مشكلة مشكلة

[chahinez]

عنوان الموضوع : مشكلة مشكلة
مقدم من طرف منتديات العندليب

لسلام عليكم
انا مخطوبة واحب خطيبي جدا وهو كذالك فانا لا لن اتخل عنه او هو يتخلى عنى فحبنا مر بضغوطات كبيرة برهنت لنا تمسكنا وبرهنت لاهلنا انهم لن يفرقو بيننا
زوجى بما انو فتحنا يعنى عقد شرعي عندما خطبنى لم يكن يملك فرنك في جيبو هو خدام ولباس بيه مي معندوش دراهم لانو كان داير كريدي ودارهم تاع الخلصة كامل يروحو للكريدي
فتحنا لم يكن يملك مهري فقررت انو نعطيلو مهر من دراهمى قدام اهلنا على اساس انو هدى مهري وتفهمنا انو كل مايخلص يعطيني
فاصيليتي بمعنى عبارة وهاد شي عادي عندى لانو حبنا اكبر من ماديات واصلا دينا ماقالش حددو المهر وهاد شيئ رمزي وانا لولا انو هدرة تاع ناس نقلو ديرلي خاتم برك
خطيبي عندو مشكل وهو انو يحبنى يكون اول في حياتى وهدى من حقو وحق اي رجل عربي عندو رجلة بصح انا كان عندى ماضي شيئ بسيط يعنى تعرفت على واحد برك وحكينا لمدة شهر ونص وتركنا بعضنا وامام لبنات واش يديرو انا مادرت والو مهم
خطيبي يقلي كون نعرف بلي عرفتى ولا خبيتي عليا نقتلك انا راجل وعندى نيف
انا قلتلو انو هو اول واحد في حياتى وصح والله عظيم هو اول واحد
هو كي يزعف يحكى بزاف ويبدى غير يخليط يعنى يسبنى وكي نزعف منو يقلي سمحيلي وانو الله غالب عليه هو تربى هكدا وانو راح يغير العادة هادى
دروك انا مانيش نقدر نستحمل كل ماندابزو يسبنى انا نعرف بلي يحبنى ودار كل شي على جالي وهدى شي فوق راسي وعلى عيني بصح على اقل يكون احترام في علاقة وحب بلا احترام راح يجي نهار وين ينهار وانا مانيش حبا نصل معاه لهدى درجة انا ستحملت كل شي على جالو وراح نستحمل في حياة زوجية لانو انا عارفة انو مراحش نعيش حياة رفاهية ورغد وراح نتاقلم بما انو قبلت بيه وقلت نعم راح نستحمل قراري
حب نغيرلو عادة تاعو
وشي تانى لم عرفنى كان في عندى صديقات كيما لبنات تاع دروك يحكو في تليفون مع لي جات يقلي رانى خايف انتى كنتى منهم
كيفاش ندلو هدى
هو يقلي نعرفك بنت فاميلا على هدى خطبتك ونويتك تكن زوجتى بصح كون نعرف بلي خبيتي عليا راح ننقلب عليك
واش ندير نصحونى وانا والله مادرت والو هي علاقة دامت شهر ونص وكل واحد راح في طريقو
نصحونى ربي يخليكم


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

عفا الله عما سلف اذا غلطت وتبتي بالمعنى ملي زدتي عرفتي خطيبك ما حكيتي حتى مع واحد ماكان لاه تحكيلوا على خاطر يحس بلي كذبتي عليه ويولي يشك فيك

اما حاجة حبا تبدليلو طبايعو بلاك وحدوخرين يقدرو ينصحوك خير من ربي يهنيك

__________________________________________________ __________

>>>> الرد الثاني :

اختي مادام حكيت شهر ونص هداك ماضي ومادام ربي سترك ماكالاه تفضحي روحك وتحكيله باسكو هكا غادي تحطي روحك في موقف ربي العالم بيه
زيدي حباباتك هدو اجبدي عليهم وقوليله بلي بعدتي عليهم علاجاله باش يحس بالامان، بيناتنا عنده الحق يشك باسكو صحاباتك يهدرو مع كل من هب ودب
في مسالة السب فهميه وقوليله لازم يضبط اعصابه ولا يكوبي عليك خير من السب
مسالة تغيير الشخصية والله مانقد نفيدك لخاطرش كل راجل وكيفاش والاغلبية لازم تعامليه بالحنانة والظرافة يعني تكسبيه وتصبري عليه
وربي يحفظك
صافي بليزير نلقو وحدة تخمم كيفك ياو انا نعرف مخطوبات راهم يظلو مجمعين مع ناس غرباء
ربي يهدينا

__________________________________________________ __________

>>>> الرد الثالث :

قلت باللي راه عندو النيف
وسلّف من عندك دراهم مهرك!!
النيف هنا كان معطل مؤقتا لكن في قضية العلاقات السابقة ظهر عندو النيف
كما أن الحب قبل الزاوج -إذا كان الشخص عديم الأخلاق- فلا معنى له "ومررنا بصعوبات وبرهنت لنا تمسكنا ..." وما إلى ذلك كلها تفاهات من وجهة نظري

زواجك من شخص يقلل احترامك في كل مرة يغضب فيها ولأسباب تافهة يجب أن تعيدي حساباتك وربي يوفقك لكل خير

__________________________________________________ __________

>>>> الرد الرابع :

ربي يهنيكم
باين عليك تحبيه بزاف و حتى هو كيفك
كيما قالولك مادام تبتي على هاديك العلاقة علاه تعاودي تجبدي الماضي ؟؟؟
اما انك تبدليلو شخصيتو واش نقولك
استمري عامليه بالحسنى و ادعي ربي

__________________________________________________ __________

>>>> الرد الخامس :

المشاركة الأصلية كتبت بواسطة محمد جديدي التبسي قلت باللي راه عندو النيف وسلّف من عندك دراهم مهرك!! النيف هنا كان معطل مؤقتا لكن في قضية العلاقات السابقة ظهر عندو النيف كما أن الحب قبل الزاوج -إذا كان الشخص عديم الأخلاق- فلا معنى له "ومررنا بصعوبات وبرهنت لنا تمسكنا ..." وما إلى ذلك كلها تفاهات من وجهة نظري زواجك من شخص يقلل احترامك في كل مرة يغضب فيها ولأسباب تافهة يجب أن تعيدي حساباتك وربي يوفقك لكل خير

عجبتني ياسر تاع النيف كان معطل مؤقتا

مستحيل واحد عندو النيف

وياخذ مهره من عند خطيبته؟؟؟

بارك الله فيك اخي محمد
============================



ياخذ المهر منك و يغضب و يسب ؟؟؟؟
صدقيني يا اختي هناك شيء خطأ في هذا الشخص