عنوان الموضوع : تليتلي بطريقة سهلة بالخطوات المصورة من مطبخي طبخ جزائري
مقدم من طرف منتديات العندليب

السلام عليكم
كالعادة اليوم جبتلكم طبق رئيسي معروف جدا خاصة في الشرق الجزائري و هو التليتلي طبعا كاين لي يديروا مرق أحمر لكن على طريقتي نديروا أبيض يجي لذيذ جدا خاصة إذا قطعنالوا معدنوس أخضربكثرة في الأخير و منها نقصوا من إستهلاك الطماطم المصبرة لأنها تدمر المعدة
طبعا الكيفية مشروحةبالصور المفصلة من مطبخي المتواضع
عندي كمية من التليتلي نقسمه على نصفين

نحمص في مقلة ناشفة النصف و نترك النصف الآخر أبيض شوفو الصورة والفرق


نسخن في كاسرولة الماء حتى الغليان و نطفئ النار عليها ثم نفرغ التليتلي فيها ...نحركها ونغطيها و نخليها تتنفخ ...... في هذه الأثناء نحضر المرق





نحط في كوكوط :
طراف اللحم أو الدجاج +حبة بصل مقطع مربعات +ثوم مهروس + حبة طماطم مسكرفجة +التوابل :ملح+فلفل أسود + لفاح +قرصة قرفة + الزعفران+السمن +نقلي مليح و نضيف الحمص و الماء لكن مانكثروش خطرش نحتاجو غير شوية مرق و نخلوه يطيب







والآن نرجعو للتليتلي نلقاوها طرات و ماهيش معجنة ... نصفوها في كسكاس و نخلوها تقطر.... ثم نفرغوها في صحن نديرولها شوية زيت و ندهنوها جيدا و نديروها تفور











نفرغوها في صحن و ندهنوها بشوية زبدة ...الحق أنا ماندرلهاش لأنو المرق فيه دسم زيادة بصح هنا درتلهاباش نوريلكم الأصل و نخلوها حتى تطيب المرق .... شوفوا ماهيش معجنة و كل حبة وحدها و متتعبيش في التفوار المتكرر و مايديش الوقت




ممبعد كي تطيب المرق ننزعو اللحم و هنا كاين 2 حالات :
في حالة الضيوف : نصفيو المرق من البصل و ننزعو الحمص و كويرات اللحم للتزيين الطبق و نحمروا اللحم
في حالة العائلة أي لدارك تنزعي فقط اللحم و تفرغي التليتلي في المرق و تخليه يتجمرو يشرب المرق مع التحريك من وقت لآخرباش ماتلصقش و تضيفي المعدنوس المقطع و تخلطي و طفي النار

أنا هنا كانت غير لداري فخلطت كلس بلا ماصفيت المرق









وهذه للضيوف بعد ماصفيت المرق و زينت بالحمص و كرات اللحم و حمرت الدجاج مممممممم


إن شاء الله تجربوه بطريقتي لأنه لذيذ جدا و يحمر الوجه و مافيهش التعب و التفوار بزااااف
تحياتي لكل الأعضاء و الزائرين نقولهم أدعيولنا يالوكان دعوة صغيرة
سلااااااام


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

ربي ينولك اللي في بالك ويرفع قدرك ان شاء الله
وبما انني اول وحدة راهو ليا مكرة في البقية ممممممممممممممممم هذا غدا زين
نهار نجربوراني نحطالتطبيق يا سيدة الاطباق مشكوووووورة

__________________________________________________ __________

>>>> الرد الثاني :

يعطيك الصحة وصفة رائعة بصحتكم و شكرا على الشرح

__________________________________________________ __________

>>>> الرد الثالث :

المشاركة الأصلية كتبت بواسطة zineb_saib
ربي ينولك اللي في بالك ويرفع قدرك ان شاء الله
وبما انني اول وحدة راهو ليا مكرة في البقية ممممممممممممممممم هذا غدا زين
نهار نجربوراني نحطالتطبيق يا سيدة الاطباق مشكوووووورة

شكرا زينوبة عطرت الموضوع بطلتكي البهية إن شاء الله تجربيه قبل ما تعرسي باش دريه لبيت راجلك راه يحمر الوجه و بصحتك الطبق بصح واش ديتي تاع الدار ولا الضيوف ههههه

__________________________________________________ __________

>>>> الرد الرابع :

المشاركة الأصلية كتبت بواسطة hanane220
يعطيك الصحة وصفة رائعة بصحتكم و شكرا على الشرح

أهلا بك حنان سعدت كثيرا بتواجدك في موضوعي و الله يسلمك يا لعزيزة

__________________________________________________ __________

>>>> الرد الخامس :

ربي يحفضلك عائلتك ان شاء الله طبق يشهي شكرا على الوصفة