عنوان الموضوع : وداعا للبطاطا المقلية طبخ جزائري
مقدم من طرف منتديات العندليب

تعودنا اخواتي الحبيبات في كثير من الاحيان على تقديم اللحوم بانواعها سواء كانت :روتي دجاج،روتي لحم،اسكالوب ،كوتلات ،حوت،اوحتى البرغر،تقديمها مع لفريت رغم انها غير صحية وكثيرة السعرات الحرارية،ولانها كدلك راح نقترح عليكم بديل صحي وفي نفس الوقت لذيييذ جدا انها:

بطاطا بالليمون مع تشكيلة توابل في اكياس الشواء،من اروع مايكون.

نوجدو تتبيلة تتكون من:مقدارعصير ليمون الى3مقدار زيت زيتون(ادا2ملعقة ليمون لازم 6ملاعق زيت زيتون)،4سنات ثوم،معدنوس اودبشة حسب الرغبة،ملح،فلفل اكحل،كركم،كسبر،كمون،مبشور الليمون (زاست).

نحضرو حوالي كيلو بطاطا متوسطة الحجم،نقشروها ونغسلوها،ونقطعوها:الحبة على اثنين والنصف على ثنين والربع على ثنين لنتحصل على براج كما في الصورة:

نمزجو البطاطا مع التتبيلة:


اممممم ريحة الزاست يااخواتي روعة روعة:

وهادي اكياس الشواء:

ناخدو كيس ونستفو فيه البطاطا ،وبواسطة ابرة نديرو من5الى6 ثقوب اعلى الكيس،ثم الى الفرن مباشرة لحوالي نصف ساعة على نار متوسطة.


وبعد خروجها من الفرن تكون بهاد الشكل:

ماهيش ناشفة ،لونها اصفر بفعل الكركم،معاها صلصة بطعم الليمون،امممممم ولااحلى:

وهدا حوت كنت قليتو بطريقة عادية:

وقدمتو رفقة البطاطا بالشكل التالي:

نتمنى اخواتي الفضليات تجربو الوصفة لانها انسب بديل للبطاطا المقلية،نهديها لكل اطفالكم ،اكيد راح يحبوها لانو اولادي حبوها وماخلو والو في الصحن.

ملاحظة:يمكن تعويض اكياس الشواء بورق الالمنيوم بشرط عدم احداث ثقوب لمنع تسرب الصلصة.

دعواتكم اثابكم الله الفردوس الاعلى.




>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

جزاك الله خيرا أختنا في الله

__________________________________________________ __________

>>>> الرد الثاني :

الله يبارك و الله البطاطا المقلية مشكل العصر
قوليلي نقدر نستبدل الدبشة بالمعدنوس حنا ما نعرفوهاش في الشلف

__________________________________________________ __________

>>>> الرد الثالث :

بارك الله فيك

__________________________________________________ __________

>>>> الرد الرابع :

يعطيك الصحة مقدسية على الفكرة
كاين اللي دارتها مع الخضر وجات روعة
انا طريقتي شفتها في قناة فتافيت تجي في البلاطو و بدون ساشي مع 2 م ك زيت في 1 كغ بطاطا
مرة بالملح فقط و مرات بالتوابل تجي روعة

__________________________________________________ __________

>>>> الرد الخامس :

المشاركة الأصلية كتبت بواسطة omo mazen
جزاك الله خيرا أختنا في الله

بارك الله فيك اختي الحبيبة،اسعدني ردك الطيب.