عنوان الموضوع : **أرز بسمتي بالشعيرية و الدجاج المحمر**من مطبخي و بالصور من مطبخي
مقدم من طرف منتديات العندليب



اليوم دبرت عليا بنت خالتي مينا كي حرت واش ندير الغدا قالتلي ديري روز بالدجاج المحمر في الفيس بوك أيا قلت و الله غير نديرو ونحطهولكم

أردت نشارككم بطريقتي في طهي الأرز البسمتي بالشعيرية و الدجاج المحمر في أكياس الفرن

أولا هذه صور للكيس اللي شريت فيه الأرز و صور لأكياس التحمير في الفرن


[IMG][/IMG]

[IMG][/IMG]


[IMG][/IMG]

هنا راح تلقاو طريقة استعمالها و المدة اللازمة للطهي لكل نوع

[IMG][/IMG]

نبدأ أولا بالأرز نأخذ
**نأخذ 3 كؤوس أرز نغسلهم مليح في مصفاة باش نحيولو الأوساخ و النشاء الزائد
ثم ننقعوه في الماء مدة نصف ساعة ثم نوضعوه في مصفاة يتصفى حوالي ربع ساعة

نوجدو في هذه الأثناء المرق اللي راح نطيبوه فيه
** حبة بصل مرحية ناعم+2 فصوص ثوم مرحيين ناعم+حبة جمبو تاع دجاج+ملعقة صغيرة كركم +ملعقة صغيرة كمون +نصف ملعقة صغيرة فلفل أسود+2 ملاعق صغيرة ملح(الأرز يحب الملح) +3 ملاعق كبيرة زيت نباتي
قليهم على النار و ضفي ضعف كمية الأرز ماء يعني 6 كؤوس ماء و خليهم حتان يغليو
[IMG][/IMG]

**في هذه الأثناء ضعي ملعقة متوسطة زبدة في مقلات و شوحي الأرز يعني قليه شوية في هذيك الزبدة
ثم ضفيه للمرق حتي كان مازال ما غلاش مش مشكل
و زيدي ديري ملعقة صغيرة زبدة في المقلات و حمري الفارميسال كما توضح الصور

[IMG][/IMG]

[IMG][/IMG]

[IMG][/IMG]
ثم ضفيه هو الآخر للمرق راح تلاحظي بلي المرق مازال ما غلاش عندي المهم راهو سخون مش مشكل
المهم خلطي الكل وغطيه و خليه أولا على نار قوية حتى يبدأ في الغليان ثم نقصيلو شوية و خليه حوالي 15 إلى 20 د يطيب الأرز و يتشرب المرق كامل

[IMG][/IMG]
في هذه الأثناء وجدي الدجاج نتاعك الطروفة اللي بغيتي و تبليهم بالملح و الفلفل الأسود و الكركم و الكمون وملعقة كبيرة زيت و حبة طماطم صغيرة مرحية و سشنينة ثوم و إذا حبيتي زيديلو حبة بطاطا أنا ضفتها على جال أولادي يحبوها
المهم خلطي الكل و حطيه في الكيس نتاع الفرن بعد ما تكوني درتيلو ملعقة صغيرة تاع فرينة تدهنيه بيها
أغلقي الكيس و حطيه في بلاطو ذي حواف و أثقبيه 2 ثقبات من فوق باش يتنفس وحطيه في الفرن بلا ما تسخنيه مدة ساعة هوما حاطين 40 د لكل كيلو ونصف لكن المدة كذلك تختلف حسب الحجم ماشي غير الكمية

[IMG][/IMG]

[IMG][/IMG]

هنا الأرز راهو بدا ينشف زيدي خليه شوية حتان تحسي بلي نشف مليح

[IMG][/IMG]
هنا راهو نشف كامل خليه مدة 10 د يرتاح قبل ما تحركيه

[IMG][/IMG]


وهنا راهو طاب الدجاج لاحظو الصور

[IMG][/IMG]

راح يعطيكم صوص صغيرة من تحت و أنا حبيت نحتفظ بيها باش نسقي الروز من فوق بلاصوص نتاع االدجاج
لذلك راح تلقاي بلي هناك جوانب ماشي محمرين مليح لذلك زدت حمرتو شوية

[IMG][/IMG]

هذي هي لاصوص اللي قلتلك عليها تجي رووووعة في البنة و راهي نتاع الجاج وحدو بدون إضافات يعني بلا ما زدت الماء أو المرق

[IMG][/IMG]


و هذا هو الطبق نتاعنا بصحتكم

[IMG][/IMG]


[IMG][/IMG]


نتمنى نكون أفدتك لأنو هناك دائما مبتدئات أو كاين كذلك اللي ما جربوهش و ممكن راهم يحوسو على طريقتو أو واحدة مجرباتو لذلك حبيت نحطهولكم كموضوع


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

بوه عليا بوه تعبت عليه وانا نحمللكم فيه ومن بعد واحد ما رد راني غضبت




واقيلا راكم مقيلين




__________________________________________________ __________

>>>> الرد الثاني :

انا جربته بالروز العادي وخرج لي هايل شعيرية مع الروز تجي بنينه
شكرااااااالك

__________________________________________________ __________

>>>> الرد الثالث :

المشاركة الأصلية كتبت بواسطة الأمنيات
انا جربته بالروز العادي وخرج لي هايل شعيرية مع الروز تجي بنينه
شكرااااااالك

شكرا لك على المشاركة عزيزتي أكيد يجي هايل لكن فقط حبيت نوريلكم طريقة عمل الأرز بسمتي للي ما يعرفش

__________________________________________________ __________

>>>> الرد الرابع :

مشكورة ماتزعف حبيبتي ما و لو راه يشهييييييييييييييييييييييييييييييييييييييييييييي بارك الله فيك

__________________________________________________ __________

>>>> الرد الخامس :

المشاركة الأصلية كتبت بواسطة الادب العربي
مشكورة ماتزعف حبيبتي ما و لو راه يشهييييييييييييييييييييييييييييييييييييييييييييي بارك الله فيك

شكرا لك عزيزتي أنا قلت يا إما مقيلين ولا ما عجبكمش ههههههههي
ربي يبارك فيك أختي