمة انا عملت الذي عليه رغم سوء صحتي التي كانت وكانت مشيئة الله الرسوب لعله خير


واه راني حاسس بيك و راني حاس بهداك الاحساس تاع تعاود الباك
و تع النهار الاول مين تدخل الليسي و تشوف ناس صغار عليك يقرو معاك
و اللي صحابك في الجامعة و مين تقرو الدروس مين جديد تكره و تجيك افكار باش تحبس تماما
هدا طبيعي لكن لازم تتغلب عليها لان هاته الافكار تاثر عليك بزاف و تنقصلك من الثقة تاعك

المشاركة الأصلية كتبت بواسطة a-benrabia
السلام عليكم سيد احمد انا هذه السنة انفوت الباك للمرة الثانية الاولى كانت في سنة 1991 و الثانية السنة الماضية و الثالثة هذه السنة ....للعم انا موظف و راني بديت في المطالعة ..هل من افادة تفيدنا بها ...

نوصيك غير باش تدير هدف معين
نعرف شعال من واحد خسر الباك الاول و دار تكوين مهني و الباك في وقت واحد
ايا للاسف خسر الباك و خسر في التكوين المهني
لازم تكون عندك اولوية و تركز فيها غاية
و نقولك بان يمكن تجيب الباك و بمعدل مليح ايظا
مكانش قانون يقول اللي يفوت الباك الزاوج يخسر و ادا ربح يربح غير بعشرة
لازم تكون متاكد من هدا الشيء و نهار الباك متتوترش بزاف كيما حالتي لان الباك الزاوج تاعي
كنت في اللاوعي تاعي حاس بلي لازم نربح الباك مهما يكن و هادي تاني مشي مليحة
لانني نهار الباك ييت نفسيا بزاف
و ان شاء الله تربح الباك

المشاركة الأصلية كتبت بواسطة taiba20
واش رايك في اللي عاودا سبع مرات في كل مرة يشيق في الباك اكثر بحالك هاذي ارادة ولا جياح
والمعني هو انا


طبعا ارادة
عمره ما كان طلب العلم جياحة
هديك يقولوها زوج تاع الناس
اللي راه حاسك في الارادة تاعك و راه باغي يبلوكيك
او اللي كره و صابها سبة

بَــــــــــآآركـ الله فيكـ على النصآئح ...
جزآكَـ الله خيْرآآ..
سلآآمْ

جــزاك الله خيـرآآ
في ميزان حسناتـكـ
إستفدتــ من النصائح$$

جماعة نشجعكم شويا و انتوما ثاني
معدلاتي سابقا في : الرياضيات لا تتجاوز 6
الفيزياء ثاني 7
العلوم 10.50
و المواد الادبية تتراوح مابين 7 و 8.50
الفرنسية و الانجليزية اذا جبت 5 راني مليح

و الحمد لله العام اللي فات 2012
العلوم 13
الرياضيات 10 وكان خطأ في ادارة الوقت كنت قادر انجيب اكثر مثل بالك ufc جبت 15
الفيزياء 12
واش رايكم تحسن ملحوظ
المواد الادبية قعدت كيما هي و اللي زادت عماتها الفلسفة 5


المهم الان عندي 20 في الرياضيات و الفيزياء و العلوم ماعليش فوق 15


المشكلة تبقالي في الفرنسية و الانجليزية لأنني صفر فيهم وعقدة عندي واللي عندوا حل مايبخلناش بيه

المشاركة الأصلية كتبت بواسطة لن أركع إلا لله
جــزاك الله خيـرآآ
في ميزان حسناتـكـ
إستفدتــ من النصائح$$


شكرا لك
ان شاء الله