عنوان الموضوع : الرشتة من مطبخي وبالتفصيل الغير ممل المطبخ الجزائري
مقدم من طرف منتديات العندليب


جبتلكم اليوم اكلة تقليدية كامل نحبوها خدمتها من العجين الى المرق
اكيد الكثيرات يعرفوها بالصح اكيد ايضا هناك مبتدئات ما يعرفوش خطواتها
بلا ما نطول عليكم نبداو على بركة الله
للعجينة كيلت غميقة صغيرة نتاع شربة
كيلة و نصف سميد ممتاز + نصف كيلة فرينة +ملعقة صغيرة ملح +بيضة وبللي بالماء الدافيء حتى تتحصلي على عجينة متماسكة اعجنيها مللييييييييييييييح واذا احتاجت الماء زيديلها بالشوي بالصح لازم تبقى شادة روحها
اقسميها كريات صغيرة وغطيها بالنايلون وخليها ترتاح

غبري العجينة مليييح بالنشاء ومرريها في ماشينة الرشتة من الجهة الملساء انا ماشينتي كل ما ننقص رقم ترقاق اكثر
يعني نبدا برقم 9 نمرر فيه كل الكريات مرتين او ثلاثة ونغبرهم بالنشاء ونعاود نمررهم في رقم 4 ونزيد نغبرهم

ثم نحلهم في رقم 1 باش تجي الرشتة رقيقة ونغبرهم ونخليهم يرتاحوا مليح وينشفوا فوق قطعة قماش نظيفة

في هذا الوقت نحضرو المرق انا خدمتها بالدجاج

نحضر قطع دجاج منظفينو مليح وبصلة كبيرة مرحية وسنينات ثوم مرحي و كمشة حمص مرنخ وورقة رند وتوابل وملح وزيت
نقليهم في الكوكوط مع فنجان ماء باش ما تتحرقش


ثم نمرق بالماء الساخن ونغلق مدة نصف ساعة


نرجع للعجينة نمرر كل مستطيل من جهة الرشتة هكذا

ونكون موجدة قصعة فيها النشاء اول ما نخرج اشرطة الرشتة من الماشينة نغبرهم باش ما يلصقوش في بعضهم

كي نكمل كل العجينة نرجع الرشتة فوق قطعة القماش ونحاول نحركها بحذر باش يتغلغل النشاء بينها جيدا

نغربلها

ونرجعها للقصعة ونط البرمة فيها الما على النار
نحط على الرشتة شويييييييي زيت ونحل بالشوكة غير بالعقل


ونحطها بكميات قليلة في الكسكاس تفور

رايحة تلاحظي بعد دقائق انها تماسكت ومال لونها الى الاصفرار ثم اعرفي ان الرشتة نتاعك صلحت وما تزيديش تخافي منها

كملي فوري الكمية كامل وحليها في القصعة وزيديلها شوي زبدة حرة

وحلي على الكوكوط نحي اللحم والحمص وحدهم واسكبي المرق على الرشتة ولازم تكون كمية المرق مليحة لان الرشتة رايحة تتشرب باش تطيب
رجعيها تفور للمرة الثانية مدة 10 دقائق ثم قدميها في الصحن وزينيها بالحمص والبيض المسلوق والدجاج اللي حمرتيه في شوي زبدة باش يجي منظرو وطعموا لذيذ

وبصحتكم


نتمنىتعجبكم وما تنساوش الردود لانها تحفزني على المزيد
مع تحياتي عطوورة


>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

روووووووووووووووووووووعة حنونتي عطر تسلم الايادي بارك الله فيك يالفحلة

__________________________________________________ __________

>>>> الرد الثاني :

رشتة وعليها الكلااااااااااااااام ماشاء الله حرة الحراير
انا مانعرف نعملها ودايما نشوفها موصوع لكن ما عندي الماشينة

__________________________________________________ __________

>>>> الرد الثالث :

يعطيك الصحة بارك الله فيك

__________________________________________________ __________

>>>> الرد الرابع :

اممممم شكرًا على المجهود موضوع قيم خاصة لي جامي دارها كيفي ههههه
الله يجازيك عطر

__________________________________________________ __________

>>>> الرد الخامس :

يعطيك الصحة عطورة ماشاء الله خدمتك متقونة ونظيفة يسلمو