عنوان الموضوع : اذا كان لي يحطمك امك ؟؟؟؟ تم حل المشكلة
مقدم من طرف منتديات العندليب

السلام عليكم
ما قولكم في ام تقول لبنتها في الثلاثين من عمرها صباح و عشية و باستهزاء *** دبري على روحك و شوفي لبنات واش داروا دارو دار و حياة و انتي غير و غير *****

لعلمكم هاذي الفاتاة حاليا متقدملها شخص زوالـــي قالها : بنت الناس راني زوالي اذا قبلتي بيا راح نتبداو مع بعض و اللي كاين نقسموه مي راني مانيش قادر على مهر غالي ساعفوني نجسب على قد حالي و ندير الدار ؟؟؟؟

اذا كانت البنت سخرية واش راح يصرا راح تكون هي و هو اكبر سخرية اذا جابلها مهر قلـــــــــــــيل جدا بالنسبة للي موجود

حاليا حارقني التفكير بين الموافقة عليه و حاساتو يشرط مهر كذا لانو قادر يسـلف مي هو قالها مانيش باغي نبدا حياتي بالتدين من الناس ---- يا ترى معناها هي ما تستاهلش ؟؟؟؟؟؟؟؟؟؟؟؟؟؟

و كلمة الام زادتني حرقة على حرقة
ادعولي و اعطيوني رايكم

سلام



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

ربي يرزقك الزوج الصالح هادا وين راه المشكل البنت ترفض الي يتقدم ليها ومن بعد كي تلحق ل30سنة تفيق من نومها تولي المهم تتعلق بحبل ولو كان راشي اختي الفايدة في الراجل ولد حلال موش الدراهم تشربي الماء مع الخبز وهانية في دارك خير من الي تتغطاي بالذهب وترقدي وتنوضي بالسب والعياط انا زوالي ونحس بالزوالي الي كيما حالتي كل شئ ولا ماديات والرجلة راحت في البلاد هادى الراجل يحقروه والرخيس يجلوه على جال دراهموا برك وناسيين بالي راهم موش عارفين مصدرهم حلال ولا حرام ما كانش منا الي مايقدر يروح للونساج ويخرج مليار ويبقى يدور ويتفرعن بصح كل واحد وقناعتوا خليكم من الكذب الصح في الرجلة موش الدراهم ربي يوفقك توكلي على ربي وفرحي ماماك

__________________________________________________ __________

>>>> الرد الثاني :

ربي يفرج عليك

__________________________________________________ __________

>>>> الرد الثالث :

الله يسهل و يفتح عليك

__________________________________________________ __________

>>>> الرد الرابع :

أتزوجي حنونة وعلاه الزوالي ماهوش راجل؟؟؟؟؟؟ بالعكس هو سيدهم قنوع و راضي و يحب السترة و و يعيش على قدو ماهوش ملهوف على الدنيا كيما أصحاب المال قتلهم الجشع فرطو في كلش
و أنتي عمرك 30 سنة واش يضلك بلي راح يجيك خطيب آخر ولا تستناي حتى ل 40 و تولي تدي شيخ بأحفادو ؟؟؟؟
و على أمك مادريش عليها .. أي أم تحب تفرح بإبنتها
و الوقت لي رانا فيه ماتنفع غير السترة للبنت مع راجل متدين محترم و وليد فاميليا يخاف فيها ربي
و ديري في بالك الغاني ربي سبحانو ماتدري هذا الزوالي يربح عليك و يفتحلو ربي بيبان الخير و الرزق الواسع و تولي نتي لالة النساء
و على المهر أرضاي بالشيء القليل ... أقلهن مهورا أكثرهن بركة ... و الله كي يعطيك 50 مليون ماهوش باش يجهزك مع الغلا تاع ضرك
أنا مهري كان 5 ملاين فقط وكانو أخواتي في البيت مخطوبات معي مهرهن 12 مليون و الحمد لله بديت معاه حياتي من 0 و الآن و لله الحمد عايشين متهنيين و حاجة ماتخصنا ربي يدومها نعمة

__________________________________________________ __________

>>>> الرد الخامس :

أمك الله يهديها و يسامحها ، وانت فيما يخص الشاب اسألي عليه جيدا اذا كان صادق في كلامه فلا تترددي ، لا يهم قيمة المهر الهنا قبل كل شيء كلامه صحيح ممكن يتدين و يديرلك عرس شباب تفتخري به بصح تخلصي الثمن غالي بعد الزواج تصيبي روحه معاه غارق ديونات عوض لاتعيشي حياتك و أيامك الأولى بعد الزواج تصيبي روحك مضطرة توقفي معاه باش يخلص ديوناتو راني نهدر معاك عن تجربة صراتلي سنتين أو أكثر وهو كيما تجي شهرية تقريبا يفوتها لديونات جيبيها من المهر حتى أخر دقيقة من العرس.
صلي صلاة الإستخارة وادعي ربي ، لي فيها الخير يجيبهالك ربي
ولي كاتبهالنا ربي نلحقوها لا تتسرعي في اتخاذ أي خطوة