عنوان الموضوع : مشكلتي في القسم مشكلة
مقدم من طرف منتديات العندليب

السلام عليكم ورحمة الله
مشكلتي يا اخوتي في القسم المكان انا هذا العام رابعة متوسط طحت في قسم مختلف تماما على العام ليفات نعرف فيه غير زوج بنات برك ...المهم انا في بداية العام هدرت مع وحدة مانعرفهاش مليح قتلها اذا تجي تقعدي معايا قاتلي ايه وقعدنا ولكن مع الوقت جات صحبتها اللي تحبها بزااف قاتلها ارواحي تقعدي معايا نورمال راحت وخلاتني ...مادرتش عليها وقعدت وحدي ....منبعد جات الشيخة المسؤولة وبدلتي البلاصة حطتني مع طفل في بلاصة كامل عيانة قدامي طفل قبلي دراري ومورايا دراري ...جامي شفتها في حياتي ....انا تجينيت من هاذاك الطفل اللي قاعد قدامي وواحد مورايا يهدرو غير العيب ويسبو ..هدرت مع الاستاذة تاع الرياضيات مالقاتش كيفاه قعدتني البلاصة الاولى برك باش ما نكونش غير في وسط دراري وبدلتي البلاصة مع هاذا الطفل علاخاطر ما حملتوش ...وزادت قعدتني مع واحداخر بصح عاقل عليه ....وباقي المواد راني نقعد مع الطفل الاول وهو دائما يتصرني ويقولي علاه ما تهدريش والله خطرا اداربت معاه وقالي عندك عقلية تاع دراري اهدري شوية وقصري لا حول ولا قوة الا بالله ....عندو ختو استاذة التربية التشكيلية تقرينا رحت احكيتلها قاتلي خويا عاقل برك يحب يقصر ودوك نزيد نحكمو .....ما فاتوش ليام مليح زدت خطرا تصرني اكثر يغني عليا ويقولي كلام عيان قتلو اعرف واش راك تقول قالي كي زعما محتجبة ما نهدروش معاك ولا كيفاه ...انا هاذي تاثرت بيها والله حتى وليت نبكي
انا ما سكتش جبت بابا وحكيتلو كلش جا هدر مع السورفايونت والاستاذة المسؤولة قاتلي خلاص دوك نشوفلك حل
بصح قاتلي سيي حوسيلي شكون تبدل معاك بلاصة وانا ما ظنيتش يقبلو يروحو يقعدو مع هذاك الطفل كامل
ما فهمتنيش الشيخة قتلها كاينة وحدا راهي حابة تقعد معايا هي فهمتها راهي حابة تقعد معاه قاتلي خلاص دوك نشوفو ....دوك انا كيفاش نقنع الطفلة باش تقعد معاه علابالي ما تحبش علاخاطر قاتلي نورمال نقعد معاك انت


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

و الله ملقيت وش نقولك اسـفهـ

__________________________________________________ __________

>>>> الرد الثاني :

سمطيييييييييييييييه احسن حل للدكورا الي زيوووو

__________________________________________________ __________

>>>> الرد الثالث :

يعجز اللسان عن الكلام

__________________________________________________ __________

>>>> الرد الرابع :

يوجد حل واحد فقط : إبحثي عن طاولة إضافية و إجلسي فيها و حدك لا يهم إن كانت في أخر الصف , لأن من له رغبة في الدراسة لا يعيقه أي شيئ ............... و أنا شخصيا كنت نحب البلاصة الأخيرة في القسم و الحمد لله كنت تلميذ جيد في دراستي وكنت نجيب المركز الثاني في النتائج خاصة في مرحلة الثانوية .


__________________________________________________ __________

>>>> الرد الخامس :

قوليلهم يخلوك في الطابلة الاولى في الصف وحدك هك تقدري تبعي مليح وما يكونوش حذاك الذراري