عنوان الموضوع : كذبوا علي تم الحل
مقدم من طرف منتديات العندليب

سلام عليكم

حابة تعطوني رايكم

انا فتاة الحمدلله على قدر من العلم و الجمال و التربية أتاني خطاب كثيرون و كل مرة اجد في شخص سبب لكي ارفضه هذا قالي ما تخدميش و الآخر اواعرة و و و .........رغم انهم والله اغلبهم لديهم مسكن مستقل و عمل محترم
المهم لم اكن اعيبهم لأنني أتكبر لا والله و لكن كيما يقولو كلشي بالمكتوب كنت مانيش مزروبة على الزواج

مرينا بظروف قاسية قبل عامين بوفاة اختي و كانت صدمة لنا جميعا و جوزنا يامات ما يعلم بيهم غير ربي و الحمدلله ربي صبرنا

بعدها بشهرين اتاني خاطب و انا لم اكن في ظروف تسمح لي بالتفكير في هذه الامور لكن لمست في والدي القبول خاصة انهم حابين يغيروا جو الحزن للي كنا فيه

المهم انا قبلت بهذا الخاطب رغم انه ساكن مع العائلة و مستواه ثانوي و عمله ليس دائم يعني في عام او عامين يتسرح يعني ما لقيتش فيه الشروط للي كنت نتمناها او حتى الشروط للي كانت متوفرة في الخطاب السابقين

لكن قلت الله هو الرازق و في خاطر نفرح والديا ماعليش

نهار جاو خواتاتو قالولي بللي هوما في 8 بنات و طفل لكن 5 متزوجات و واحدة مخطوبة تتزوج قبل ما ندخل انا يعنني يبقاو زوج فالدار و اخوه

انا قلت عادي ماشي زوج للي رايحة نشرط داري وحدي فقبلت عادي و ما شرطنا والو

بعد الخطوبة في احد الايام سقسيتو على دارهم قالي فلانة تخدم و فلانة تقرا و و و ....

قلت شكون هادو؟؟؟؟؟ قالي هادو خواتاتي !!!!!!! قتلو كيفاش شحال راكم؟ قالي حنا 11 بنت و ولد و ولد عمهم متربي معاهم

انا دخت قالي علاه ما قالولكش خواتاتي قتلو قالولي بقاو زوج في الدار و هوما ظهرو 5 و كاينة واحدة متزوجة قاعدة هي و ولادها لانه زوجها يخدم بعيد


انا لتم هبلت قتلو كون جيت علابالي بللي هكا كون شرطت من الاول داري وحدي

و للي غاضني كتر كذبوا عليا

هو والله خاطيه و ما علابالوش اصلا و كي قالهم علاه درتو هكا قالولو نسينا!!!!!!!!! كاش واحد ينسى عدد افراد عائلته؟ و نفرضو تنسى واحدة علاه الاخرى ما صححتش؟

و المشكل ما هزوش حتى التيليفون باش يعتذروا قالولو نورمال علاه تكبر فالحكاية؟

انا قنعت بيه كيما راه مع انه والله جاوني خير منو الف مرة و حتى الآن والله و انا مخطوبة مازالو يجيوني

لكن هوما شافوني كي شغل طماعة و حابة من الاول داري وحدي و و و و ماشافوش الكذبة تاعهم

عرسي قريب و ما لقيتش روحي...... ساعات نقول هل يستاهل اني نضحي من اجله؟

ما رأيكم؟


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

انا عن نفسي كون جيت في بلاصتك نحاول نقنعو كيفاش نخرجو بدارنا اذا كان ماعندوش لفراق احسن

باسكو دار لي فيها لبنات والله ما تهناي فيها اكيد تلقاي وحدة غيارة وتحب لمشاكل
وهادي هيا العايلة الجزايرية ماكان لاه تعاودي سيناريو
+
باينتلي بلي اكي رزينة وتخمي بعقلك ربي يسهلك

__________________________________________________ __________

>>>> الرد الثاني :

المشاركة الأصلية كتبت بواسطة zahra rose24
انا عن نفسي كون جيت في بلاصتك نحاول نقنعو كيفاش نخرجو بدارنا اذا كان ماعندوش لفراق احسن

باسكو دار لي فيها لبنات والله ما تهناي فيها اكيد تلقاي وحدة غيارة وتحب لمشاكل
وهادي هيا العايلة الجزايرية ماكان لاه تعاودي سيناريو
+
باينتلي بلي اكي رزينة وتخمي بعقلك ربي يسهلك



سلام الله

أنصح البعض بل الكثيرين ان يستعملوا الحِكمة والعقل في ردودهم على المشاكل ....
فليس كل صاحِب مشكل ندعّم رأيه رغم أنه مخطِئ أو نأيِّد موقفه رغم أنه لا يعود عليه بالصّلاح


كما أنصح صاحبة المشكل ألاّ تفكّر في الإنفصال كما قالت هته الأخت ..

أنتِ مقبلة على شيء ديني وعظيم والله وحده يُجازي أمثالك ويوفّقهم للخروج بأقل الأضرار وفي هناء وسعادة

نصيحتي لكي أن تثبتي في مشروعِك وتوكلي على الله مادام انتي مرتاحة لزوجِك فأنتي لزوجك ولستي لأخوات زوجِك

إصبري له ممكن في العام الأوّل سيفتحِ الله بينكم باب من أبوابه ويجِد مسكن ولو كراءاً .. المهم أن تسعِدي زوجك هدا فهو لم يختاركِ إلاّ بعد فرز وأخد ورد طوييييلين جداً جِدا .. أي أنه أخد بنت الأصل والأخلاق .. فقابليه بالتضحية واصبري وسط أخواته .. فاحمدي الله أنهنّ كلّهن اخوات وليسوا إخوة (دكور) سيكون أصعب من جهة تحضير الوجبات لهم والغسل وووو

فالأخوات ( الإناث) سترتاحين معهن في النهار للتعاون في الواجبات و الحوارات .. منهنّ تتعلّمين ممكن أكثر الطّهي وتحضير بعض الواجبات لأنّهن إناث أكيد ستكمّل الواحدة منكم الأخرى .. وليلا ترتاحين لزوجك وهو سعيد لسعادتِك مع إخوتِه ,,,,

خلاصتي :

إخواته إن كانوا من عائلة ماشاء الله في الأخلاق وطاعة الوالدين والله سترتاحين عكس ما أنتي تتصوّرين الآن ...
(( كل تفاءلي لأن كلّهن أخوات فلو كنّا دكوراً لكان كلامي آخر ))


أتمنى أت تتعمّقي في التفكير للحقيقة بالجلوس لبعض الوقت مع نفسك فممكن اكون مخطِئ والله أعلم


وفّقكي الله لِما أنتي مقبلة عليه وجمع بينكم في خير ...


سلام الله


__________________________________________________ __________

>>>> الرد الثالث :

الاخ ياسين بارك الله فيه قال كل شيء وساضيف شيء :
لا تستبقي "سوء النية" بالاك كي تتزوجي وتروحي لدارك يتعاملو معاك مليح و تلقاي فيهم اختك المتوفاة "الله يرحمها ويوسع عليها ويجعلها من اهل الجنة" والا وادا كان العكس لكل حادث حديث ... شحال من وحدة تزوجت وعاشت مع عائلة زوجها و بعد سنوات استقلت بمسكنها ... وهاد البنات ايضا ماراحش يقعدو تما رايحين يتزوجو ادا كتبلهم ربي ... المهم انتي تعاملي معاهم بارتياح و عامليهن كأنهن صديقاتك أو أخواتك

__________________________________________________ __________

>>>> الرد الرابع :

صعيبة
من الاول كذب و خداع
علاه لازم الواحدة تضحي و تجرب و يروح عمرها باش تثبت انها بنت أصول
لا بنت الأصول مقامها عالي و نادرة في هذا الوقت اللي يخب يديها يوفر لها واش تحب
و كنصيحة استخيري و الخيرة فيما اختاره الله
بصح ما تدخليش اهم تجربة في حياة الانسان بتردد و شك
و خاصة ان البداية تبشر بواش راح يجئ من بعد

__________________________________________________ __________

>>>> الرد الخامس :

كتبت رد اومبعد انعلت بليس وعاودت مسحتو
ختي هادي حياتك نتي لي تقدري تقرري اذا راح تقدري تعيشي معاهم ولا لالا نتي تعرفيهم كيفاش دايرين عاقلين واعرين متعاونين متفاهمين ولا لالا دارهم كبيرة ولا صغير ووو
دوكة وحدة تقولك لالا بطلي تجي لوخرة تقولك كملي بالاك يكونو ناس ملاح وتلقاي روحك
القرار راهو ليك صلي واستغفري واستخيري وشوفي وين راحتك وماتخميش بالعاطفة لانو بعد الزواج العاطفة لا تنفع في مواقف كثيرة
موفقة