عنوان الموضوع : عيد الاضحى في بيت سمراء الدنيا طبق جزائري
مقدم من طرف منتديات العندليب




كيراكم عزيزاتي فحلات منتديات العندليب .........كان هاين عليا ندير لكل وحدة فيكم بطاقة معايدة لكن ما باليد حيلة ...........قلت في بالي احسن هدية نقدمهالكم في العيد هي .........

جولة في بيتي ايام العيد المبارك
تفضلو مرحبا بالجميع

قبل العيد بيوم نحضر كل ما نحتاجوه من لوازم الذبح

و بعض المشتريات

و اهم شيء الحنة .......حنيت الكبش هو الاول

و بعدها حنيت الاولاد

في الصباح يجي الزوج من صلاة العيد يلبس ثياب قديمة و يبدا الذبح

الحمد لله الصورة خرجت مليحة لانو ايدي كانت ترجف ........نشد لخروف و عينيا مغمضين ما نقدرش نشوف ......
حتى السليخ ما صورتوش لاني كنت نسلخ معاه
علقنا الشاة و خليناه تبات تنشف

الزوج بدا يذبح كبش اخر نتاع الجيران و انا بديت بالردا ملحتو و نشرتو ينشف



و شوحت الكبدة في طاجين ثقيل مع كمية معتبرة من الملح


سبقت شوي ملفوف شربنا بيه لاتاي


و من بعد بديت في الدوارة

غسلتها 3 مرات و نقعتها في ماء و خل

و بديت نقيت طرف من لمصارن و درتهم بجيهة للمرقاز

نحيت طرف من الدوارة للعصبان

و الباقي درتو يطيب في ما و ملح

و درت للبوزلوف ......شوطتو.......

و غسلتو بالصابون و حبيلة لحديد

و قطعتو و درتو يطيب للعشا

............في غير مناسبات ممكن نديرو في الفور او مشرمل او .......لكن في العيد بالذات يحبو الزوج غير في الماء و الملح + بصل + رند + فلفل اسود + زعفران و نقص عليه النار و نخليه يطيب حتى يعود يتفتت و نتعشو بيه


و الكرعين نظفهم و نديرهم في الكونجيلاتور في الشتا ندير بيهم لوبيا بيضا (يا سلام)

جا وقت لغدا غالبا ما نديروش لانو الاولاد يحوسو غير يقلو ......
نقليلهم شوي من الكبدة و القلب و مصران الشحم و الملفوف

نرجع للدوارة نلقاها طابت نقسمها على اثنين (لانو ما عنديش عايلة كبيرة )

قسم نقطعو بالمقص قطع صغيرة و مرة اخرى نعملو بالبصل و الثوم و الطماطم


و القسم الاخر نرحيه مع القصبر و المعدنوس و الثوم و الملح و الفلفل و الكمون و حفنة روز و نعمرو في المصران و الكرشة


نخبيها في الكونجيلاتور

و هذا للي عمرتو في المصران نديرو مرقة بالحمص اممممممممم

يتبع ..........


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

[SIZE="6"]اليوم الثاني
نجهز لفطور للي هو هذا

نبغي المخ مع البيض امممممممممم.......

نفطرو و نبدا انا و الزوج عملية تقطيع الذبيحة

و انا نقطع كل طرف نعملو برنامج ههههههههه
نبدا بللي نقسموه على المحتاجين .......نقطعوه و نخلوه بجيهة
اول شي نقطع الجنب و نخليه للشواء

و الكتف للكسكس

الرقبة نشرحها و نملحها و ننشرها تحت الظل


و في الشتا ندير بيه بركوكس

الافخاذ نقطعوهم قطع كبيرة للضيوف
الفلكة نقطعوها صغيرة لباقي الايام
نخبي اللحم في الكونجيلاتور

لغدا درتليهم ضلوع محمرين و خبز الدار


.........بعد لغدا.نبدا نخدم المرقاز
نرحي اللحم و نقومو مليح بالمعدنوس و القسبر و الثوم و الفلفل و الملح

و ندخل المحقن في المصران و نبدا نعمر باصبعي الابهام
(هاذ الشرح لعزيزتي بنت الجزاير الغالية للي طلبت طريقة المرقاز في البيت)




نحط المرقاز في الثلاجة

و باقي الكفتة عملتها همبرغر.........

في الليل عملتليهم حفلة شواء .......


جهزت بروشات

و كفتة اصابع

و المرقاز



__________________________________________________ __________

>>>> الرد الثاني :

الله الله عليك يا الفحلة صح عيدك كل عام وانت بخير و هانية راكي عطيتي للعيد حقه و زايد يعطيك الصحة

__________________________________________________ __________

>>>> الرد الثالث :

اليوم الثالث

عندي عادة اليوم الثالث نشوي الجنب مع السفة بالعنب و اللبن



اللحم ما يبغيش التوابل بزاف غير الملح يكون كفاية ......ديري فنجال فيه الملح و الزيت و اذا بغيتي شوي فلفل و دهني اللحم مليح مليح و ديريه في بلا و دخليه للفور في الوسط على درجة حرارة 160 لمدة 2 ساعة راح يجيك هايل و ما يتشبعش
و راكم تعرفو العيد تكثر فيه العزائم و في المنطقة نتاعنا احسن طبق تقدميه للعزيز عليك هو الطعام



__________________________________________________ __________

>>>> الرد الرابع :

يعطيك الصحة مرا انص الله ابارك

__________________________________________________ __________

>>>> الرد الخامس :

مممممممممم ما شاء الله اجواء رائعة مع ربة منزل شاطرة الله يبارك