عنوان الموضوع : بنــــات تعالوا شوفوا الاخطــاء اللي تسوونها بشعركم (وعندي لكم كم نصيحة). لشعر جذاب
مقدم من طرف منتديات العندليب

بنــــات تعالوا شوفوا الاخطــاء اللي تسوونها بشعركم (وعندي لكم كم نصيحة).



الســــــلام عليكم ورحمة الله وبركــــــــــاته


حبيت افيدكم في حل مشاكل الشعر المختلفه
بخبركم الاخطاء اللي تطيح فيها البنات و يسيئون لشعرهم و يضرونه بدون ما يدرون >>ماشالله عنك يا دكتورة مزوحية
اول شي


الشامبووو: لاحظت اغلب البنات
يستخدمون الماركات التجاريه البحته في مجال الشعر..و ترا مو أي شامبو
يبيعونه في الجمعيه زين..لا بالعكس في منهم ما ينفعون بالمره و ممكن يضرون
بعد

اول خطأ هو : البنت ما تعرف نوع شعرها...و بطبيعة الحال اغلب البنات
يستخدمون الشامبو للشعر العادي ..مع ان ممكن البنت شعرها دهني او جاف
..عشان تعرفين نوعية شعرج راقبيه...كل كم يوم لازم تغسلينه؟ اذا كل يوم
يزيت معناته شعرج دهني شديد و تحتاجين شامبووو للشعر الدهني... و اذا كل
يومين بعد يعتبر دهني..و اذا 3 ايام بعد يعتبر دهني...اذا مرو اربع ايام و
شعرج ما زيت معناته شعرج عادي
و اذا مر اسبوع و شعرج ما زيت معناته شعرج جاااااف...في بنات قمة راسهم دهنيه بس الاطراف جافه..و يتحرون شعرهم جاف ..لا هنيه الشعر ما يكون جاف..الشعر دهني بس يحتاج عنايه لاطرافه.
-------------------------------------------------------------------------------
ثانيا البلســـم:
استغربت يوم عرفت ان اغلب البنات ما يستخدمون بلسم..و لا يشوفون له ضرووره حتى
بس انا اقولكم البلسم جدا جدا مهم و لا تستغنين عنه بأي حال من الاحوال...و
دايما استخدمي البلسم اللي يناسب شعرج...مو بس تاخذين البلسم عشان ريحته
حلوه و هو ما يناسب شعرك <<< اعرف ان في بنات يسوونها

اللي شعرها دهني او عادي: تكتفي بوضع البلسم فقط على الاطراف << ليش؟
بقولكم ليش عشان ما تدهن فروة راسج بسرعه..لان من خصائص البلسم تزييت
الشعر على الخفيف...
و اللي شعرها جاف تحط على شعرها كامل عشان ينعمه و يخفف التكشيش و يسهل التمشيط..و اتم فيه حيويه و لمعان
البلسم للشعر يا بنات شرات الكريم المرطب للبشره...لازم تستخدمونه و ما تستغنون عنه ابدا
---------------------------------------------------------------------------------
:ثالثا: التريتمنت و حمام الزيت
اليوم لازم كل وحده منكم خصوووصا اللي شعرهم مصبوغ او تعبان..لازم تروح
اقرب صالون و تسوي عندهم اشتراك حمام زيت ...و تسوي حمام زيت مره كل اسبوع
او اسبوعين بالكثير...عشان تجدد فروة الراس و تنشطها...او تقدرون تشتروا
طقية النايلون وتحطون حمام الزيت وتسخنو شعركم بالسشوار بالبيت..
-------------------------------------------------------------------------------
رابعا احب اتكلم عن التقصف: اذا حد قالكم في علاج للتقصف بيكون يقص عليكم...فيه زيوت و كريمات و سيرومات تمنع التقصف...لكن تعالج نووو ويييي
ليش؟ التقصف عباره عن انقسام طرف الشعره الى قسمين...و اذا انقسمت الشعره..خلاص مافي شي يردها..شو بيلزقونها مثلا؟؟
التقصف مرض يعادي باقي الشعر..يبتدي في الاطراف و يصعد لين يدمر باقي
الشعر...و طبعا ما يخلي الشعر يطول...الحل الوحيد للتقصف هو القص

شوفو الصوره بالله عليكم ها شقا يتعالج؟

و بعدين لو كل وحده تخف من السشوار و هو السبب الرئيسي للتقصف و ايضا الفير
و الصبغات و التمليس كان ما تقصف شعرها...و عليكم بالبلسم مثل ما قلت
سابقا هو يحمي الشعر من هالمشكله

-------------------------------------------------------------------------
خامسا القشره
القشره عدو الشعر و سبب التساقط و خف الشعر...و عن تجربه مافي شي احسن عن
شامبو نيزورال << ينباع في الصيدليات...وقطوا عنكم هيد اند شولدرز
بيسبب لكم صلع مع كثر الاستخدام..هالشامبو تجاري بحت و مب علاج
-----------------------------------------------------------------------------
سادسا: اسباب تساقط الشعر



اسباب تساقط الشعر وايد منها سوء التغذيه و الريجيم...و ممكن الوحده طول
النهار تاكل و تقول لا انا مافيه سوء تغذيه<< اذا الوحده تاكل فاست
فود و شيبس و كاكاو و مكسرات و مشروبات غازيه ها وين بينفع شعرها؟؟
صح انتي شبعانه..بس شعرج افتقد وايد من الفيتامينات اللي تساعده

ثانيا كثر المشاكل و الهم و الغم و الحزن و التفكير: الحاله النفسيه تأثر
وايد سواء على الريال او على الحرمه و تسبب تساقط شديد للشعر ..فما يسوي
الواحد يعالج من برى و الاسباب الداخليه موجوده..مافي فايده!!

ثالثا: كثر صبغات الشعر و التمليس و السشوار تبهدل جور الشعر و تسبب
التساقط...و طبعا ما نقدر نحدد الفتره الزمنيه بس كل وحده و مدى تحمل
شعرها..و اغلب الصالونات اللي عندنا يصبغون و لا على البال همهم البيزات خل
شعرج يتقطع هم اشعليهم!! الحل هني كل وحده المفروض تعرف مدى قوة تحمل
شعرها..اذا الشعره نفسها ناعمه و خفيفه ترا ما يستحمل الهايلايت الا مره في
السنه و الصبغ كل 4 شهور بالكثير...و اذا الشعره نفسها غليظه و قويه هنيه
مب مشكله بس لا تحملين شعرج اكثر عن طاقته...و عموما اغلب الحريم يوم تصيرلهم مشكله سارو اقرب صالون و خبصو في شعورهم..فأقولكم في هالحالات لا تظهرون قهركم على شعركم المسكين

رابعا: بعد الولاده هاي من اكبر اسباب التساقط و هاي تعتبر مثل دورة تجديد
للشعر فلا تخافين بس اهم شي تهتمين في شعرج هالفتره عشان تضمنين ان شعر
يديد بينبت مكان اللي طاح.
-------------------------------------------------------------------------------
و نوصل لاخر نقطه اللي هي استخدام الزيوووت:




يوم تحبين تستخدمين زيت معين هاي اهم الشروط

1.استمري على الزيت نفسه مده لا تقل عن شهر عشان تشوفين نتيجه..لا تخلطين زيوت و كل يوم تحطين نوووع..لا ابتعدي عن هالخطأ

2.اذا تبين خلطة زيوت ابدا لا تاخذين خلطه جاهزه من العطارين<< ما
تعرفين شو من الغش حاطين فيها..اشتري كل زيت بروحه و خلطي روحج.

3.اذا جذور شعرج ضعيفه بتلاحظين تساقط في بداية استخدام الزيت

4.لا تخلين الزيت في شعرج اكثر عن 3 ساعات << اذا جذور شعرج ضعيفه و
خليتي الزيت في الشعر فتره طويله جذر الشعر يثقل و يطيح.و عموما عقب 3
ساعات الجسم ما يستفيد من أي شي تحطينه عليه << ما تشوفون الحنا ما
يخلونه الا شوي و الصبغات ايضا..لان الجسم عنده فترة امتصاص معينه

5.مافي داعي تتسبحين بالزيت و تغرقين شعرج فيه عشان الفايده...دايما
استخدمي مقدار غطاه او غطاتين في فروة الراس..ليش تحطين على اطراف الشعر؟
تراها ما تمتص و لا فيها فايده الا اذا بغيتي تنعمينها..و هنيه البلسم يفي
بالغرض

6.فايدة الزيت من شخص لين شخص تختلف حسب نوع جلدة الرأس
---------------------------------------------------------------------------------

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

اسعدك الله وحماكي يااختي العزيزة

__________________________________________________ __________

>>>> الرد الثاني :

__________________________________________________ __________

>>>> الرد الثالث :

__________________________________________________ __________

>>>> الرد الرابع :

__________________________________________________ __________

>>>> الرد الخامس :