عنوان الموضوع : اسهل تفتيح للبشره وعلاج الهالات السودا العنايه بالبشره
مقدم من طرف منتديات العندليب

اسهل تفتيح للبشره وعلاج الهالات السودا



:تفتيح البشرة بطريقة فعالة وامنة


كل ما بافتح التليفزيون ألاقي إعلان عن الكريم الفلاني والكريم العلاني لتفتيح البشرة وتطلع البنت فى الإعلان بيضاء زي القشطة، وطبعا لو حد سألها هتقول إن السبب يرجع لكريم كذا أو كذا...

ولأن كل بنت بتحلم إن بشرتها تبقى ناعمة وبيضاء احنا عملنا العدد ده مخصوص عن طريقة تفتيح البشرة وعلاج الهالات السوداء، بس من غير أي كريمات خالص علشان تقدري تفتحي بشرتك بطريقة لطيفة وآمنة.... يلاّ معانا...


يا جماعة كريمات تفتيح البشرة مضرة جداً.. جداً.. جداً... هتقولوا ليه..؟!!

لما بنستخدم كريمات التفتيح هي آه بتفتح البشرة وبتخليها فعلاً بيضاء.. وده لأنها بتحتوي على مادة "الهايدروكينون"، والمادة دي بتعمل على وقف إنتاج (الميلانين) اللي هي المادة الموجودة داخل الجلد اللي بتؤدي إلى سمار الجلد...

طيب إيه المشكلة؟؟!

صحيح الكريمات دي بتفتح البشرة، بس برضه الكريمات دي لما بتضعيها وتتعرضي للشمس على طول بتكون النتيجة عكسية لأنها بتؤدي إلى زيادة اسمرار البشرة، وطبعاً إنت بتفتكري إنك بتستخدمي الكريم بكمية مش كافية، فبالتالي إنت بتسخدميه أكتر وأكتر، ومع زيادة استخدامها لمدة طويلة هتكون النتيجة... حدوث آلام في الجلد وظهور البقع الداكنة، مع احتمال -لاقدر الله- الإصابة بسرطان الجلد بسبب امتصاص الجلد لهذه المادة الموجودة في هذه الكريمات...

طب والحل؟!!

هاقول لك على شوية وصفات إنما جنان ومجربة لتفتيح البشرة من غير لا آلام ولا أمراض ربنا يكفيكم شرها...




ماسكات تفتيح البشرة


علشان التحذير اللي قلناه من كريمات تفتيح البشرة هنقول لك على شوية ماسكات طبيعية بتساعد على تفتيح البشرة وهي:

أولا: ماسك اللوز

المكونات:
لوز مطحون.
بياض بيضة.
نصف ليمونة.

الطريقة:
• انقعي اللوز في الماء حتى تستطيعي نزع القشرة منه.
• اطحني اللوز المقشر في الخلاط حتى يصبح بودرة.
• اخلطي اللوز المطحون مع بياض البيضة مع نصف الليمونة حتى تتجانس مع بعضها البعض.
• ثم ضعي الخليط على وجهك لمدة 20 دقيقة وقومي بغسل وجهك بماء دافئ ثم ماء بارد بعد ذلك.
• كرري هذه العملية كل يوم وسوف ترين الفرق.

ثانياً: ماسك الموز
المكونات:
موز.
ونصف كوب من اللبن.

الطريقة:
• تهرس الموزة.
• ويوضع عليها اللبن ويخلط جيداً.
• يوزع الخليط على البشرة مع التركيز على الأماكن الغامقة في البشرة.
• يترك لمدة ربع ساعة ثم تغسلين الوجه بالماء، بس المياه تكون فاترة.
• الماسك ده مش بيبيض الوجه بس لأ وكمان بيكسبه نعومة وحيوية ليس لها مثيل.

ثالثاً: ماسك البطاطسالمكونات:
ثمرة بطاطس.
لبن حليب.

الطريقة:
• اسلقي البطاطس واهرسيها.
• اخلطي البطاطس المهروسة مع اللبن وياريت في الخلاط لغاية ما تبقى ناعمة.
• ضعي الخليط على وجهك واتركيه لمدة نصف ساعة حتى ينشف، ثم اغسلي وجهك بالماء الدافئ ثم بالماء البارد... علشان غسيل الوجه بالماء البارد ثم الدافئ بيعطي للبشرة انتعاشا.
• جربي المسك ده مرة كل أسبوع وسوف تلاحظين الفرق.



رابعاً: ماسك الزبادي والليمون

من أكتر المواد التي تساعد على تفتيح البشرة الزبادي بالليمون.

المكونات:
زبادي.
ليمون.

الطريقة:
• توضع نقطة أو اثنتان من عصير الليمون على الزبادي.
• وضعي الخليط على وجهك لمدة ساعتين إلى أن ينشف هذا المسك ثم اشطفي وجهك بالمياه.


والماسكات دي بتفتح الوجه بصفة عامة، بس فيه مشكلة تانية، وهي مشكلة الهالات السوداء، وإيه هي الهالات السوداء؟ وإيه كمان علاجها؟.




عفريت الهالات السودااا




الهالات السوداء عفريت بيطارد بنات كتير... بيأثر على جمالهم وخاصة جمال العينين... واحنا بقى مش بتخاف من العفاريت وهنصرفه بعون الله.. جمدوا قلبكم... حضروا البخور وتعالوا نخلص عليه....

أصل العفريت..

الأول لازم نعرف إيه هو عفريت الهالات السوداء علشان نقدر نعالجه صح.. علشان كده جمعنا عنه شوية معلومات ومنها الآتي..:

يظهر هذا العفريت في شكل دوائر سوداء فى منطقة أسفل العين ويستغل رقة هذه المنطقة علشان يلعب في الأوعية الدموية المتوسعة والمتضخمة حولها ويبينها على شكل بقع داكنة، ويتوسع أكتر لغاية ما يظهر بشكل واضح على هيئة الهالات الداكنة حول العين..


طيب ليه العفريت بيظهر؟!!

فى أسباب كتير قوي قوي لظهور عفريت الهالات السوداء زي مثلاً:

1. السهر زيادة عن اللزوم أو الجلوس أمام التليفزيون أو الكمبيوتر، يعني الإرهاق عموماً.

2. التعرض لحالات نفسية أو ضغط عصبي أو التوتر المستمر.

3. عوامل وراثية من الآباء والأجداد.

4. التعرض المباشر لأشعة الشمس لفترات طويلة أو التعرض للدخان والغبار الموجود فى الجو.

5. تراكم الأوساخ حو ل جفن العين.

6. الإصابة -والعياذ بالله- ببعض الأمراض مثل: الفشل الكلوي أو السرطان.

7. مكن تظهر الهالات كمان بشكل واضح أثناء الدورة الشهرية أو أثناء الحمل وبعد الولادة.

8. اتباع نظام التغذية الخاطئ، وخصوصاً الإكثار من تناول الأطعمة التي تحتوي على مواد نشوية وعدم تناول الأطعمة الغنية بالفيتامينات.

9. وجود حساسية بالأنف.

معلش طولنا عليكم شوية في أسباب الهالات السوداء بس كان لازم نعرض كل أسباب ظهور الهالات السوداء علشان نعرف العلاج.

أما علاج الهالات السوداء فبيكون بطرق مختلفة بتختلف باختلاف السبب وهي:

1- احرصي على النوم مبكرا والاستيقاظ مبكرا، وذلك لأن النوم مبكرا يحافظ على نضارة البشرة.

2- احرصي على ممارسة الرياضة في الأماكن المفتوحة حتى تستطيعي الحصول على نسبة كبيرة من الأكسجين في الدم مما يحافظ في حصول البشرة على اللون الأحمر الوردي.

3- تجنبي التعرض المباشر لأشعة الشمس، وإن كان من الضروري حاولي أن تضعي كريم حماية ضد أشعة الشمس قبل الخروج.

4- حاولي أن تكثري من كثرة شرب السوائل خاصة المشروبات والعصائر الطبيعية خاصة في فصل الصيف، وحاولي بقدر الإمكان تجنب المواد المعلبة.

5- حاولي أن تتجنبي التدخين، لأن السجائر بتحتوي على مادة "النيكوتين" مما يؤدي إلى قبض الأوعية الدموية، مما يؤدي إلى تلونات جلدية داكنة، وكذلك تؤدي المركبات الكربونية الموجودة في السجائر إلى تقليل كمية الأوكسجين في الدم، فيصبح لون الجلد مضطرباً ويظهر بهذه الصورة.


6- احرصي على تنظيف الوجه من الماكياج خاصة المنطقة المحيطة قبل النوم، علشان تدي فرصة للجلد يتنفس.

7- الغذاء أهم حاجة، حاولي إنك تخلي بالك منه... حاولي تكتري الأكل اللي بيحتوي على الفيتامين (ا) وفيتامين (سي) مثل الكبده والبيض واللبن والزبدة والطماطم والرمان والجزر والسبانخ والعسل الأسود وغيرها

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

اه ياجماعه هو موضوعي مش عاجبكو ولا ايه
انا جربت بنفسي وبجد لاقيت نتيجه حلوه اوي ياريت تجربو وتقولو رايكو بجد مستنياكو

__________________________________________________ __________

>>>> الرد الثاني :

يسلمو يا عسل نصائح في محلها
الله يعطيكي الف عافيه
ميرسي

__________________________________________________ __________

>>>> الرد الثالث :

بجد ياقمر ردك زوق زيك ومتشكره ليكي يارب تكوني استفدتي اهم حاجه وجربي بجد مش هتندمي

__________________________________________________ __________

>>>> الرد الرابع :

__________________________________________________ __________

>>>> الرد الخامس :