عنوان الموضوع : حريرة مرمز من مطبخ ريتاج تيارتية من مطبخي
مقدم من طرف منتديات العندليب

اليوم اول يوم في رمضان جبتلكم معايا حريرة بطريقتي اللي رفدتها على ماما مانكثرش عليكم نبدا اول شيء بالمكونات الاساسية نتاعها واللي هي موضحة في الصورة ونزيد نوضح اكثر
نحتاج حبة بطاطا صغيرة ـ زوج حبات زرودية صغار ـ زوج حبات كورجات صغار ـ حبة بصل صغيرة مسكرفجة ـ سنات ثوم ـ طماطم مصبرة وهريسة ـ والعقاقير اللي هوما التوابل عندنا راس الحانوت وفلفل اسود وملح وكروية اللي هي اساسية في الحريرة بلا ماننسى اللحم مش شرط غنمي اللي موجود ـ ربطة قسبر


نبدا اول شيء نقلي البصل واللحم والثوم مع شوي زيت نقلي مليح من بعد نضيف التوابل والملح ثم نضيف الطماطم المصبرة حوالي ملعقة ونص تاع اكل على حساب النوعية ونضيف ملعقة صغير هريسة اناساعات نضيف شوي زعفران
نخلط كل شيء مليح ونضبف الخضر ونخلط مليح ومن بعد نغسل الحريرة نتاعي ونضيفها
انا استعملت الحريرة الخشينة نبغي نرميها في لول ونرحيها مع الخضر واللي تبغي تضيفها من بعد هي حرة كل واحد واش يبغي سيرتو الرقيقة احسن شيء نضيفها بعد مانرحي الخضر
وكيما شفتو انا رميتها مع الخضر وهي من الاحسن تضبفوها لما تبدا الخضرا يدخلها الطياب ترموها
ونضيف ربطة القسبر نتاعنا وغطي القدر وخليها تطيب في غرضها لما تبدا تغلي نخلط مرة ولا زوج باش ماتلصقليش الحريرة من تحت وتتحرق كي نخلط نخلي الحرة تطيب مليح


لما تطيب الحريرة والخضرا نرحي كل شيء بعد مانكون نحيت اللحم بجيه
انا نستعمل الرحى اليدوية واللي تبغي ترحي بالميكسور احسن
كي نرحي ونكمل نرد القدر فوق النار ونخليها تعقد شوي


وهي تعقد نحضر العقدة السحرية ههههههههههه لانو بهدي العقدة تجي الحريرة بنيييينة وريحتها تشهي سيرتو الحريرة تاع الشعير اللي ماتكونش عندها ريحة كيما تاع المرمز
قلنا نحتاج في العقدة
شوي قصبر نحلهم الاعرف نخلي غير الورق وزوج سنات ثوم وشي كروية وراس الحانون وملح غير شوي وادا كانت الحريرة نتاعكم مليحة في الملح نستغناو عليه في العقدة
نهرس الكل في المهراس مليح مليح حتى نتحصل على عقدة كيما راكم تشوفو
لما نحس بالحريرة قريب توجد نحل هديك العقدة في شوي مرقة تاع حريرة ونرجع كل شيء في القدرة ونخلط مليح ونخليها تغلي غير شوي ونطفي بعد مانطفي مباشرة نكون حضرت شوي زعتر مع شوي كروية كي نطفي ندري من الفق ونغطيها ونخليهم يطلقو


وهاي الحريرة واجدة اللي من فوق هو الزعتر والكروية اللي فلتلكم عليهم


واخيرا كملت شانقوللكم ان شاء الله تكون عجبتكم الطرريقة تاعي ومانكونش كثرت عليكم الصور وكسرتلكم ريسانكم
واللي تجربها وتعجبها تدعيلي
وفي الاخير نقوللكم رمضان كريم وكل عام وانتوما بخير ان شاء الله يدخل علينا وعليكم بالصحة والهنا يارب
سلااااااااااااااام



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

صحتي يا الساجية
تسلم الايادي
هادي هي حريرتي
بارك الله فيك
رمضان كريم حبيبتي

__________________________________________________ __________

>>>> الرد الثاني :

الله يبارك
ربي يحفظك ويزين سعـدكْْ
راكيـ تعبتيـ وضحتيـ كل خطوة بالصـور ^^
حنا تانيـ نديروها ناس الغرب بصح تاعـك بحال مخدومة بصوالح عجبتنيـ

__________________________________________________ __________

>>>> الرد الثالث :

يعطيك الصحة عمري لا درتها في حياتي أصلا غير نسمع بيها برك بصح ماكنتش نعرف باللي فيها هذو الخطوات كامل كنت نحسب فيها كعور وابعث
بصحتكم وربي يحفظلك ماماك

__________________________________________________ __________

>>>> الرد الرابع :

المشاركة الأصلية كتبت بواسطة fatimazahra09
صحتي يا الساجية
تسلم الايادي
هادي هي حريرتي
بارك الله فيك
رمضان كريم حبيبتي

ربي يحفظك حبيبتي
صح رمضانكم

__________________________________________________ __________

>>>> الرد الخامس :

المشاركة الأصلية كتبت بواسطة just.girl~
الله يبارك
ربي يحفظك ويزين سعـدكْْ
راكيـ تعبتيـ وضحتيـ كل خطوة بالصـور ^^
حنا تانيـ نديروها ناس الغرب بصح تاعـك بحال مخدومة بصوالح عجبتنيـ

ربي يخليك حبيبتي
تعبكم راحة