عنوان الموضوع : الأخوات اللي ما صلحلهمش الخبز العربي نتاع سمؤاء الدنيا يتفضلو المطبخ الجزائري
مقدم من طرف منتديات العندليب



صباح الخير عليكم كامل

شفت بزاف أخوات يشكيو من الخبز العربي و يقولو ماصلحش ، مالا دبر علي راسي قالي هاتي نجربو نلقاولهم الحل مادام راكي لاعبتها في المنتدى آينشتاين هههههه ، دخلت للمختبر بوه للمطبخ و جربت عدة مرات باش نتأكد من الحل اللي لقيتو .
كنت شفت أخت حطت وصفة الخبز العربي اللي يطيب في الفرن و قلت نجرب و لقيت طريقتها مضمونة أكثر خاصة للأخوات اللي ماعندهمش مقلاة تيفال .
شوفو هي نفس وصفة الأخت سمراء الدنيا ، هذا رابط الوصفة :
https://www.djelfa.info/vb/showthread.php?t=891320
و لكن شوفو ، أنا طيبتو في الفرن ، يعني ديري العجين نورمال و تطرحيها بشوية فرينة ( ما ترقيهاش بزاف بزاف راهي ما تتنفخش ) و تخلي القرصات يريحو 10 دقائق و تبداي الطيبي .
قبل ما تبداي طياب تكوني قبل بـ30دقيقة شعلت الفرن و سخنتيه ملييييح و تحطي كاش بلاطو أو صينية مقلبة على ظهرها و تدخليها للفرن تسخن و تبداي تحطي القرصة الأولى كي تخرج فقاقيع قلبيها و ممكن دوري القرصة باش الطيب مليح من كل النواحي و انتهى ، شوفو هنا راهي في الفرن بعد ما قلبتها انتفخت :


* ملاحظة : قرصوه رقيق بصح ماشي بزاف ، باش ينتفخ و يبقى طري .
* أضيف ملاحظة هامة قالتها الأخت وهي أنكم تعجنوه مليح باش يطلع
أرجو أن يكون هذا الحل النهائي لمشكلة الخبز العربي


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

جبتيها يا انشتاين راني سخفانة على الشاورما وحبيتها بالخبز العربي. يسلم ربي يديك وجعلها في ميزان حسناتك راكي ساعدتي اخوات بزاف

__________________________________________________ __________

>>>> الرد الثاني :

المشاركة الأصلية كتبت بواسطة أنوثة شرقية
جبتيها يا انشتاين راني سخفانة على الشاورما وحبيتها بالخبز العربي. يسلم ربي يديك وجعلها في ميزان حسناتك راكي ساعدتي اخوات بزاف

ههههه ، يسلمك أنوثة شرقية ، كي ديريها أبعثيلي سهمي

__________________________________________________ __________

>>>> الرد الثالث :

اختي الهام بارك الله فيك حبيت نسقسيك السينية حطيتيها مباشرة فوق االنار تع الفرن او فوق بلاطو و تاني كي نطيبو نخلي باب الفرن مفتوح على حساب مافهمت و شكرا

__________________________________________________ __________

>>>> الرد الرابع :

المشاركة الأصلية كتبت بواسطة maiar
اختي الهام بارك الله فيك حبيت نسقسيك السينية حطيتيها مباشرة فوق االنار تع الفرن او فوق بلاطو و تاني كي نطيبو نخلي باب الفرن مفتوح على حساب مافهمت و شكرا

وفيك البركة أختي ، شوفي نجاوبك سؤال بسؤال :
* كل واحد أدرى بالفرن نتاعو ، انا لاكويزينيير نتاعي صغيرة و الفرن نتاعها ما يسخنش بزاف حطيت الصينية مباشرة في الأسفل و خاصة أن الصينية اللي طيبت فيها ثقيلة ماتسخنش بسرعة .
لكن أيضا جربت طيبتها في بلاطو خفيف شوية و في الوسط نتاع الفرن بعد ماسخنتو مليح ( قلبت البلاطو وحطيتو فوق الشباك في الطبقة الثانية نتاع الفرن ) و كانت نفس النتيجة .
* لالا ، ما خليتش باب الفرن مفتوح ، فتحتو باش نصورلكم برك .
أي استفسار راني هنا

__________________________________________________ __________

>>>> الرد الخامس :

بارك الله فيك اختي انا جربتو و طيبتو في مقلى تيفال و لكن من بعد ان شاء الله نجرب طريقتك بارك الله فيك