عنوان الموضوع : طاجين الجلبانة بأعشاش القرنون المحشي من مطبخي طبخ جزائري
مقدم من طرف منتديات العندليب

السلام عليكن اخواتي راني رجعت للمنتدى ووعدتكم بالجديد من مطبخي ليوم نقدملكم طبق بنين بزاف بزاف واكيد راح يعجب افراد عائلتكم نحليكم معاه
المقادير
للمرق او الصوص
حبة بصل كبيرة مرحية+1 سنة ثوم زيت +ملح+كسبر مرحي+فلفل اسود+ شوية دبشة +معدنوس مقطعين وجلبانة انا استعملت 1كلغ
للاعشاش
قرنون وكاين اللي يسميه خرشوف كيما مكتوب في العلبة خرشوف حسب افراد العائلة انا استعملت المجمد لاني مالقيتش الجديد في المحل لكن القرنون الطبيعي خير من المجمد ويطيب بسرعة على عكس المجمد اللي يطول في طيابو





250غ لحم مفروم وممكن اكثر حسب الكمية نتاع القرنون اللي عندك +بيضة +2سنات ثوم+شوية معدنوس مقطع+ملح وفلفل اسود
50غ فروماج نتاع ميزان نوع باربار تقطعيه الة مربعات
كمية من الزيتون الاخضر اللي تكوني نزعتي منو الملح
فروماج روج او قرويار رابي

التحضير
في كوكوط حطي الزيت والبصل والملخ والكسبر والفلف اسود وشوية دبشة او حشيش ومعدنوس مقطع



قليهم شوية ومرقي بالماء نحي شوية من الصوص هادي وحطيها على جنب وزيدي كمية الجلبانة وحفنة من الزيتون اغلقي الكوكوط وخليها تغلي ثم نقصي النار وخليها على نار متوسطة من ساعة ونصف حتى ساعتين لاني بصراحة نفضل الجلبانة اللي تجي ذايبة

في هدا الوقت خلطي اللحم المرحي مع البيضة والثوم والملح والمعدنوس والفلفل اسود

اعملي شوية كويرات زيديها للمرق وخليها تطيب مع الجلبانة

اما كمية الصوص اللي احتفضتي بيها حطي فيها كمية القرنون على نار هادئة حتى تطيب الحبات وتولي طرية


نحيها وخليها تبرد

جيبي الكمية المتبقية من الزيتون المغلي

اقسمي كل حبة زيتون على 2 من غير ماتقطعيها ولصقيها في قطعة الجبن وزيدي لصقي واحدة مقابلها بنفس الطريقة


ديري شوية من الفروماج روج او القرويار


وفوقو قطعة الجبن والزيتون

وغطي بقرصة من اللحم المفروم

كملي بنفس الطريقة مع باقي الحبات
في صينية الفرن حطي المرق اللي طاب فيه القرنون وحطي حبات الخرشوف ودخليها للفرن على 220 20دقيقة


كي تطيب خرجيها وغلفي وجهها بالجبن المبشور ورديها من فوق ختى يذوب ويولي لونو ذهبي


كي تطيب الجلبانة ويولي مرقها قليل وخاثر حطيها في صحن التقديم وفوقها حبات القرنون وزيني بالمعدنوس وشرائح ليمون





وهذا شكل الحبة من الداخل امممم

نتمنى يكون عجبكم لانو لذيييييييييييييييييييذ وراني نستنى التطبيقات


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

يعطيك الصحة شكله شباب و يشهي لكن عندي سؤال ماشي تقيل شوية كفيه الفرماج بزاف ؟شكراااااااااااااااا

__________________________________________________ __________

>>>> الرد الثاني :

المشاركة الأصلية كتبت بواسطة nina_65
يعطيك الصحة شكله شباب و يشهي لكن عندي سؤال ماشي تقيل شوية كفيه الفرماج بزاف ؟شكراااااااااااااااا

الله يسلمك اختي العزيزة بلعكس الفروماج اللي يزيدلو في البنة وحتى انتي كولي حبة ولا زوج ماشي الطبسي كامل هههههههههه
نورتيني اختي العزيزة

__________________________________________________ __________

>>>> الرد الثالث :

نقلك الصح الطبق تحفة بصح اعطيلي غير القرنون والزيتون ماناكلش الجلبان يعطيك الصحة ابدعتي يستاهل موضوعك التثبيت

__________________________________________________ __________

>>>> الرد الرابع :

المشاركة الأصلية كتبت بواسطة أم ياسين الزهراء
نقلك الصح الطبق تحفة بصح اعطيلي غير القرنون والزيتون ماناكلش الجلبان يعطيك الصحة ابدعتي يستاهل موضوعك التثبيت

ربي يحفظك اختي العزيزة كولي بصحتك اللي عجبك في الصحن كوليه تستاهلي
وشكرا جزيلا لانك اقترحتي التثبيت

__________________________________________________ __________

>>>> الرد الخامس :

Machaa allah okhti 3andi souaal est ce que hada garnon yatba3 3andna hna f dzayer w kayan foul mjamad puisque hawast 3lih w malgitouch