عنوان الموضوع : نصائحي لاخوتي في الله ,,,,,,,,,,,,, بكالوريا علمي
مقدم من طرف منتديات العندليب


في الاول دعوني أقدم نفسي انا كنت طالب شعبة علوم تجريبية تحصلت على شهادة البكالوريا بتقدير جيد 15.35 و الحمد لله رحت للتخصص لي حبيتو من صغري المهم راني جيت نفيدكم و نعطيكم نصائح لي راح تفيدكوم بزاف او نبهكوم على أخطاء لكي لا تقعو فيها ﻷني اتذكر كيف كنت الصيف الفائت حائر و العديد من الاستفسارات كانت تحوم في رأسي نصيحتي الاولى لكم هي أن لا تتحمسو أكثر من اللزوم في التحضير اغتنمو هذه العطلة في الراحة و الاستمتاع فقط لا حفظ للتواريخ لا للمصطلحات ﻷنكم و الله ما راح تشفى على ولى شي ادا بديت من الان ربما نقولك ركز على اللغات شوية فرونسي او انجلي بلاك عدا دالك أتركو حتى تلحقو او تبداو تقراو او تفهموها من عند الاستاذ هذه نقطة

النقطة الثانية ان تكون à jour مع الدروس لي راح تتلقاها خاصة في التاريخ و الجغرافيا و الشريعة مواد الحفظ باختصار او هادي غلطة تاعي انا ما كنتش نحفظ طميت كلش في الايام الاخيرة تاع الباك بصح الحمد لله ثقافة عامة تقدر تسلكك ﻷنو واش راح تقراو حاجة مليحة ماشي صعيبة باش تفهم على العكس الحرب الباردة هايلة و الجزاير من بكري نقراوها يعني لا خوف كتير عليك بصح حاول تحفظ ما تخليش الدروس تتراكم

النقطة الثالثة و الهامة جدا هي المواضيع لي راح تدربو عليها خاصة في الرياضيات و الفيزياء و العلوم ,,, انا ننصحكوم تكتفو فقط بمواضيع البكالوريا و انا مسؤول على ما اقول أبداو حلو من 2017 ل 2015
و الله لوكان تحلهوم بفهم تضمن 18 في تلك المادة عادي و اخطيكم من التمارين الصعبة ﻷن فيها تكسار الراس برك كاين بزاف لي يحبو يحلو فمهوم يقولك لالا انا نحل تاع الباك او نزيد لي سيري او نزيد تاع الزاد او نزيد تاع شيخنا او نزيد او نزيد خلاص خليواه يحكي دوك تدخلو تقراو تشوفو الوقت شحال يولي ضيق او شوفو ادا السيد راح يستفاد على العكس هو لي ماراحش يخدم ﻷنو كان يخلط برك في المواضيع و التمارين الصح هو الافكار و الفهم كل تمرين فيه فكرة هاديك هي لي تهمك انت مواضيع البكالوريا مدروسة من قبل مختصين يعني فيها تسلسل في الافكار و تدرج في الصعوبة اضافة الى أنها شاملة للوحدات تمس كل جوانب تلك الوحدة ﻷنو في الباك يختبروك على كل صغيرة و كبيرة اما مواضيع هنا و هناك فتجد أحيانا أخطاء و أحيانا سؤال بدون معنى و انت تخاف او تتفرفش او لفهامة تروحلك تولي تقول مقدرتش نحل التمرين هدا خاصة في الفيزياء ياو مشكل كبير ,,,,
و نقطة ثالثة خاصة ﻷصحاب شعبة العلوم نقولكوم لي يقدر يدير دروس خصوصية غير يدير خاصة في الفيزياء و العلوم ﻷنها تتطلب فهم تجريبي من اجل التطبيق ليست مجردة كالرياضيات و أيضا الاكتظاظ راو داير حالة او الناس تضارب من أجل المقاعد الاولى راني كنت تلميد و كرهت حياتي مزية كاين ليكور المهم الناس ليكيما أنا لي يريحو في الطاولة الاخيرة ما يلحقكوم والو غير روحو ديري ليكور ﻷنو المدرسة الجزائرية قد كبرنا عليها أربعا لوفاتها مند فترة

نقطة رابعة و هي نقطة هامة جداا و هي السؤال اسأل اسأل الاستاد ما تحشم ما والو انا كنت نحشم و نريح الاخير مع الاكتظاظ علابيها درت ليكور المهم في الفيزياء و الرياضيات لا تدع نقطة من الدرس تفوت عليك بدون أن تفهم و ايضا كن دقيق في أسئلتك لا تسأل فقط من اجل السؤال بل اسأل من اجل الفهم

نقطة خامسة حاول انك تجد أصدقاء تقرا معاهم يجو لداركوم تقراو ﻷنو أحيانا الانسان يمل وحدو من الدراسة او يكره لكن مع اخرين هدا يعطيك نفس جديد انا قلت أصدقاء في المستوى يعني تقراو كيف كيف ماشي تقريه

نقطة سادسة أضرب كلام الناس بكوتبي ما تبعش بعض المواضيع تاع لجياحة انا نسميهم ماشي تاع قراية تاع هيا نحل 1000 تمرين معاا من أجل 100 مسألة من يتحداني في 200 تمرين بفففف هادي مايش قرايا كامل و مواضيع عقيمة ﻷنو المواضيع المفيدة هي لي يحط سؤال و يشاركه من اصدقائه و يعرف الجواب و يفيد به غيره ماشي يخلع الناس برك بالارقام الخيالية التي تعجزهم انا كنت أخاف أدخل لمنتدى ﻷنك أحيانا تجد مواضيع تحيرك ليالي بيضاء مع الدراسة و حل مئات التمارين تقول علماء لوكان ما جاو صح يقرااو انا قلت ماراحش نجيب الباك بكل صراحة ,,,,,
المهم دوك تبدا لقرايا او تشوفو مثل هاد المواضيع ,,
نقطة سابعة و هي هامة جدا ﻷنها راح تصادفك أنا نقولكوم نوجدكوم من الان في الدخلة تاع العام القادم يصعبولكوم شوية في المواضيع او راكو رايحين تهبطو في المعدلات تاعكوم مثلا انا جبت 13 لدالك ما تتقلقووش انت المهم اقرا و افهم و النقطة لا تهمك انت لي يهمك الفهم و التعلم من اخطائك انا باك بلون 11 و المعدل العام 12 هههه عندي صاحبي جاب الباك 14 او هو كتبولو في الكشف يعيد السنة ﻷنو كان يجيب في الفصول 10 و 9 بصح انتبه كيما كاين مؤسسات لي تصعب كاين مؤسسات لي تسهل يعني انت قيس المستوى تاعك ,,,, المهم باختصار ما تتخلعوووش كي تهبط المعدلات تاعكوم في الفصل الاول ,,,

نقطة ثامنة عدم اهمال المواد الثانوية كالفلسفة و اللغات ﻷنها بهاد المواد لي تقدر تجيب لا مونسيون
نقطة تاسعة أربح لملاحة مع الاساتدة داسرهوم باش تولي تلقى حرية في الحديث ماعهم و فتح مناقشات حول التمارين و غيرهاا لكن مع الاساتدة لي عندهوم مستوى ماشي كيما لي كانو عندي ,,,

النقطة العاشرة و الاهم هي الصلاة و رضا والديك او فعل الخير بمساعدة الناس ,,,, ساعد الناس لي ما وصلتش تدير ليكور ملقاتش شكون يقريها فهم صحابك او دعوة الله سبحانه و تعالى انو يسهلك و يعينك او ربي هو الموفق او يعطي على حساب لقلوب

و انا نبشركوم خاوتي الباك و الله ساهل أنا كنت نكسر راسي في تمارين تاع فرنسا او او او او هو يجي عادي سهل مثل البكالوريا لي قبلو اكتفي بواش مقرر عليك ﻷنو ما تنساش هاد الباك يجوزو لي في تمنراست كيما تاع العاصمة يعني كيف كيف علاش عليك تتعمق في عفايس مكاش ,,,

انا نقولكوم لي يخدم يجيك او ربي و الله ما يخليه و بالتوفيق لكم جميعا ان شاء الله كامل تجيبو الباك ,,,,,,,, تقبلو تحياتي





>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

mr66666 bzf 5oya nasa2i7 fi al9ima nochokrok bzaaaaaaaaaaaafffffffffffff w nchlh nadiw l bac w sara7a ra7 ntabe3 kima gotalena 5otwa b 5otwa

=========


>>>> الرد الثاني :

ريحتنا وخففت علينا الله يحفضك
شـــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــكرا

=========


>>>> الرد الثالث :

شُكرًآ جزيلآ أخي علَى النّصآئح ~
نقطة سادسة أضرب كلام الناس بكوتبي

هَذي عجبتني هه ~
بَآرك الله فيك و جَزآك خيرًآ ~


=========


>>>> الرد الرابع :

شكراااااا بارك الله فيك

=========


>>>> الرد الخامس :

السلام عليكم ورحمة الله وبركاته

بارك الله فيك وجزاك خيرا

=========



شكرا لكم على مروركم

لا شكر على واجب خاوتي

ربي يوفقكوم


جزاك الله خيرا اخي على النصائح المفيدة
صح فطوركم


merciiiiiii khoya baraka allahoo fiiiiiik

بارك الله فيك

شكراااا جزبلا لك أخي على النصائح رايح نعمل بيها ان شاء الله
حبيت نسقسيك برك واش درت تخصص في الجامعة

ربي يعطيييييييييييييييييييييييييك واش تتمناي في هادا رمضان ان شاء الله

وبارك الله فييييك

Tres bien dit

بارك الله فيك اختي

المشاركة الأصلية كتبت بواسطة bachar07
شكراااا جزبلا لك أخي على النصائح رايح نعمل بيها ان شاء الله
حبيت نسقسيك برك واش درت تخصص في الجامعة



انا درت تخصص رياضيات و اعلام ألي في باب الزوار أحب الرياضيات كثيرا <3

و شكرا على مروركم أخوتي ,,, ملاحظة أنا ولد و لست بنت


بالتوفيق ان شاء الله و ان كان لكم أي لبس او استفسار فنحن في الخدمة ,,, فرحونا برك بالتوفيق للجميع ,, ^^