عنوان الموضوع : من فضلكم نصائح لمشكل بنت خالي مشكلتي
مقدم من طرف منتديات العندليب

السلام عليكم اخوتي و اخواني في الله . صح رمضانكم , ربي يبلغنا و اياكم اجر هذا الشهر و يعتقكم من النار ....اللهم اميين

جيت نحكي لكم مشكلة اعز انسانة ليا . و هي بنت خالي التي تبلغ في العمر 26 . متدينة و مثقفة . بصح دارت غلطة بحيث تقدم شاب لخطبتها و هاذ الشاب متدين و خدام في بلاصة مليحة . عائلته طيبة , فاعطت موافقة مبدئية بصح الشاب مازال ما جاش للدار مع فاميلتو . و فاميلتو على علم و يستنوا برك موافقة خالي يعني والد البنت باش يتقدمو .
ولكن في نفس الوقت جا لها ميقري . يعني شاب من فرنسا ثاني مليح فغيرت قرارها في اللحظة الاخيرة و قبلت el migrie
و هذاك الشاب الاول تعذب كثيرا و توسل اليها بش ترجع عن قرارها بصح لا حياة لمن تنادي و بعد اتمام خطوبة بنت خالي تبين ان خطيبها موش مليح لا اخلاق و مقلق بزاف , ما يحتارمهاش , يقوم بتهديدها في التيليفون و تعذبت بزاااااااف لمدة عامين و نص الى ان تم فسخ الخطوبة لان خطيبها ما عندو خدمة و بيت و ثاني شي تبين انو على علاقة بامراة ثانية في فرنسا .ناوي يتزوج معاها .

دورك الحمد لله بنت خالي تحسنت و ندمت لانها استعجلت في الامر و ظلمت الشاب الاول .دعات ربي يسامحها و يهديها
و قبل ايامات برك , قبل رمضان ب 15 يوم عاود رجع الخاطب الاول و كانت مفاجئة كبيرة لبت خالي . ما امنتش و كانت مفكرة انو متزوج و عندوا بلاك دراري ...... بصح ارجع يسقسي عليها و رجعوا مع بعض بعد ان طلبتلو سماح و هو فرح بزاف لانو ما قدرش ينساها .

و لكن بيومين برك قالتلو بنت خالي انها سايي تكلمت مع بابا و يما و راهم قبلين بك و طلبت منو يهدر مع يماه و و يتفاهمو على الموعد , يجي يخطبها و هكذا تكون الامور سيريوز .
و رد لها .. عندي مشاكل مع يما و خممت مليح نحب نتفارق لبعض الوقت . و ما تخافيش ما عندك اي علاقة فهاذو المشاكل , ماشي انت السبة . كي نفري مشاكلي نرجع ليك و نخطبك .
بنت خالي تفهمت الامر و قالتلو il ya p'as de probleme خذ راحتك انا نستناك و نصبر حتى تفري مشاكلك و يفرج ربي و ما نتخلاش عليك ابداااا . بصح هو قال لها ما تستناينيش , كملي حياتك , ما نضمنكش و ما نوعد لك والو ...... الا جاك شاب مليح قبليه , ما تستنايش حتى نرجع .
من هذاك اليوم ما بان خبر عليع . لا سلام و لا سقسا عليها .بدون اي سبب مقنع . و هي تتعذب اليوم و زعفانة عليه و فهمتها استهزاء بشرفها و ما على بالوش واش يحب . pourtemp كان فرحان كي رجعتلو بنت خالي و صمم يخطبها في اقرب الوقت . بصح فجاة تبدل و شوكات كي سمعت الخبر .
دورك راهي خايفة يكون انتقام لها . رغم انه حلف بالله انو سمح لها و جامي ناوي ينتقم عليها. و اليوم حلفت بالله ما ترجعلوش خلاص... و تقول لي يحب يرتبط بي رغم المشاكل ما يبعث ليش هاذو الكلام '' ما نضمنش ...... ما نوعدش....

ما هو العمل و الله نحب يكونو ا مع بعض . نحب ننصحها مع العلم انهما يسكنوا بعاد . الشاب من العاصمة و بنت خالي هنا في منطقة القبائل .
واش ننصح لها
تنساه كامل و ترفض رجوعه ؟
تامل بربي و تدعي ؟
تستناه و تصبر حتى يرجع ؟
و اذا رجع كيفاش دير ؟ تعاتبو و ترميه ؟ ولا تقبل به نورمال ....


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

لي تعليق بسيط على الشاب.....
عجيب أمر هذا الشاب , رفضاتو و بدلاتو كيما يقولوا بالعامية عيني عينك .
و بعد أن سمع بفشل علاقتها بالثاني , فرح و تقدم إليها مرة أخرى .
أين الكرامة , أين عزة النفس , أين , أين ......
لا أدري ؟؟

__________________________________________________ __________

>>>> الرد الثاني :

اختي هد الخاطب يمكن رجع باش ينتقم منها و الله اعلم لانها هي تخلات عندوو اختارت الانسان الخطا قوليليها تكمل حياتها و ما تسناه احسن و الاجا انسان محترم يخطبها تقبل و تنساه احسن لانو راه في عمرها 26 و قطار الزواح ما يستناش

__________________________________________________ __________

>>>> الرد الثالث :

السلااام عليكم
اختي هذا اكيد جا ينتقم
وصرااحة بنت خالتك ظلمتو بزاااااف كان عليها هي ايضا ان تعرف ان قلوب الناس ليست حجرا
اعطته الموافقة وممبعد بدلتو كيلقاات اللي خير منو مادياا
انا من رايي تشوف حياتها وتنسساااه لانو مستحيل يولي
ولو انا في مكانو عمري مانولي
مشكووورة

__________________________________________________ __________

>>>> الرد الرابع :

بنت خالي ندمت و حست بلي دارت .و لكن دارت كولش بالاستخارة و ربي خير لها الثاني و كتب ربي . و ايضا لم يكن زواج المادة بل الدين و خير دليل ما كان عندو خدمة و لا بيت ... و كان يطلب العلم زعما و كان اخ ملتزم بالحيى و القميص و كان يهدر برك على الدين . كان يدير المحال بش تقبل بنت خالي . فبعث امام و اشخاص كثر باش تقبل و في الاخير اختارته و كتب ربي تبين الضد
و مع العلم لم تكن زوجة للاول و لا خطيبتو . يعني كانت غريبة له . يقولون البنت يخطبوها 100 و يديها واحد و كل فتاة في هذه الدنيا تخير المخير
كل امرء خطاء و خير الخطائين التوابين

ان كان ردكم بغرض اللوم و العتب فاطلب منكم ان لا تجيبوا احسن بارك الله فيكم و جزاكم الله خيرا

__________________________________________________ __________

>>>> الرد الخامس :

أظن انه مازال يردها لكن عند ما يتذكر ما فعلته يتراجع لأن من الصعب أو على الاقل يتطلب جهود نفسي لتجازوا ما فعلته من قبل في الاخير لا تلموه لأنها هي من ا أساءت له في البداية على الاقل لتعرف حجم الاذى التي تسببت فيه لكن عليها بالصبر فإذا كان راء فيه الزوجة المناسبة رغم خطاءها سيعود