غرفة أولادي...فكرتي وإعدادي فن الديكور
عنوان الموضوع : غرفة أولادي...فكرتي وإعدادي فن الديكور
مقدم من طرف منتديات العندليب
اللهم صلّ على سيدنا محمد صلاة ترضيك وترضيه وترضى بها عنا يا رب العالمين
وعلى اله وصحبه اجمعين والتابعين باحسان الى يوم الدين:
حبّيت اليوم نشارككم فكرتي لدهان غرفة أنّوس ربي يباركلي فيه
رغم ان الصور قديمة ...
لكن قلت نحطها حصريا في هذا المنتدى العزيز على قلبي للإفادة
كانت فكرتي أنه ندهن غرفة الاولاد كما الروضة
تكون مكان يجذبهم يلعبو ويستمتعو فيه
والاكيد أنّه مانيش راح نلقا اللي يبنترلي البيت كيما نحب
وحتى ولو لقيت...راح يطلب البقرة وبنتها
والحمد لله وفقني ربي سبحانه نجسدها الى حدّ ما
تعبنا شوية في العمل
لكن النتيجة كانت تستاهل
شوفو معايا ....ومبعد نحكيو في التفاصيل
أول حاجة استعملت لا لاك وفرش الدهان طبعا ومنها لي بانسو رقاق
والالوان ..ملوّنات ..وقتها مالقيتش ملونات باهية مثلا البنفسجي ركبته من الازرق والاحمر
المهم...
أول حاجة رسمت الرشمة نتاع الوسط
يعني الحد الفاصل بين اللونين في كارتون وقصيته بهاذ الشكل
كوحدة ومشيت بيها على ساااااااااير الحوائط
وبنفس الارتفاع
خدمت بقلم الرصاص
وبعدها رسمت شكل وردة صغيرة واخرى كبيرة في الجرنال
وبنفس الطريقة البالونات والفطر وأشعة الشمس
ولصّقتهم بالغراء
ههههههههههههه
ماتضحكوش على أدواتي
ومبعد بنترت أنا وزوجي ربي يحفظه بالفرشاة العريضة نتاع الحائط الفوق باللون الازرق
وتحت باللون الاخضر
لمّا بدات البانتورا تجف نحّيت الجورنال
ولغدوة هاذيك بنترت التفاصيل من داخل
وهذا اللي ادّا شوية الوقت والجهد
بالنسبة للألوان قسمت لالاك على عدد من أنصاف قارورات الماء
استعملتهم كأوعية وكل واحد درت فيه ملوّن
شوفو البالونات
والشمس كنت حابة دائرتها كبيرة
جبت كل أحجام الدوائر اللي عندي
ماسلكتها غير المايدة
والله المايدة ههههههههههههه
لكن أشعتها بنفس طريقة الجرنال
شفتو الفطر ؟
وبالنسبة لقوس قزح هبّللللللني باه درتو
كان صعيب نحافظ على نفس المسافة باليد
وصعيب باه تلقاي 7 انصاف دوائر فوق بعضاهم في الحجم
والالوان مركبة
الحمد لله لحقت اختي عاونتني فيه والاّ كنت بديت نفشل
بالنسبة للسحاب رسمته باليد وبنترته بالابيض
وماكنتش وحدي نبدع
شوفو إبداع أنيس
ومصمّم تصميييييييييييما نعلّق الكادر اللي رسمه في غرفته
قالّك أنا ومريومة
نتمنّى تعجبكم الفكرة
وتكورجو وتنفذوها
بأي رسومات تحبّو
ممكن دوائر ساااامبل وبألوان مختلفة وتجي باهية
تفرّحي أولادك
وتفرحي أنتي خاصة وأنك تعبتي فيها
انجازها تطلّب منّي 5 أيّام متتالية عمل متواصل
لكنّي فخورة بها
دمتم في حفظ الرحمن
ماتنسوش الدعاء اخواتي
ربي يحفظ اولادنا ياارب ويصلحهم وينبتهم نباتا حسنا
اللهم استخدمنا وإيّاهم ولا تستبدلنا
>>>>> ردود الأعضـــــــــــــــــــاء على الموضوع <<<<<
==================================
>>>> الرد الأول :
كلمة ...ل...أنيس...
حبيبي...
لقد أعددتها حينها بكلّ حبّ وعزم...
وتمنيت أن تقضي فيها أجمل أيّام الطّفولة...
فلو أنّك مررت يوما من هنا
سواءا كنت ُ الى جانبك أو لم أكن
...فاعلم يا قرّة عيني...
أنّي تمنيت ككل أم...
وفي كل يوم
أن تكون أفضل الناس على وجه المعمورة...
رجلا حقّا...حاملا لكتاب الله بإخلاص
...فليوفقني ربي سبحانه لتربيتك
وليوفقك ربي لما يحب ويرضى
__________________________________________________ __________
>>>> الرد الثاني :
ما شاء الله روعة
يعطيك الصحة
__________________________________________________ __________
>>>> الرد الثالث :
المشاركة الأصلية كتبت بواسطة nacimata 
ما شاء الله روعة
يعطيك الصحة
جزاكي الله خيرا اختي ربي يبارك فيك
__________________________________________________ __________
>>>> الرد الرابع :
ماشاء الله رووووووووووووووعة ربي يخليلك أنيس
__________________________________________________ __________
>>>> الرد الخامس :
المشاركة الأصلية كتبت بواسطة أم فاطيمة
ماشاء الله رووووووووووووووعة ربي يخليلك أنيس
ربي يبارك فيك اختي
اللهم اميييييين
ويخليلك كل غالي عندك
رد مع اقتباس
