عنوان الموضوع : راني دبرتلكم عشاء لليوم من مطبخي
مقدم من طرف منتديات العندليب







بدون مقدمة

هذي شربة فريكراهي تكتك

حبة بصل صغيرة (درت قيس 4صحون)
حبة بطاطا صغيوطا

حبة زرودية تانيك صغيرة

حبة طماطم

حبة قرعة حجم صغير
لحم و لادجاج

ملح*فلفل اكحل*فلفل عكري*نصف عود قرفة ...طماطم مصبرة 2فصوص ثوم 5ملاعق زيت

حشيش شربة*نعناع

نقلي بصل و لحم و التوابل من بعد ندير حبة طماطم مسكرفجة و الثوم(الثوم منديروهش يتقلى مع الاول باش ميتحرقش و يمد المروراة)
من بعد ندير كاس ماء و نحط الخضر الي نكون قسمتها على زوج ونحط الحشيش او وريقات نعناع و ندير النار قليلة


ونخليها حتى طيب الخضرا و اللحم(هذي هي طريقتي منحبش نمرق حتى يطيب كل شي من بعد نمرق قيس افراد العيلة)
من بعد نحي الخضرة نرحيها (و لا نهرسها و من بعد نفوتها في الصفاية)
كي نرحي الحضرة نرجعها للقدر و نمرق حسب العايلة و نخليها تغليى المرة الاولى ندير طماطم مصبرة و الغلية الثانيى ندير 3 مغارف فريك مشلل و مقطر و نديرها على نار قليلة ونخليها حتى يطيب الفريك من بعد نقطعو من فوق قصبر و النعناع



هذو ميني سوفلي

العجينة

بول فرينة
3مغارف زيت
مغرف كبيرة خميرة خبز
ماء دافى
نخلطو فرينة و الزيت و الحميرة نعجنوهم بالماء الدافى و نديروها في صاشي ونخلوها تخمر

الحشو

علبة تون زيت
زوج اجنحة الدجاج
حبة طماطم
فرماج
بيض حبة
حليب 3ملاعق
ملح,فلفل اسود,كمون زوج فصوص ثوم

نسكرفجو طماطم مع الثوم ونقليهم في شوية زيت نحط توابل ’’’ملح,فلفل اكحل,كمون
غير تتقلا نطفيلها
من جهة نديرو الاجنحة في ماء زيت و الملح او فلفل اكحل نحليهم يطيبو (انا نحيلهم الجلدة)
من بعدما يطيبو نفتتهم مع طماطم و نزيد علبة تون و نخلط هذيك الحبة بيض نظربها مليح و ندير شوية منها في الخليط باش يشد روحو في الطياب و الباقي نخلطو مع الحليب ندهن بيه الوجه
درك نخليكم مع الصور تفهمو مليح

نحلو العجينة و نقطع دوائر و نحطها بجنب و نبدا بالاولى


من بعد نديرو فرماج


ونديرو فوقو الحشو


نغلقوها على هذا الشكل


نزين الطروف بالفرشيطة


و نحطها في سنيوة بعد مندهن الوجه و ندير السانوج من فوق ندخلها للفور على درجة 220 لمدة 15دقيقة

هذي سلاطة تاع طرشي

طرشي مقلي و مقطع مكعبات و درتلو زيت ملح و شوية خل





وفي الاخير درت salade de fruits

تفاح ** بنان** ياغورت**عصير برتقال
نخلطهم و زدت من فوق مغرف تاع سيرو ذوق نعناع

ان شاء الله يكون عجبكم عشاي البسيط








>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يعطيك الصحة
اله يبارك

__________________________________________________ __________

>>>> الرد الثاني :

المشاركة الأصلية كتبت بواسطة بيان 5
يعطيك الصحة
اله يبارك




__________________________________________________ __________

>>>> الرد الثالث :

ya3tik saha yban ychahi

__________________________________________________ __________

>>>> الرد الرابع :

والله غير سخفتيني يا بنت نصيرة راني جاية نتعشى دبري راسك هههههه تسلم ايديك حنونة هايل هايل


__________________________________________________ __________

>>>> الرد الخامس :

بارك الله فيك على الوصفات