عنوان الموضوع : قراتان جديد من مطبخي يمي من مطبخي
مقدم من طرف منتديات العندليب


هاي لبنات واش راكم؟؟؟
البارح درت هاد الجواز ودرت الكريم ديسار اللي حطيتو في قسم التطبيقات

وليت فحلة ههههه زكارة في لي قالولي متعرفيش تطيبي

نقصر برك
هادا قراتان جديد من مطبخي تفضلو المقادير:
بواقي خضر تقدري تديري كل الخضرة اللي عندك انا درت:
زرودية
بطاطا
فلفل
حبة بصل
قرعة خضراء "جريوات"
ثوم


باسم الله
اولا قطعت الزرودية قطع صغيرة
قطعت الجريوات او القرعة تاني
ودرتهم يفورو مع قرن فلفل اخضر حار وشويا ملح باش ميجوش سامطين

من بعد زدت البطاطا تاني مقطعة كريات صغار لانها متديش وقت بزاف
ثانيا قطعت البصل جوانح رقيقة وفكيت على بعضاها مع الفلفل حسب الرغبة تقدري متديريش
وقليتهم في زيت شويا بالزيادة لانني رايحة نزيد نقيلي في الخضر وملح وكمون وفلفل اسود

بعد ما فارت الخضر جيدا :

وتقلات البصل والفلفل
نضيفو الخضر مع البصل والفلفل ونقليها مليح

ثالثا: نوجدو صوص كيما صوص بيشامال لكن منخليهاش تعقد بزاف
انا درت نصف لتر حليب
و3 مغارف مايزينة وملح وحركتهم مليح من بعد حطيتهم فوق النار قليلة حتى بديت نحس انها راح تعقد

رابعا نفرغوها فوق الخضر

ونحركو من الاسفل الى الاعلى حتى تمتزج جيدا
وندهنو قالب الفرن بالزبدة ونرشو بالخبز اليابس مرحي او فرينة كيما تحبو

ثم ندخلها الى الفرن حتى تتحمر مليح:

هاهي بعد ما خرجت من الفرن

نستناها حتى تبرد مليح
ونقلبوها في صحن التقديم

انا زربوني كي العادة مخلاوهاش بردت وقلبتها لمزية جات سلامات

واش رايكم؟؟

ان شاء الله تعجبكم لانها صحية ولذيذة وزيد خفيفة لانها ميش مقليا ومعمرة بالفرماج

اتهلاو في رواحكم
باي حباباتي







>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :

رووووووووووووووووووووووووووووووووووووووووعة يعطيك الصحة على الوصفة شكرا يا الفلى

__________________________________________________ __________

>>>> الرد الثاني :

ماشااااااااااااااااااااااااااااااااااااااااااااااا اااااااااااااااء الله هذي هي لفحولة تبان بنينة

__________________________________________________ __________

>>>> الرد الثالث :

المشاركة الأصلية كتبت بواسطة oum 3abdou
رووووووووووووووووووووووووووووووووووووووووعة يعطيك الصحة على الوصفة شكرا يا الفلى

شكرا اخي لمرورك ولكلماتك الجميلة
المشاركة الأصلية كتبت بواسطة ام اجياد
ماشااااااااااااااااااااااااااااااااااااااااااااااا اااااااااااااااء الله هذي هي لفحولة تبان بنينة

شكرا اختي بارك الله فيك

__________________________________________________ __________

>>>> الرد الرابع :


اولا شكرا لكل من مرت بموضوعي
لكن والله خاب املي فيكن بكل صراحة

توقعت اننا في هذا المنتدى اخوات وكل وحدةة فينا تعاون ختها لكن يا حسرتي عليكن
كل وحدة تطل وتهرب لدرجة تحيّر

كيفاش يا عجب 400 مشاهدة او اكثر و 2ردود
انا توقعت اكثر من هدا منكم
لماذا المجاملة
عجبك الموضوع
ردي عليه
واذا لم يعجبك حاولي تنصحيني لكن على الاقل احترمو مجهود الشخص اللي كتب وتعب في تحميل الصور بكل نية صادقة ولم يكن ينتضر منكن الاطراء فقط بل النصائح ايضا



__________________________________________________ __________

>>>> الرد الخامس :

شكرااااااااااااااااااااااااا
في هادي الهدرة عندك الف حق اختي