عنوان الموضوع : هل يمكن ان تغير المرأة الرجل ؟؟؟ مشكلتي
مقدم من طرف منتديات العندليب

السلام عليكم و رحمة الله و بركاته ...
لطالما آمنت انو ماكانش شخص سيئ بطبعو كان عندي ايمان انو اي شخص الظروف هي اللي تخليه اما ايجابي او سلبي ... و حتى الشخص اللي تصرفاته غير سوية قادر اذا لقى ظروف معينة يتحسن و يتغير

هادي كانت قناعاتي ..........

بعد تجربتي الخاصة لقيت روحي مع شخص مضطرب و مزاجي بكل معنى الكلمة حاولت نغير
شخص يحبك و متمسك بيك بين ليلة و نهار يقلك اللي بينا انتهى و خسارة ضيعت عمري عليك ... انسحبت من حياتو ...
عمل المستحيل و رجع

* حاول قتل نفسو و سمعت صوت الرصاصة و قطع كل اتصال و تواصل بيه عمدا عشت الرعب و من بعد طلع ماكان والو

شخص يطلب لقاك و رؤيتك و في حالة الرفض لانو العلاقة مازال ماهيش رسمي يعتبرها عدم اهتمام و يقيم الدنيا و يصبح يتوعد و يهدد و و و

اعتقدت اني سبب عذابو و صبرت و بمعلومة اخرى عرفت انو سبب حساسيتو امرأة اخرى خدعاتو و كانو خلص حقو فيا رغم انو مصر انو لا

هل كان من الممكن تغيير تصرفاته ؟؟؟؟

بعد فوات الاوان اكتشفت انو الشخص كان مجروح بداية من اهلو و والدو بالتحديد بتهمة تهموه بيها وصلت بيه يشرب و يتعاطى المخذرات و يروح للامن و يرحل ثم امراة اخرى تركته و تزوجت

و بعد ما رجعلي حسيتو غير طبيعي لكن فهمتها متأخرة

هل كان من الممكن تغييرو ؟؟؟
هل كان بامكاني انقاذو ؟؟؟
هل اخطأت لاني عملتلو حدود و رفضت نكون معاه الا بشكل رسمي ؟؟ و هو اعتبرها تخلي عليه
هو دخل مستنقع رغما عنه ... و كم يحطمني الشعور اني جزء من عذابو و ان كان غصبا عني

ما تقولوش كلام يجبر خاطري ... قولولي كلام واقعي

كيف كان من الممكن تغييره


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يا حنونة تبانلي انتي راكي باغية تعذبي روحك بسيف .هذا الشخص ممكن راه عندو اضطراب نفسي للمشاكل الي عاشها في حياتو مي انتي ماراكيش طبيبة نفسية باش داويه. هذا الشخص لازم يعاون روحو باه يقدرو الناس يعاونوه عندو مشاكل مع دارهم الحمد الله ها الشي انتي خاطيك بغا وحدا و راحت وخلاتو انتي مكان مادخلك اذا هو فقد الثقة في النسا انتي علاه عليك تربطي حياتك مع انسان مشكاك و مضطرب نفسيا.تخيلي غدوة تتزوجي بيه و راكي عايشة معاه قادر يقتلك غير بالخلعة برك انتي مابينك و مابينو والو دار بلي قتل روحو غدوة معنتها اذا تزوجتيه قادر يدير اي حاجة.انتي ماكيش طبيبة نفسية و لا مصلحة اجتماعية انتي انسانة باغية تتزوجي و ديري دار .نقلك حاجة كاين ناس ممكن ينصلحو اذا لقاو ناس واقفين معاهم و بغاو هوما يبدلو رواحهم مي كاين ناس و الله واش ديريلهم يقعدو كيما راهم و مايتبدلوش .انتي ماتقدري ديريلو والو ماراه راجلك ماراه خطيبك راه انسان بعيد عليك .راكي باغية تعاونيه في رايك كيفاش رايحة تعاونيه.اجبدي روحك من هذا السوجي مع انو راني حاسة بيك بغيتيه على هكا راكي تتخممي فيه مي والله انتي ماتقدري تعاونيه اذا ماعاونش روحو و ماتحمليش روحك فوق طاقتها .شي اشخاص تندمي الي قتيلهم من اصلو صباح الخير و دخلتيهم لحياتك لانو تحسي بلي دخلو باش يفسدوها برك لاهوما باغيين يبعدو و لا هوما راحو و هناوك.لهي روحك في كاش حاجة و انتي ماعندك ماديريلو ربي ينسيك فيه باش تتهناي ان شاء الله

__________________________________________________ __________

>>>> الرد الثاني :

السلاااام عليكم ورحمة الله وبركااااااااته

هل كان من الممكن تغييرو ؟؟؟

ممكن لكن بعد شوط كبيــــــــر من الزمن ... بعد أن تضيعي نصف عمرك

هل كان بامكاني انقاذو ؟؟؟

ربما لكن بدون تدخل الأطباء النفسانيين لا أظن دلك فوضعه صعب لدرجة أن أقرب الناس إليه خانوه لا تنتظري منه أن يصدقك بعد ليلة وضحاها

هل اخطأت لاني عملتلو حدود و رفضت نكون معاه الا بشكل رسمي ؟؟ لا أختي ليس واجبا على أي شخص أن يعيش معاناة شخص آخر إلى باختياره هو

بالنسبة للرجل الدي تحدثتي عنه حالته جد صعبة .... وبما أنك قلت كان يشرب ويتعاطى المخدرات معناه أنه كان بعيدا كل البعد عن الله

يختفي ويظهر كما يريد وفي أي وقت يريد لا أظنه جاهزا لتكوين أسرة

كان عليه أن يلجأ إلى الله ... صدقيني أختي كما كان من المفروض على أهله أن يعرضوه على طبيب نفسي

جيد أن الله أبعدك عنه ولم ير فيه خيرا أبدا ... لا تلقي باللوم على نفسك

وفقك الله ورزقك الزوج الصااالح

__________________________________________________ __________

>>>> الرد الثالث :

و الله اختي راكي ف وضع صعب و حالة لا تحسدين عليها
لا يوجد مستحيل يمكن تغييره بالصح قد يكون الامر صعب وياخذ كثير من الوقت وللاسف لا يوجد حل سحري
اذا خممتي غير على روحك و حياتك الشخصية فمن الممكن تجبدي روحك نهائيا وواحد ما يلومك
مي ممكن حبك ليه اذا كان كبير يخليك تتحملي المسؤولية وقد يكلفك الامر ربما بعض من انكار الذات عطفا على هاذ الانسان
لي ممكن يزيد يغرق ف عالم الضياع و قادر يتحول الى مجرم
يعني هنا انتي و درجة حبك ليه و وفاءك ليه
مادام هو غارق ف مستنقع المخدرات و الشرب وامور اخرى فلازم عليك ديري مجهودك باش تجبديه من هاذ الصوالح
وديري مجهود مضاعف و اكبر باش ترديه لطريق ربي
اتكلي على الله و ديري مجهودك و حاولي معاه وادعيلو ف صلاتك ادعيلو بزاف باش ربي يهيده و يصلحو و ان شاء الله ربي ما يخيبكش
و ماتنسايش بلي ربي ارحم بيه من نفسو و منك
اذا نجحتي اختي فانتي انسانة عظيمة لانك انتشلتي انسان من الهلاك
علابالي كلامي انشائي و راني ف وضع المتفرج مي ما حبيتش نشوف للامر غير بمنظور دنيوي
حبيت نشجعك لان هذا ابتلاء من الله و الابتلاء مقياس لدرجة الايمان


__________________________________________________ __________

>>>> الرد الرابع :

من يريد ان يتغير يجب عليه ان يلجأ الى الله
بالالتزام والدعاء والاستغفار وسيصبح انسان آخر باذن الله
اما اذا اردت انت ان تغييريه فيجب عليك ان تواضبي على اذكار الصباح والمساء
ثم الدعاء ثم الاستغفار ثم الصدقة وسترين ما لن تتوقعينه
والله المستعان


__________________________________________________ __________

>>>> الرد الخامس :

يا اختي انو يتغير احتمال و ايضا. احتمال لا.
و انتي ما كنتيش راح تتكهني هل هو بوضع طبيعي ام لا ؟!
حبيبتي خمي على روحك شوية و ربي معاك