عنوان الموضوع : الطــريقه الصحيحه لأستخدام الآي شادو.. تسريحات و مكياج موضة
مقدم من طرف منتديات العندليب

الطــريقه الصحيحه لأستخدام الآي شادو..







أكيد أنت عارفة إن الآي شادو مهم جدا في ماكياج العيون، وده لأنه لو استخدم بالطريقة الصح هيدي إضاءة وإشراقة وعمق للعين... علشان كده هنعرف مع بعض النهارده كل حاجة عن الآي شادو، علشان نعرف إزاي إننا نستخدمه بالطريقة الصح...

للآي شادو أنواع متعددة!!
فيه أنواع كتيرة للآي شادو وكل نوع من الأنواع دي بيختلف عن الثاني، وله وقت معين للاستخدام فهتلاقي...

الآي شادو المطفي أو المط
مناسب أكتر في ماكياج الصباح؛ لأنه بيدي إطلالة كلاسيكية بسيطة للعين.

الآي شادو اللامع
مناسب في ماكياج السهرات، وممكن تحطيه أسفل الحواجب، علشان تدي إضاءة للمنطقة دي.

الآي شادو السائل أو المائي
مناسب أيضا في ماكياج السهرات، بس عيبه الوحيد إنك مش بتقدري تتحكمي فيه من عند الجوانب، ومحتاج حد عنده خبرة كبيرة في وضع الماكياج.

إزاي ترسمي عينيكي بالآي شادو؟!
مش لازم تحطي آي شادو كتير أو الوان كثيرة فوق الجفون؛ لكن ممكن تستخدمي لونين اتنين وبس؛ لون فاتح ولون غامق وتحصلي على رسمة في منتهي البساطة والجمال، كمان ممكن تدمجي اللونين مع بعضهم علشان تعملي تدريج في الألوان...

وعلى فكرة اختيار ألوان الآي شادو راجع للون العين ولون الشعر ولون اللبس وأيضاً المناسبة، وعلشان يكون الماكياج ناجح ويكون الشكل جذاب ومبهر لازم تحددي كل الحاجات دي قبل وضع الآي شادو.

إزاي تختاري الآي شادو المناسب للون عينيكي؟!
فيه ألوان كتيرة جداً للآي شادو، واختيار اللون المناسب بيكون على حسب لون عينيكي؛ فلو كنت صاحبة...

• عيون زرقاء
هتلاقي إن أكتر الألوان المناسبة ليكي هي الألوان الغامقة زي الأسود والرمادي والأزرق، ولو عايزه تفتحي اللون شوية ممكن تستخدمي الروز والأبيض وممكن البني اللي بيكون مائل للذهبي شويه وممكن تحطي الأبيض اللامع أسفل الحواجب.

• عيون خضراء أو عسلية
هتناسبك البنيات كلها والبيج والبرونزي والأبيض والنحاسي والأخضر والألوان دي بتعمل ميكس حلو أوي مع العين الخضراء.

• عيون سوداء أو بني غامق
هتناسبك كل ألوان البنيات بدرجاتها المختلفة والرمادي والأسود، وأيضاً البيج والذهبي والأبيض والأوف وايت، وكمان البرتقالي مع البنيات هيكون حلو جداً.

إزاي تختاري الآي شادو المناسب لشكل عينيكي؟!
كل عين ولها ألوان آي شادو مناسبة؛ فمثلا...

• العين الضيقة
يناسبها الألوان الناعمة والفاتحة من الآي شادو وبكمية قليلة لإن كل ما كمية الآي شادو بتزيد كل ما تظهر العين بشكل أصغر.

• العين الواسعة
أما العين الواسعة والبارزة فبيناسبها ألوان غامقة وبكميات أكبر وبالشكل ده هتقلل شوية من بروز العين.

إزاي تستخدمي الآي شادو في معالجة عيوب الوجه؟!
فيه عيوب ممكن تكون موجودة في الوجه زي مثلا إن المسافة بين زاوية العين الداخلية وعظمة الأنف صغيرة يبقي في الوقت ده هتحطي لون غامق عند الزاوية الخارجية للعين، وتسحبيه شوية لبره علشان تحصلي على شكل أوسع لعينيكي، أما لو كانت المسافة بين الزاوية الداخلية للعين وعظمة الأنف كبيرة يبقي هتحطي اللون الغامق من عند بداية العين علشان تقللي شوية المسافة بينهم.

إزاي ترسمي عينيكي في المناسبات؟!
لو كان عندك مناسبة وعايزة ترسمي عينيكي بشكل كويس باستخدام الآي شادو، يبقي هتحتاجي أربع ألوان وهم...

اللون الأول: وبيكون لون محايد وبيوضع على كامل الجفن.

اللون الثاني: وده بيكون للون الأساسي، وبيكون لون اللبس أو اللون اللي إنتي عايزاه، ويوضع على منطقة الجفن من النصف وهي مثل الـbanana .

اللون الثالث: بيكون درجة أغمق بتزودي بيها الزاوية الخارجية، وبتحطيه على شكل خط رفيع فوق العين، وبعدين تطلعيه للخارج إلى آخر فتحة العين، وتخليه قريب جداً من الرموش، وعلشان تعملي شكل حلو كمان ممكن تسيبي الخط الرفيع فوق العين من غير ما تسيحيه؛ لكن لو كانت عينيكي ضيقة يبقي حاولي إنك تعملي تمويجه بالآي شادو الغامق، وممكن كمان تحطي اللون الغامق على الرموش السفلية بفرشة رفيعة جداً من منتصف العين إلى خارج العين والطريقة دي بتدي شكل أحلى وأوسع للعين.


اللون الرابع: وبيكون أبيض أو أوف وايت، ويوضع أسفل الحواجب لكي يعطي نظرة مشرقة للعين.


إزاي أعمل ميكس بين ألوان الآي شادو؟!
ما فيش قاعدة عامة في الألوان لكن فيه بعض الألوان بتعمل تناغم حلو أوي مع بعضها وبتدي انطباعات مختلفة للعين زي مثلاً...

الأسود Smokey eyes مع الألوان الفاتحة تحت الحواجب بيعمل لمسة جريئة للعين.

اللون الرمادي لون باهت شويه، علشان كده مش لازم تكثري منه لكن ممكن تدمجيه مع الأبيض أو البيج أو البني.

اللون الأصفر بيدي إضاءة وممكن تستخدميه مع الألوان الترابية.

الآي شادو الأخضر بلاش تحطيه لوحده لإنه بيعطي نظرة باهته للعين لكن بيكون حلو أوي مع البني أو الأسود أو البرتقالي أو الذهبي.

اللون الأزرق لون جميل والعين بتحبه؛ لكن من الأفضل إنك تدخليه مع لون تاني زي الأبيض أو الرمادي، وأيضاً ممكن تمزجيه مع الأسود علشان يديكي درجات الأزرق الغامق، وبيكون حلو أوي، وهو موضة هذا العام، واللونين دول مع بعض أساسيين في الماكياج الخليجي.

اللون الذهبي أو الأوف وايت أو البيج بيضفي نور على الجفن وممكن تمزجيه مع الألوان الغامقة لإنه بيدي شكل تحفة.

الألوان اللامعة ممكن تستخدميها تحت الحواجب أو عند زاوية العين من الداخل لإنها بتعمل إشراقة حلوة أوي بس بلاش تحطيها على الجفن نفسه لإن الشكل مش هيبقى حلو.

وفي النهاية أنا بانصح دايما أي بنت تستخدم الألوان الفاتحة زي البيج والأبيض والبني الفاتح لأن الألوان دي بتساعد على علاج مشاكل كتيرة أوي زي مثلا مشكلة الهالات السوداء وبتدي شكل مشرق للعين

منقوول..

>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

طرح كثير روعه ومرآ استفدت

يعطيك ألعافية يَ عسل

لاعدمناككِ


__________________________________________________ __________

>>>> الرد الثاني :

رااائعة اختي
استفدت منك بجد و خاصة في ركن الخاص بما يخص عيوني

__________________________________________________ __________

>>>> الرد الثالث :

مشكوووووره

__________________________________________________ __________

>>>> الرد الرابع :

منوورين حبايبي

__________________________________________________ __________

>>>> الرد الخامس :

سلمت يداكي