عنوان الموضوع : طلب مساعدة المطبخ الجزائري
مقدم من طرف منتديات العندليب

السلام عليكم حابة تساعدوني في التوابل لنديروها في الشربة و كيفاش ننقع الحمص انا نديره في ماء سخون شوي ونديرلو شوي بكربونات بصح كي نطيبه ميطيبش مليح ادا كانت كاش واحدة تعرف تساعدني


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

شوفي اختي اذا على الشربة فريك ندير راس الحانوت وفلفل اسود وشوية كمون وكسبر مرحي وكي نطفي ندير الرند والدبشة وعلى الحمص انا نشمخو في الماء ليلة من قبل واذا حبتي ضيفيلو شوية خمير تاع قاطو صراحة ما نديرهاش وغدوا من ذاك نبدلو الماء ونديرو يطيب وكي يطيب نصفيه من الماء ء ونحطو في ساشيات ونديرو في كونجيلاتور

__________________________________________________ __________

>>>> الرد الثاني :

اختي انا ماما بالنسبة للحمص تنقعو ليلة قبل في الماء فيه خميرة ولا بيكاربونات
او جداتي تحكم تبيتو ليلة او مبعد تغليه في كوكوظ مليح حتى يطيب او تخليه في الكونجيلاتور كل ما تحتاج كي تكون الطبخة نتاعك قريب طيب خري او لوحيلها

__________________________________________________ __________

>>>> الرد الثالث :

انشاء الله يكونو الاخوات فادوك

__________________________________________________ __________

>>>> الرد الرابع :

أختي كي تعودي ناوية تطيبي الحمص تاعك شمخيه في ما عادي ما سخون ما والو ما عادي وخليه يبات ليلة كاملة وللغدوة طيبيه عادي يولي زبدة
صراحة لا أفضل وضع البيكاربونات ولا الخميرة هذا ما ولاش حمص

__________________________________________________ __________

>>>> الرد الخامس :

السلام عليكم
بالنسبة للحمص انا نشمخو في ماء بارد عادي ليلة كاملة والغد من داك نطيبو 10د مع شوية ملح 1/2 م ص في 1 كلغ فقط ...يطيب في الكوكوت .....مانديرلو والو لابيكاربونات لا خميرة
كي يزيد يطيب مع الجوازات نتاعك رايح يزيد يتملح و يجي جوست جوست في الطياب
بالنسبو لتوابل الشربة
وينها لي راكي تحوسي عليها
شربة فارميسال ديريلها القرفة عود وفلفل اسود وفلفل عكري كروية وملح زبدة وشوية زيت كمشة حمص ربطة قسبر ونعناع اخضر ...بصلة + 2 حبات كماطم +اطراف اللحم + 2 جزر مقطع +1/2 بسباس
تقلي الكل على نار هادية 30 د وتمرقي بماء سخون و تزيدي للنار كي تشوفي اللحم دخلو الطياب نحي كاس من المرقة وحلي فيه 2 م ك مركز طماطم و نضيفها في الاخير . كي طيب الخضر ننزع اللحم و الحمصونطحن كلش و نرجع ونزيد الكماطم لي حليتها
نرمي 1/2 كاس فارميسال في مقلة ونحمصها وحدها حتى تولي دهبية و نزيدها للشربة و نخليها طيب 3 د على الاقل و نطفي و نرمي 1 فلفل حار و ليمون كي تسربي وشوية قسبر مقطع .
شربة فريك
ديريلها فلفل اسود ملح قسبر بودرة ومركز الطماكم و طماطم حب مرحية و الفريك 1/2 كاس فقط وفي الاخير الفرينة نتاعو
الحريرة راني حطيت وصفة للاخت السلئلة https://www.djelfa.info/vb/showthread.php?t=1587742
انشاء الله نكون فدتك
رمضان كريم انشاء الله