عنوان الموضوع : عاااااااجل الدوال ثالثة ثانوي
مقدم من طرف منتديات العندليب

خاوتي انا مافاهم والو لا فالدوال ولا فأي حاجة فالرياضيات واش ندير؟


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

عادي صحيح فالباك لم ااخد ماكنت استحق في الرياضيات و لم تكن نتاىج جديرة بما عملته و التقدم اللذي احرزته على كل ساقدم لك مجموعة من النصاىح بحكم انني اعرف جيدا ماتمر به
عادي جدا و الله راك تقول ماتفهم والوا فالمات مما يجعلني افكر انك الاشتقاقية و النهايات عندما درستهم العام الماضي لم تفهم شيىا و الان تقول بلي راو راحلي بزاف و تشوف الكل يعرف يحل عادي دوال لكن انت متعرف والو حتى دالتا متعرفش تحسبوا كيما حالتي و الحصر ماتعرفش ديروا و جدول تغيرات ماجي ديروا و ادا درتوا تلقا تناقضات و اذا سلكتها و لحقت للرسم تلقى كذلك تناقضات ،
و قوانين الاشتقاقية تغلط فيهم ووووو
قبل كل شئ توكل عل الله وبدا عملك ببسم الله
انا ننصحك تكون اجوغ مع لبروف تاع المات حنا و الله الحمد لله كانت عندنا استادة ما شاء الله كل ما تكون حاجة تاع العام الماضي تكتبلنا تدكير
و عند رجوعك الى المنزل حل الاسىلة تطبيقية هدوك السهلة نعم انا نقولك معظم الاحيان الاشياء الصعبة ما هي الا تركيب لهذه المعارف البسيطة و اذا لمتفهمها بشكل جيد لن تستطيع الاجابة و كاين شرط الاسىلة هنا نتا دير الحل كانت الاستادة تقوللنا حاولوا ماشي لازم ديروهوملي صحاح
و الله فالبداية كنا نخلطوها و نغريسيو المات لكن مع مرورالوقت تولي غاع ماتغلطش بتوفيق الله

ثم دورها مع تمارين تاع الكتاب المدرسي و تلقى الحلول فالهباج اتذكر انني لم اعمل بها حتى مور اختبارات تاع الفصل الثاني لانني لم اكن احبها و كنت بديت نفيق انني واقيل انا ماشي حمارة للدرجة حيث عند حلي تمارين ساعات اقترح اجابة صحيحة و لكن لا اكمل و ساعات لا اعرف طرق لانها درست في العام الماضي ببساطة لم اكن اعرف ماهو الصواب من الخطا
و هذه السلسلة جيدة لانك تجد كل الطرائق و منهجية الاجابة و تمارين الكتاب المدرسي احسن مرجع حتى الاساتدة يديو منها لكن فقط يغيروا صيغة الاسئلة على كل انت ابدا تحل و ماطولش بزاف الهدف هو انك تغلط بزاف و تصحح لروحك بزاف و التمرن هو الصح فالرياضيات


و عند الانتهاء من تمارين كتاب مدرسي يولي عندك رصيد معرفي متقعدش تغلط فالاشتقاقية او النهاية او كيف تحل المعادلة لدراسة اتجاه التغير و من ثم كانت الاستادة ذائما تقدم لنا سلسلة تمارين و هنا التطبيق لما تعلمته من خلال حلك للتمارين
هنا لازم نتا تحلها انت تحط راسك و تقترح الحل عادي اقعد سوايع حتى تلقى الحل لازم تكون سامط او عاود ولي غدا مثلا و كل مرة اقترح حل هنا اتكلم عن الاسئلة لي جيك صعبة

و في الاخير حل موضوع هذا هو الصح اتوكل على الله و اعمل الاشياء التي تعرفها ثم التي لا تعرفها بالاك تزعف اذا لقيت كاش حاجة معرفتهاش هكذا صراتلي فالباك على جال سؤال معرفتلوش هردت غاع السوجي باخطاء حسابية و كانت اسىئلة كنت قادرة نجاوب عليها عادي لكن ،،،
اذا حداري و الاسئلة التي تكون صعبة اقراها جيدا و عاود اقرا انا هكذا افعل ثم اتركها و كي نعود نولي نلقى الحل لانها غالبا تبانلنا صعبة لعدم فهمنا ماالمقصود من السؤال
و المات جامي جامي تخدم بمسودة هذه قاعدة لن تتغير تأمن حياتي غاع جامي خدمت بمسودة فالباك جاتني شطارة المسودة
لكن استعمل المسودة فالحل كاش سوال مراكش سور فيه باش متوسخش الورقة
و في تمارين الهندسة دائما دير رسم مرات تكون كاش زاوية قائمة تبانلك فالرسم و غالبا يعني تسهيل للطريقة المستعملة (فالباك مدرتش رسم و كان واحد السؤال استنتاجي على كل اذا دائما تفعل الاشياء التي تفعلها مكاين حتى حاجة متخليكش تدي مليح و لكن اذا جي تغير طريقة و تسني نفس النتائج ،،،،)
و يجب دائما البدا بتمرين الدوال اعلى علامة ثم الهندسة ثم اعداد مركبة ثم المتتاليات ، (انا لم احترم هذا التنظيم فالباك رغم انني لمدة شهر و انا نحل مواضيع بهذه الطريقة )
و مجوزش العام و انت تقول انا مقريتش من قبل المات دوك كاين بزاف اشياء منعرفهاش و تولي موسوس دوك تروحلي على جال حاجة لم ادرسها العام الماضي ، انا نقولك صح الرياضيات متسلسلة و مرتبطة و السنة الاولى نعلموا الحساب و كل الطرق التي تحتاج اليها في الثالثة اما الثانية يبداو دروس تاع الصح و لكن هذه الدروس راح تعاودها و مكاش حاجة مراحش تشوفها هذا العام لازم تصبر و كي يشرح الاستاد بلع فمك و اسمع
و هذا رابط الهباج https://3as.ency-education.com/habbaj-math3as.html
و هذه مجلة مليحة مواضيعها https://hanifimaths.com/site/news.php?action=view&id=59

=========


>>>> الرد الثاني :

شكرا على المجهود للعلم انا معيد للبكالوريا و ديت فالباك اللي فات 1

=========


>>>> الرد الثالث :

على كل اذا لم تفهم شيئا ارواح نفهمك اذا استطعت فقط. اطرح اسئلة محددة ،

=========


>>>> الرد الرابع :

خويا كاين كتاب الحديث مليح بزاف وزيد مبسط
والله غير مليح ليك مادامك قلت مافاهم والو
https://www.mediafire.com/?6dqpyqflkkr6lbr

=========


>>>> الرد الخامس :

عندي كتاب الحديث ملي شريتو العام اللي فات بصح مانيش نقرا منو
هدي فرصة باش نقدر نحضر روحي أكثر

=========


عندي كتاب الحديث ملي شريتو العام اللي فات بصح مانيش نقرا منو
هدي فرصة باش نقدر نحضر روحي أكثر


مساء الخير
مام انا منعرف والو في المات والطامة الكبرىي منيش نقرى فيها كامل نقرى غير في الفيزياء

مساء النور اختي
الطامة الأكبر اني معيد,وماكينقدرش نقرا اي حاجة سورتو المات و الفيزيك
ولازم نجيب على الاقل 7 فالمات و 10 فالفيزيك فالبكالوريا

يا اخي كيفاه تقول ندي فلمات عل اقل 7 والله غير عيب
خويا لحال او مازال وزيد لمات راهي ساهلة قادر تدي فيها حتي 17
اقرا برك ومتخافش

الطامة الكبرى عندي انا تاثني باسكوا مام انا معيدة ونكره المات ومنقدرش نقراها
المهم ربي يفرج علينا
منكذبش عليك راح انحاول اني نقراها ونفهمها .

نشاالله نفهموها قبل فوات الأوان
تحياتي

شكرا على المرور في انتظار اسئلة كثيرة في الرياضيات و الفيزياء

خويا أي حاجة ما تفهمهاش اطرحها هنا في المنتدى ابحث عليها في النت في الكتب وراح تفهمها بإذن الله

++ غدوا إن شاء الله السبت يعني قاعد في الدار واش لو كان تحط عهد على روحك بلي تقرا غدو إن شاء الله 4 ساعات رياضيات وحدها


علابالي راكم في الدوال

ابدا بالدرس المكتوب في الكراس افهمو حبة حبة وما تفوتش حتى حاجة بلا ما تفهمها يا لوكان تقعد معاها زوج سوايع

مثلا اقرا الدوال العددية وحدها يعني اول نشاط درتوه في الرياضيات وفيها النهايات والاشتقاقية وجدول التغيرات وحوايج ساهلين خلاص كون تفهمهم ويولو يبانولك تافهين

ومباعد روح حل التمارين الاولين تاع الكتاب

وردلي خبر العشية وش درت فيها

والله الرياضيات حلوة بزاااااااااااااااااااف لو كان تحبها وكي تحبها تفهمها

متتصورش الفرحة اللي تجيك لما تحل تمرين صحيح او الدالة ترسم الرسم ويجي متطابق مع جدول التغيرات ياو تحس بروحك أينشتاين

غدوة إن شاء الله ندخل نشوف وش درت فيها

كلامك منطقي و صحيح لكن لمن يملك قاعدة رياضية
مادا عني ؟ لا أملك اي معلومة رياضية الا البديهيات مثل 1+1
صدق او لا تصدق!